ភ្នំពេញ ៖ អភិបាលរាជធានីភ្នំពេញនឹងប្រើប្រាស់គ្រប់វិធានការ ដុសក្អែល តម្រង់ទិស មន្ត្រីទាំងអស់នៅថ្នាក់ក្រោមជាតិ ដើម្បីអនុវត្តការងារលើការផ្តល់សេវាជូនប្រជាពលរដ្ឋឱ្យបានទាន់ពេលវេលា និងមានសម្លាភាព។

ថ្លែងនៅក្នុងកិច្ចប្រជុំការពង្រឹងការផ្តល់សេវាសាធារណៈតាមយន្តការច្រកចេញ-ចូលតែមួយជូនប្រជាពលរដ្ឋនៅថ្នាក់ខណ្ឌ និងសង្កាត់ ជាមួយអាជ្ញាធរខណ្ឌទាំង១៤ សង្កាត់ទាំង១០៥ និងស្មៀន នៅសាលារាជធានីភ្នំពេញ នារសៀល​ថ្ងៃទី២៤ ខែកុម្ភៈ ឆ្នាំ២០២៣ ឯកឧត្តម ឃួង ស្រេង អភិបាលរាជធានីភ្នំពេញ បានមានប្រសាសន៍ថា ការបង្កើត​ច្រក​ចេញ​ចូលតែមួយ គឺមានគោលបំណងតែមួយគត់ នោះគឺបម្រើសេវាសាធារណៈជូន​ប្រជាពលរដ្ឋឱ្យ​បានទាន់​ពេល​វេលា ​និងមានសម្លាភាព។ ដូច្នេះ មន្ត្រីដែលជាប្រតិបត្តិករទាំងអស់ ត្រូវរួមគ្នាធ្វើ ដើម្បីបម្រើប្រជាពលរដ្ឋឱ្យបានល្អ រាប់តាំងពីពាក្យសំដីឡើងទៅ។

ឯកឧត្តម ឃួង ស្រេង បានបន្តថា ការកោះហៅអាជ្ញាធរខណ្ឌទាំង១៤ សង្កាត់ទាំង១០៥ និងស្មៀន មកប្រជុំពេលនេះ គឺមានបំណងកោតសរសើរមន្ត្រីដែលបានបំពេញការងារបានយ៉ាងល្អជាមួយរាជរដ្ឋាភិបាល ក្នុងកិច្ចការងារបម្រើ​ប្រជាពលរដ្ឋ រហូតទទួលបានការជឿទុកចិត្តយ៉ាងខ្លាំងពីប្រជាពលរដ្ឋគ្រប់គ្នា ។ កិច្ចប្រជុំនេះក៏មានបំណងណែនាំដុសក្អែល តម្រង់ទិស ចំពោះមន្ត្រីមួយចំនួនផងដែរ ដើម្បីឱ្យមន្ត្រីទាំងអស់​នៅថ្នាក់​ក្រោមជាតិអនុវត្តការងារលើការផ្តល់សេវាជូនប្រជាពលរដ្ឋឱ្យកាន់តែល្អ ទាន់ពេលវេលា និងមានសម្លាភាព ជាមួយ​និងការរក្សាបានសន្តិសុខ សុវត្ថិភាពជូនប្រជាពលរដ្ឋផងដែរ។

ឯកឧត្តម ឃួង ស្រេង បញ្ជាក់ថា នៅពេលខាងមុខនេះ ឯកឧត្តមនឹងដាក់កម្លាំង​បង្កប់ជាប្រជាពលរដ្ឋ​ទៅទទួល​សេវាពី​មន្ត្រី ដើម្បីឱ្យដឹងថា មន្ត្រីបម្រើប្រជាពលរដ្ឋបានល្អក្នុងកម្រិតណា។ ក្នុងនាមជាមន្ត្រី ត្រូវកែប្រែឥរិយាបទ​ពីពេលនេះទៅ​នៅពេលមានបញ្ហា កុំថា អភិបាលរាជធានីភ្នំពេញ មិនបានណែនាំជាមុនឱ្យសោះ។

ឯកឧត្តម ឃួង ស្រេង បានបន្ថែមទៀតថា ល្បែងស៊ីសងគ្រប់ប្រភេទ គឺមិនអនុញ្ញាតិឱ្យមាន​ជាដាច់ខាតនៅ​ក្នុងផ្សារ​នានានៅក្នុងរាជធានីភ្នំពេញ កុំថាឡើយ ល្បែងឡូតូដែលស្របច្បាប់ ក៏មិនឱ្យមានដែរ ។ បើរកឃើញថា នៅក្នុង​ផ្សារណាមួយមានល្បែងស៊ីសងនោះ ប្រធានផ្សារនឹងមានបញ្ហាមិនខានឡើយ៕ អត្ថបទ ៖ ប្រាក់ វ៉ាន់ដា