ព្រះវិហារ៖ ​រាជរដ្ឋាភិបាលក្រោមការដឹកនាំប្រកបដោយគតិបណ្ឌិត​របស់សម្ដេចតេជោ ហ៊ុន សែន នាយករដ្ឋមន្ដ្រី ទទួលបាននូវសុខ សន្ដិភាព និងការអភិវឌ្ឍរីកចម្រើនលើគ្រប់វិស័យ រួមទាំងសិទ្ធ​សេរីភាព ជំនឿសាសនា រក្សា បាននូវ​សាមគ្គីភាព ស្ថិរភាពនយោបាយ និង​សន្ដិសុខសង្គម ដោយមិនរើសអើង និងមិនមានការ បែងចែកសង្គម ជំនឿ សាសនា និងនិន្នាការនយោបាយ។

ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ថ្លែងបែបនេះ ក្នុងឱកាសចូលរួម ក្នុង​ពិធីស្រោចស្រពសុគន្ធវារីប្រគេនប្រកាសសនីយប័ត្រ ព្រះគ្រូរដ្ឋានុរ័ក្ខកោសល មឿង សុនិមិត្ត ជាព្រះគ្រូអនុគណស្រុកឆែប រៀបចំឡើងក្នុងបរិវេណវត្តសុវណ្ណគីរី ស្ថិតក្នុងភូមិឆែបលិច ឃុំ ឆែបមួយ និងអញ្ជើញសម្ពោធដាក់ឱ្យប្រើប្រាស់ជាផ្លូវការសាលាឆាន់ និងសមិទ្ធផលនានាក្នុងវត្ត ទ្រីសទ្ធារាម ស្ថិតក្នុងឃុំសង្កែពីរ ស្រុកឆែប នាព្រឹកថ្ងៃទី២៦ ខែកុម្ភៈ ឆ្នាំ២០២៣។

ឯកឧត្តម គីម រិទ្ធី បានចូលរួមអបអរសាទរ ចំពោះព្រះគ្រូរដ្ឋានុរ័ក្ខកោសល មឿង សុនិមិត្ត ក្នុងឱកាសទទួលបានការតែងតាំងជាព្រះគ្រូអនុគណស្រុកឆែប បន្ទាប់ ពីទទួលបាន​ជំនឿទុកចិត្ត​ពីគណៈសង្ឃគ្រប់ព្រះអង្គ ពិសេសគឺទទួលបាននូវការទុកចិត្តពីជំនឿ របស់​ប្រជាពលរដ្ឋ​នៅក្នុង​ស្រុកឆែប​ទាំងមូល ព្រមទាំងចូលរួមអបអរសាទចំពោះសមិទ្ធផលនា នាជា​ច្រើន​ដែលមាន​នៅក្នុងវត្តទ្រីសទ្ធរាម ដែលកើតចេញពីសទ្ធាជ្រះថ្លារបស់ពុទ្ធបរិស័ទ និង សប្បុរសជន​ជិតឆ្ងាយ តាមរយៈការប្រតិបត្តិ នូវប្រពៃណីនៃការចែករំលែក បញ្ជាក់ឱ្យឃើញកាន់ តែច្បាស់​ពី​មនោ​សញ្ចេតនា សាមគ្គីភាព ឯកភាពគ្នាជាធ្លុងមួយ ដែលយើងទាំងអស់គ្នាបានខិតខំ កសាងទុក​ជាទីគោរព​សក្ការៈ​ ដើម្បីបានជ្រកក្រោមម្លប់ព្រះពុទ្ធសាសនា ដែលជាសាសនារបស់ រដ្ឋ ក្រោមដំបូលរដ្ឋធម្មនុញ្ញតែមួយ។

ឯកឧត្តមអភិបាលខេត្ត បានបញ្ជាក់ថា ថ្ងៃនេះយើងទាំងអស់គ្នា ពិតជាមានសេចក្តី សប្បាយរីករាយ ប្រកបទឹកចិត្តជ្រះថ្លាបរិសុទ្ធក្នុងព្រះពុទ្ធសាសនា ដោយបានប្រារព្ធពិធីបុណ្យ នៅក្រោមម្លប់​ដ៏ត្រជាក់​នៃសន្តិភាព ក្រោមការដឹកនាំរបស់រាជរដ្ឋាភិបាលកម្ពុជា បាននាំមកនូវការ អភិវឌ្ឍឥតឈប់ឈរ ប្រជាពលរដ្ឋរស់នៅប្រកបដោយសុខដុមរម្យនា។

ជាមួយគ្នានេះ ឯកឧត្តម ក៏បានផ្ដល់នូវអនុសាសន៍មួយចំនួន ​ដល់បងប្អូនប្រជាពលរដ្ឋពុទ្ធបរិស័ទ​ទាំង​អស់ សូមបន្ដស្មារតី ដឹងគុណនូវគោលនយោបាយឈ្នះៗ និងបន្ដគាំទ្រការដឹកនាំ របស់​រាជ​រដ្ឋាភិបាលក្រោមការដឹកនាំប្រកបដោយគតិបណ្ឌិត​របស់សម្ដេចតេជោ​ ហ៊ុន សែន​ នាយករដ្ឋមន្ដ្រី ដោយត្រូវចូលរួមនៅក្នុងការបោះឆ្នោតជ្រើសតាំង តំណាងរាស្ដ្រនីតិកាល ទី៧ នៃរដ្ឋសភា នាថ្ងៃអាទិត្យ ទី២៣ ខែកក្កដា ឆ្នាំ២០២៣ខាងមុខ​ឱ្យបាន​គ្រប់គ្នា​។

បន្ថែមពីនេះឯកឧត្តមអភិបាលខេត្ត សូមបន្ដប្រពៃណីវប្បធម៌ សន្ដិភាព ចេះស្រលាញ់យោគយល់​អធ្យាស្រ័យគ្នា និងរួមរស់ជាមួយគ្នា ចេះគោរពគ្នាទៅវិញទៅមកប្រកបទៅដោយ ​ក្ដីមេត្តាករុណា សណ្ដោស ប្រណី រវាងសហគមន៍សាសនាផ្សេងៗ ​ទាំងនៅក្នុងថ្នាក់ជាតិ និងអន្ដរជាតិ ដើម្បី​ធ្វើយ៉ាងណា ឱ្យសង្គមកម្ពុជា ​ជាសង្គមមួយប្រកបទៅដោយសុជីវធម៌ ​សីលធម៌​ ករិយាធម៌ និង​គុណធម៌ កើតជាមូលដ្ឋានគ្រឹះនៃគោលការណ៍លទ្ធិជំនឿសាសនា​ និងវិស័យសាសនានីមួយៗ៕