មណ្ឌលគីរី ៖ នេះជាការលើកឡើងរបស់ឯកឧត្តម ជួប ប៉ារីស៍ អនុរដ្ឋលេខាធិការក្រសួងបរិស្ថាន និងជា​មន្ត្រីជនបង្គោល​រេដបូក​ថ្នាក់ជាតិ ក្នុងឱកាសសំណេះសំណាល និងប្រគល់-ទទួល សម្ភារការិយាល័យ ពីគម្រោងរេដបូកដែន​ជម្រកសត្វ​ព្រៃកែវសីមា ជូនរដ្ឋបាលខេត្តមណ្ឌលគីរី ដោយមានការចូលរួមពី ឯកឧត្តម ឈឹម កាន អភិបាលរងនៃគណៈអភិបាល​ខេត្តមណ្ឌលគីរី អង្គការសមាគមអភិរក្សសត្វព្រៃ(WCS) រដ្ឋបាលខេត្ត មន្ទីរបរិស្ថានខេត្ត នៅរសៀលថ្ងៃទី២៤ ខែកុម្ភៈ ឆ្នាំ២០២៣។

ឯកឧត្តម ជួប ប៉ារីស៍ បានគូសបញ្ជាក់បន្តឱ្យដឹងថា ក្រសួងបរិស្ថានបានចាត់ទុក អង្គការនានា ជាដៃគូរដ៏ល្អក្នុង​ការ​រួមចំណែកគាំទ្រវិស័យបរិស្ថាន ការពារធនធានធម្មជាតិ ការអភិរក្សជីវចម្រុះ និងការរស់នៅដោយចីរភាព ។ ឯកឧត្តមបន្តថា ក្រសួងបរិស្ថាន សូមថ្លែងអំណរគុណអង្គការ WCS បានចូលរួមយអនុវត្តគម្រោងរេដបូក ដែនជម្រកសត្វព្រៃកែវសីមា ដែលដើរតួនាទីយ៉ាង​សំខាន់​ក្នុងការការពារព្រៃឈើ សត្វព្រៃជាច្រើនប្រភេទ និងចូលរួមលើក​កម្ពស់ជីវភាព​របស់​ប្រជាសហគមន៍។

នេះគឺជាមោទនភាពមួយសម្រាប់ព្រះរាជាណាចក្រកម្ពុជា ដែលទទួលបានជោគជ័យក្នុងការលក់ ឥណទានកាបូន​ក្នុងទីផ្សារស្ម័គ្រចិត្តនៅលើពិភពលោក។ ថវិកាដែលបានពីការលក់ឥណទានកាបូននេះ ត្រូវបានប្រើប្រាស់សម្រាប់​ការអភិរក្សធ​នធានធម្ម​ជាតិ ​សហគមន៍ទេសចរណ៍ធម្មជាតិ ស្រូវមិត្តភាពសត្វព្រៃ និងចូលរួមអភិវឌ្ឍសហគមន៍​នៅមូល​ដ្ឋាន តាមរយៈការគាំទ្រជាថវិកាកសាងហេដ្ឋារចនាសម្ពន្ធ័ ផ្លូវ ទឹកស្អាត សូឡា ជាដើម។

គួរបញ្ជាក់ឱ្យដឹងថា សម្ភារការិយាល័យដែលផ្តល់ជូនរដ្ឋបាលខេត្តមណ្ឌលគីរីរួមមាន៖ ម៉ាស៊ីនថតចម្លងឯកសារ ចំនួន២គ្រឿង ម៉ាស៊ីនព្រីនកូល័រ ចំនួន៥គ្រឿង កុំព្យូទ័រ ចំនួន៥គ្រឿង និងកុំព្យូទ័រយួរដៃ ចំនួន៥គ្រឿង ដើម្បី​សម្រួលការងារ និងប្រសិទ្ធភាពរដ្ឋបាលថ្នាក់ក្រោមជាតិ៕ ដោយ ៖ ដារា