តាកែវ៖ ថ្លែងនៅក្នុងឱកាសចុះផ្សព្វផ្សាយលទ្ធផលមហាសន្និបាតវិសាមញ្ញ​តំណាងទូទាំង​ប្រទេស​ជូនដល់សមាជិក សមាជិកាគណបក្សប្រជាជនកម្ពុជាស្រុកព្រៃកប្បាស ខេត្តតាកែវ​ នៅថ្ងៃទី២៥ ខែកុម្ភៈ ឆ្នាំ២០២៣នេះ ឯកឧត្តមបណ្ឌិត ពេជ សោភ័ន សមាជិកគណកម្មាធិការកណ្ដាល​គណបក្ស​ប្រជាជនកម្ពុជា ​និងជាសហប្រធានក្រុមការងារគណបក្សចុះមូលដ្ឋានស្រុកព្រៃកប្បាស ខេត្តតាកែវ បានលើកឡើងប្រាប់ដល់សមាជិក សមាជិការគណបក្ស ​ដែលក្រោមការដឹកនាំរបស់គណបក្ស​ប្រជាជន​កម្ពុជា ​បានធ្វើឲ្យប្រទេសជាតិមានសុខសន្តិភាព មានការអភិវឌ្ឍន៍រីកចម្រើនលើគ្រប់វិស័យ​ជាពិសេសបានលើកស្ទួយកិត្តិយសប្រទេសជាតិឲ្យខ្ពស់មុខមាត់ស្នើនិងប្រទេសធំៗដទៃទៀតនៅលើពិភពលោក។

ឯកឧត្តមបណ្ឌិត ពេជ សោភ័ន បានមានប្រសាសន៍បន្តថា ការគ្រប់គ្រងការឆ្លងរីករាលដាល​ជំងឺ​កូវីដ១៩​ បានយ៉ាងល្អប្រសើរនិងការនាំវ៉ាក់សាំងចាក់ជូនបងប្អូនប្រជាពលរដ្ឋដោយមិនគិតថ្លៃ បាន​ធ្វើឲ្យពិភពលោក​មានការ​ភ្ញាក់ផ្អើល​ និង​ទទួលស្គាល់កម្ពុជាថា ​ជាប្រទេសដែលមានសមត្ថភាព​ពិតប្រាកដដែល​អាចគ្រប់គ្រងជំងឺកាចសាហាវនេះបាន ហើយការធ្វើជាប្រធានដឹកនាំ​កិច្ចប្រជុំ​អាស៊ាន​ដែលមានមេដឹកនាំប្រទេសជាច្រើនចូលរួម​ជាពិសេសមេដឹកនាំប្រទេសមហាអំណាច អាមេរិក ចិន រុស្ស៊ី ខណៈដែលពិភពលោកកំពុងតែប្រឈមមុខ និងសង្រ្គាម រុស្ស៊ី អ៊ុយក្រែន ការ​ប្រកួតប្រជែងភូមិសាស្រ្តនយោបាយ​ តែកម្ពុជាអាចដឹកនាំកិច្ចប្រជុំនេះបានជោគជ័យដែលនាំ​ដល់កិត្តិយសដល់ប្រទេសកម្ពុជាយើង។

ឯកឧត្តមបណ្ឌិត ពេជ សោភ័ន មានប្រសាសន៍បន្តថា នៅប៉ុន្មានខែខាងមុខ ប្រទេស​កម្ពុជា​យើង​ក៏​នឹងធ្វើជាម្ចាស់ផ្ទះក្នុងការរៀបចំការប្រកួតកីឡាស៊ីហ្គេម ដែលមានកីឡាករប្រទេសជាច្រើនចូលរួម​ហើយក៏​និងមានមនុស្សរាប់លាននាក់រងចាំទស្សនាផងដែរ។

ឆ្លៀតនៅក្នុងឱកាសនោះដែរឯកឧត្តមបណ្ឌិត ពេជ សោភ័ន ​បានបានណែនាំឱ្យថ្នាក់ដឹកនាំ​គណបក្ស​ប្រជាជនកម្ពុជានៅមូលដ្ឋាន ត្រូវយកចឹត្តទុកដាក់បំរើសេវាជូនបងប្អូនប្រជាពលរដ្ឋឲ្យបានល្អប្រសើរ បង្កើនអំពើល្អ ​បង្កើន​ការយកចិត្តទុកដាក់ពីសុខទុក្ខ ​និង​ផ្តល់នូវក្តីស្រលាញ់ដល់ប្រជាពលរដ្ឋ​នៅ​មូលដ្ឋាន ដែលនិងនាំឲ្យសម្លេងបោះឆ្នោតគាំទ្រគណបក្សប្រជាជនកម្ពុជា​នៅពេលខាងមុខ​នឹង​រឹតតែកើនឡើងយ៉ាងប្រាកដជាក់ជាពុំខាន៕អត្ថបទ៖ គុជ វិភាគ