ព្រះសីហនុ៖ រដ្ឋបាលខេត្តព្រះសីហនុនៅថ្ងៃទី២៤ ខែកុម្ភៈ ឆ្នាំ២០២៣ បានប្រកាសចាត់វិធានការផ្លូវច្បាប់យ៉ាងម៉ឺងម៉ាត់បំផុត ចំពោះក្រុមមេខ្យល់ដែលមានបំណង បង្កចលាចល បំផុសបំផុល ចលនាអនាធិបតេយ្យនាំពលរដ្ឋចូលទន្ទ្រានដីរដ្ឋ និងដីកម្មសិទ្ធិឯកជននៅលើទឹកដីនៃខេត្តព្រះសីហនុដោយគ្មានការលើកលែងឡើយ។
ការប្រកាសរបស់រដ្ឋបាលខេត្តព្រះសីហនុនេះ បន្ទាប់ពីមានករណីប្រជាពលរដ្ឋប្រមាណ ២៥០គ្រួសារ ដែលមានការពាក់ព័ន្ធលើទីតាំងដីកម្មសិទ្ធិស្របច្បាប់របស់ធនាគារកាណាឌីយ៉ា មានទីតាំងស្ថិតនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ។ ទាក់ទងនឹងករណីនេះរដ្ឋបាលខេត្តព្រះសីហនុបានឱ្យដឹងថា ក្រោយទទួលបានកម្មសិទ្ធិស្របច្បាប់ ធនាគារកាណាឌីយ៉ា រួមជាមួយរដ្ឋបាលខេត្តព្រះសីហនុ បានខិតខំធ្វើការសម្របសម្រួលដើម្បីដោះស្រាយគោលនយោបាលផ្ដល់ដីឡូត៍ជូនប្រជាពលរដ្ឋដែលកំពុងតាំងទីលំនៅ និងអាស្រ័យផលជាក់ស្ដែងលើទីតាំងដី។
រដ្ឋបាលខេត្តបញ្ជាក់ថា ជាលទ្ធផលបងប្អូនប្រជាពលរដ្ឋមួយចំនួនធំបានឯកភាពទទួលយក និងនៅសល់ប្រជាពលរដ្ឋមួយចំនួនតូច នៅបន្តជឿតាមការញុះញង់ពីសំណាក់មេក្លោង និងមេខ្យល់ដែលបានធ្វើសកម្មភាពញុះញង់ បំផុសបំផុលឱ្យប្រជាពលរដ្ឋនៅបន្តការទន្ទ្រានកាន់កាប់លើដីកម្មសិទ្ធិរបស់អ្នកដទៃ ពុំទាន់ទទួលយកគោលការណ៍ដោះស្រាយ ក្រោមការសម្របសម្រួលរបស់រដ្ឋបាលខេត្តព្រះសីហនុ។ រដ្ឋបាលខេត្តព្រះសីហនុបានអំពាវនាវដល់បងប្អូនប្រជាពលរដ្ឋទាំងអស់ សូមឈប់ចាញ់បោកការឃោសនារបស់ក្រុមមេខ្យល់ឱ្យចូលទៅទន្ទ្រានកាន់កាប់ដីរដ្ឋ និងដីកម្មសិទ្ធិឯកជន។ រដ្ឋបាលខេត្តព្រះសីហនុបញ្ជាក់ថា៖ «រដ្ឋបាលខេត្តនឹងចាត់វិធានការផ្លូវច្បាប់យ៉ាងម៉ឺងម៉ាត់បំផុត ចំពោះក្រុមមេខ្យល់ដែលមានបំណង បង្កចលាចល បំផុសបំផុល ចលនាអនាធិបតេយ្យចូលទន្ទ្រានដីរដ្ឋ និងដីកម្មសិទ្ធិឯកជននៅលើទឹកដីនៃខេត្តព្រះសីហនុដោយគ្មានការលើកលែងឡើយ»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
