កំពង់ស្ពឺ ៖ ឯកឧត្ដម ហ៊ុន ម៉ានី អ្នក​តំណាង​រាស្ត្រ​មណ្ឌល​ខេត្ត​កំពង់ស្ពឺ ព្រមទាំង ឯកឧត្ដម លោក​ជំទាវ ​សមាជិកព្រឹទ្ធសភា និង​រដ្ឋសភា ប្រចាំ​ភូមិភាគ និង​មណ្ឌល​ខេត្ត​កំពង់ស្ពឺ បាន​អញ្ជើញ​ជា​អធិបតី​ក្នុង​ពិធី​ជួប​សំណេះសំណាល​ជា​មួយ​មន្ត្រី​អប់រំ និង​មន្ត្រី​សុខាភិបាល នៃ​ស្រុក​ឧដុង្គ​ខេត្ត​កំពង់ស្ពឺ នៅ​ក្នុង​បរិវេណ​វិទ្យាល័យ ហ៊ុន សែន បាត់ដឹង ដែល​ជា​ស្រុក​ពិសេស នៃ​ចំណុច​ចាប់​ផ្ដើម​ការងារ​មូលដ្ឋានរបស់ឯកឧត្តមផ្ទាល់។

​ឯកឧត្ដម ហ៊ុន ម៉ានី បានសម្តែងនូវសេចក្តីសោមនស្សរីករាយចំពោះវត្តមាន លោកគ្រូ អ្នក​គ្រូ​​បង្រៀន ​លោកគ្រូ អ្នក​គ្រូពេទ្យ​នៅ​ស្រុកឧដុង្គ ដែល​ជា​ស្រុក​ដែល​ឯកឧត្តម​បាន​ហ្វឹតហាត់​ការងារ​មូលដ្ឋានដំបូងកាលពីឆ្នាំ ២០១២។ ឯកឧត្តម បានលើកឡើងថា ការជួបជុំសប្បាយរីករាយនាថ្ងៃនេះ

បានផ្សារភ្ជាប់នូវមនោសញ្ចេតនា និង អនុស្សាវរីយ៍ល្អៗ និងការរៀនសូត្រដោយផ្ទាល់ពី ភាព​ហ្មត់ចត់ ​ភាពទន់ភ្លន់ ការគោរពគ្នាទៅវិញទៅមក ក្នុងការទាក់ទង ការ​ហ្វឹកហាត់​​ការងារ ដោយ​មិន​ប្រកាន់វ័យដែលនាំឲ្យការងារទទួលបានលទ្ធផលល្អ និងប្រកបដោយប្រសិទ្ធភាព និងប្រសិទ្ធ​ផល​ខ្ពស់។

ឯកឧត្តម បានរៀនសូត្រដោយផ្ទាល់ពី ថ្នាក់ដឹកនាំស្រុក និងមានឱកាសរៀនសូត្រពីមេឃុំ រួមទាំង​លោក​គ្រូ អ្នកគ្រូ ដែលបានចូលរួមវគ្គបំប៉ន​សិស្សានុសិស្ស​ដែលត្រៀមប្រលង​មធ្យមសិក្សា​ទុតិយ​ភូមិ​ផងដែរ។

ឯកឧត្តម ហ៊ុន ម៉ានី ក៏បានរំលេចផងដែរថា ដើម្បីទទួលបានចំណេះដឹងជាមូលដ្ឋាន យើងត្រូវ​រៀន​សូត្រ​ពី​សៀវភៅ សាលា និង​ទ្រឹស្តី​នានា បន្ទាប់មកយើងគប្បីរៀនសូត្រពីបុគ្គលជោគជ័យ តាមរយៈ​ការសង្កេត សិក្សា និងស្វែងយល់ពីសិល្បៈនៃការដឹកនាំ រៀនសូត្រពីភាពជោគជ័យ និងបរាជ័យ​របស់​ពួកគេ រួចហើយ ខិតខំហ្វឹតហាត់សមត្ថភាពខ្លួនឯង និងបន្តរៀនសូត្រពី​ការងារ ដោយ​អោយ​ការងារ​បង្រៀនតាមរយៈការរៀនធ្វើផង អនុវត្តផង និងដកស្រង់ជាបទពិសោធន៍ផង។

ស្របជាមួយការលើកឡើងខាងលើនេះ ឯកឧត្តម បានលើកឡើងទៀតថា ចំណេះដឹង គឺជាមូល​ដ្ឋាន​នៃការដឹកនាំ តែមិនទាន់គ្រប់គ្រាន់នោះទេ គឺយើងត្រូវចេះប្រើចំណេះដឹងឱ្យត្រូវគោលដៅ ទើប​គ្រប់គ្រាន់។ ទន្ទឹមនឹងនោះឯកឧត្តមបានគូរបញ្ជាក់ពីទស្សនៈផ្ទាល់ខ្លួនថា ការដឹកនាំមាន​កម្រិត​ខុសៗ​គ្នា ដែលតម្រូវឱ្យមានការសិក្សាសុីជម្រៅ និងអនុវត្តការងារតាមបែបបទ និងមូលដ្ឋាន​នៃស្ថាប័ននីមួយៗ ៕ អត្ថបទ ៖ រដ្ឋា