បន្ទាយមានជ័យ៖ ឯកឧត្តមឧបនាយករដ្ឋមន្រ្តី កែ គឹមយ៉ាន បានគូសបញ្ជាក់ថា ក្រោមការដឹកនាំ​របស់​គណបក្ស​ប្រជាជន​កម្ពុជា ដែលមានសម្តេចតេជោ ហ៊ុន សែន ប្រធាន​គណបក្ស និងជា​នាយករដ្ឋមន្ត្រី​ ប្រទេស​កម្ពុជា​សម្រេច​បាន​នូវ​សមទ្ធិផល​ធំធេង​ជា​បន្តបន្ទាប់ ​និងធ្វើឱ្យ​សង្គមជាតិ​មាន​ការ​រីកចម្រើន​លើ​គ្រប់វិស័យ។

ឯកឧត្តមឧបនាយករដ្ឋមន្រ្តី កែ គឹមយ៉ាន សមាជិកអចិន្រ្តៃយ៍ និងជាប្រធាន​ក្រុមការងារ​គណបក្សប្រជាជនកម្ពុជា ចុះមូលដ្ឋានខេត្តបន្ទាយមានជ័យ ថ្លែងបែបនេះ នៅថ្ងៃទី២៦ ខែកុម្ភៈនេះ ក្នុងឱកាស​ជួបសំណេះសំណាល និងផ្សព្វផ្សាយសេចក្តីសម្រេចចិត្តនៃ​មហា​សន្និបាតវិសាមញ្ញ​តំណាង​ទូទាំងប្រទេសរបស់គណបក្សប្រជាជនកម្ពុជា ​ជាមួយសមាជិក-សមាជិកាគណបក្សទូទាំង​ខេត្តបន្ទាយមានជ័យ។

ក្នុងឱកាសនោះ ឯកឧត្តមឧបនាយករដ្ឋមន្រ្តី ក៏បានជំរុញឱ្យអាជ្ញាធរមូលដ្ឋានគ្រប់លំដាប់ថ្នាក់​ត្រូវបន្តចុះអោយដល់ផ្ទះរបស់ប្រជាពលរដ្ឋ ​ដើម្បីជួយដោះស្រាយរាល់បញ្ហាដែលកើត​មានឡើង​ចំពោះពួកគាត់ ហើយត្រូវរាយការណ៍បន្តភ្លាមប្រសិនបើបញ្ហានោះ ហួសពី​សមត្ថភាពក្នុងការដោះ​ស្រាយ​តាមថ្នាក់​របស់ខ្លួននីមួយៗ៕