ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា បានសរសរលើហ្វេសប៊ុកផ្លូវការនៅថ្ងៃទី២៦ ខែកុម្ភៈ ឆ្នាំ២០២៣នេះថា កម្ពុជាកំពុងដើរលើនយោបាយ ត្រឹមត្រូវជានិច្ច ក្រោមការដឹកនាំរបស់គណបក្សប្រជាជនកម្ពុជា។

ឯកឧត្ដមថ្លែងថា៖ «នយោបាយ គឺពិបាក នយោបាយត្រូវការគិតគូរពិចារណាយល់ឲ្យបានម៉ត់ចត់​គ្រប់​ជ្រុងជ្រោយព្រោះថា ​នយោបាយ​តម្រូវឲ្យមានការសម្រេចចិត្ត ​ហើយការសម្រេចចិត្តនេះ​អាច​ជះឥទ្ធិពលវិជ្ជមានផង និងអវិជ្ជមានផង។ ទោះបីជាយ៉ាងនេះក្ដី ក៏ខ្ញុំជឿជាក់យ៉ាងមុតមាំថា កម្ពុជាកំពុងដើរលើនយោបាយ ត្រឹមត្រូវជានិច្ច ក្រោមការដឹកនាំរបស់គណបក្សប្រជាជនកម្ពុជា»។

ឯកឧត្ដម បញ្ជាក់ថា គណបក្សប្រជាជនកម្ពុជាមិនដែលអះអាងថាល្អឥតខ្ចោះនោះទេ ហើយក៏មិន​អះអាងថាគ្មានចំណុចខ្វះខាតនោះដែរ។ ចំណុចពិសេសរបស់គណបក្សប្រជាជនកម្ពុជា គឺការ​គិតគូរ​ពិចារណាជូនប្រជាជន និងប្រទេសជាតិ​ ជាជាចង្កោមរួម (មើលព្រៃទាំងមូលកុំមើល តែមួយដើម) ធ្វើយ៉ាងណាឲ្យកម្ពុជាដើរឆ្ពោះទៅមុខប្រកបដោយស្ថិរភាព វិបុលភាព​ និងភាពសុខដុម។

ឯកឧត្ដម បញ្ជាក់ថា កម្ពុជាធ្លាប់ត្រូវបានសាកល្បងក្នុងបរិបទជាច្រើន តែកម្ពុជា ដែលដឹកនាំ​ដោយ​គណបក្សប្រជាជនកម្ពុជា​ តែងតែមានវិធីសាស្ត្រគត់មត់ ហ្មត់ចត់ ត្រឹមត្រូវជាពិសេសការបណ្ដុះ​បណ្ដាលកម្មាភិបាលជំនាន់ ក្រោយរបស់គណបក្សប្រជាជនកម្ពុជា ដើម្បីដោះស្រាយវិបត្តិទាំង​អស់នោះ ​ប្រកប​ដោយប្រសិទ្ធភាពជាទីបំផុត៕ អត្ថបទ៖ វ៉ន ដារ៉ា