ឧត្តរមានជ័យ៖ ឯកឧត្តម ប៉ែន កុសល្យ អភិបាលខេត្តឧត្តរមានជ័យ​ បានជំរុញដល់មន្រ្តីជំនាញ​មន្ទីរស្ថាប័ន​តាមបណ្តាលក្រុងស្រុកដែលមានការពាក់ព័ន្ធទាំងអស់ ត្រូវចុះពិនិត្យសិក្សាស្រាវជ្រាវ​កំណត់ព្រំឲ្យបានច្បាស់លាស់ លើបញ្ហាវិវាទដីធ្លីរដ្ឋដីតំបន់ការពារធម្មជាតិ ដែលមានការ​ពាក់ព័ន្ធ​ជាមួយប្រជាពលរដ្ឋ ត្រូវពន្លឿនការដោះស្រាយបញ្ហានេះ ឱ្យបានអស់ឆាប់រហ័ស ដើម្បីចេញប័ណ្ណកម្មសិទ្ធ ជូនពលរដ្ឋក្នុងឆ្នាំ២០២៣នេះ។

ឯកឧត្តម ប៉ែន កុសល្យ បានបន្តថា បន្ទាប់ពីមានការពាក់ព័ន្ធលើបញ្ហាដីលើតំបន់​ការពារធម្មជាតិ​ដែល​មានប្រជាពលរដ្ឋកំពុង​ធ្វើការ​អាស្រ័យផល​ក្នុងស្រុកចំនួនពីរគឺអន្លង់វែង និងស្រុកត្រពាំង​ប្រាសាទ ដែលមានប្រជាពលរដ្ឋពាក់ព័ន្ធជាច្រើនគ្រួសារ និងតាមបណ្តាល​ក្រុងស្រុកមួយ​ចំនួន​ផ្សេងៗទៀត។ កត្ដាទាំងអស់នេះ គឺជាបញ្ហាប្រឈមមួយដែលយើងទាំងអស់គ្នា​ត្រូវរួមគ្នាគិត​ដើម្បីធ្វើការដោះស្រាយជាបន្ទាន់ ងាយស្រួល​ដល់​ប្រជាពលរដ្ឋ​ដែល​កំពុងប្រើប្រាស់​ដីធ្លី ក្នុង​ពេលបច្ចុប្បន្ននេះ មានសិទ្ធប្រើប្រាស់ដីធ្លីស្របច្បាស់។

ឯកឧត្តម បញ្ជាក់ថា តំបន់ដីដែលប្រជាពលរដ្ឋកំពុងប្រើប្រាស់លើតំបន់​ការពារធម្មជាតិ ពួកគាត់​មានសិទ្ធប្រើប្រាស់ស្របច្បាប់ ប៉ុន្តែតំបន់នោះស្ថិតក្នុងតំបន់ការពារធម្មជាតិ ដែលជាដីរបស់រដ្ឋ​ដដែល។

សូមរំលឹកថា​ តំបន់ការពារធម្មជាតិ ក្នុងខេត្តឧត្តរមានជ័យ មានបួនតំបន់រួមមាន តំបន់គូលេនព្រហ្មទេព ស្ថិតក្នុងស្រុកអន្លង់វែង តំបន់ដែនជម្រកសត្វព្រៃសង្ឃរុក្ខាវ័ន្ត ស្ថិតនៅក្នុងក្រុងសំរោង ​តំបន់ទេសភាពបន្ទាយឆ្នារ ស្ថិតនៅជាប់រវាង​ ខេត្តឧត្តរមានជ័យ បន្ទាយមានជ័យ ​និងតំបន់របៀងអភិរក្សឧត្តរ ជាប់ព្រំដែន នៃជួរភ្នំដងរ៉ែក ៕ អត្ថបទ៖ ឃិន សារិទ្ធ