ភ្នំពេញ៖ រាជរដ្ឋាភិបាលកម្ពុជា តាមរយៈគណៈកម្មាធិការសម្បទានដីសង្គមកិច្ចថ្នាក់ជាតិ នឹងសាងសង់ផ្ទះសម្បែងជាង ៣០០ខ្នង ជូនដល់កងកម្លាំងការពារ និងគ្រួសារ នៅព្រំដែនកម្ពុជា-វៀតណាម លើដីសម្បទានសង្គមកិច្ច ស្ថិតក្នុងខេត្តត្បូងឃ្មុំ និងខេត្តស្វាយរៀង ។ក្នុងពេលចុះពិនិត្យទីតាំងដី សម្រាប់សាងសង់លំនៅឋាន ជូនដល់កងកម្លាំងនៅតាមខ្សែបន្ទាត់​ព្រំដែន​កម្ពុជា-វៀតណាម នៅក្នុងស្រុកពញាក្រែក ខេត្តត្បូងឃ្មុំ នាថ្ងៃទី២៦ ខែកុម្ភៈ ឆ្នាំ២០២៣ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការសម្បទានដីសង្គមកិច្ចថ្នាក់ជាតិ មានប្រសាសន៍ថា សម្រាប់​ខេត្តត្បូងឃ្មុំ ការចែកជូនដីនេះ គឺមានចំនួន៤ទីតាំង ក្នុងដីមួយឡូតិ៍ទំហំ ៣០គុណ​នឹង៤០ម៉ែត្រ ហើយជំរុញទៅមន្ទីររៀចំដែនដីខេត្ត ត្រូវរៀបចំប្លង់គោលដីឡូតិ៍ទាំងនោះ ។

ឯកឧត្តមបានបន្តថា ការបែងចែកដីឡូតិ៍នេះ មានដីសម្រាប់ធ្វើសាលារៀន មណ្ឌលសុខភាព ផ្សារ វត្តអារាម ស្នាក់ការភូមិ ច្រកចេញចូលតែមួយ វីរៈព្រំដែន ប៉ុស្តិ៍ការពារព្រំដែន និងរៀបចំធ្វើជាដី​បម្រុងទុកជាដើម ជាមួយនឹងការអភិវឌ្ឍផ្លូវលំ បណ្ដាញទឹកស្អាត បង្គន់អនាម័យ រួមទាំងការ​ដាំដើមឈើ លើដីដែលនៅសេសសល់ ឲ្យក្លាយទៅជាព្រៃសហគមន៍ ។

ឯកឧត្តមឧបនាយករដ្ឋមន្ត្រី បានបន្ថែមថា ចំពោះការសាងសង់លំនៅដ្ឋាន ជូនដល់កងកម្លាំងនេះ ធ្វើឲ្យបានមុនរដូវភ្លៀង ខណៈថវិកាសម្រាប់សាងសង់ គឺមានគ្រប់គ្រានហើយ ដែលក្នុងនោះ​ខេត្តត្បូងឃ្មុំមានជាង ២០០ខ្នង និងខេត្តស្វាយរៀង មានជាង១០០ខ្នង ហើយគ្រោងនឹងស្នើដល់​ប្រមុខរដ្ឋាភិបាល សម្ដេចតេជោ ហ៊ុន សែន អនុវត្តបន្ថែមទៀត ។

យោងតាមសេចក្តីជូនដំណឹង របស់ទីស្ដីការគណៈរដ្ឋមន្ត្រី កាលពីថ្ងៃទី១៧ ខែកុម្ភៈ ឆ្នាំ២០២៣ បានឲ្យដឹងថា រាជរដ្ឋាភិបាលបានសម្រចប្រគល់ដី ដែលកម្ពុជាទទួលបានបន្ទាប់ពីការបោះបង្គោល និងខណ្ឌសីមាព្រំដែន ស្ថិតក្នុងភូមិសាស្ត្រខេត្តត្បូងឃ្មុំ និងខេត្តស្វាយរៀង ទំហំសរុបចំនួនជាង ១ ២០០ហិកតា ដែលបច្ចុប្បន្នស្ថិតក្រោមការគ្រប់គ្រងរបស់អាជ្ញាធរជាតិទទួលបន្ទុកកិច្ចការព្រំដែន ជូនគណៈកម្មាធិការសម្បទានដីសង្គមកិច្ចថ្នាក់ជាតិ ។

ដីទាំងអស់នោះ សម្រាប់អនុវត្តកម្មវិធីសម្បទានដីសង្គមកិច្ច ជូនកងទ័ព និងនគរបាលជាតិឈរ​ជើង​តាមព្រំដែនកម្ពុជា-វៀតណាម អតីតកងកម្លាំងប្រដាប់អាវុធ និងគ្រួសារ និងប្រជាពលរដ្ឋក្រីក្រ​ស៊ីវិលទូទៅ ៕