ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី និងជាប្រធានសមាគមសមាជិកសភាកម្ពុជាដើម្បីប្រជារាស្ត្រ និងការអភិវឌ្ឍ (CAPPD) បានអញ្ជើញបើកសិក្ខាសាលាស្តីពី «ការផ្តល់ភាពអង់អាចដល់ យុវជន៖ ការអប់រំ ការងារ និងសុខភាព», នាព្រឹកថ្ងៃទី២៧ ខែកុម្ភៈ ឆ្នាំ២០២៣នេះ ។សិក្ខាសាលាខាងលើនេះមានការចូលរួមពីសំណាក់លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាហិរញ្ញិករបស់វេទិកាសមាជិកសភាអាស៊ីដើម្បីប្រជាជន និងការអភិវឌ្ឍន៍ (AFPPD), ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា ប្រធានក្រុមសភាវ័យក្មេង និងជាប្រធានសហភាពសហព័ន្ធយុវជនកម្ពុជា និងឯកឧត្តម រ៉ាអ៊ូល ដានីញែល ម៉ានូអែល សមាជិក វេទិកា សភាហ្វីលីពីនដើម្បីប្រជាជន និងការអភិវឌ្ឍន៍(PLCPD)។

លោកជំទាវកិត្តិសង្គហបណ្ឌិត ម៉ែន សំអន បានថ្លែងថា ការកំណត់ប្រធានបទនេះ គឺជាប្រធានបទសំខាន់សម្រាប់ក្មេងជំទង់ និងយុវជនដែលចាំបាច់ត្រូវយល់ដឹងបន្ថែមទៀត ពីព្រោះថាបញ្ហាទាំងនេះ មានឥទ្ធិពលពេញមួយជីវិតរបស់ពួកគាត់តែម្តង។ ម្យ៉ាងវិញទៀតយើងគួរកត់សម្គាល់ផងដែរថា ប្រធានបទដែលបានលើកឡើងនេះ ក៏ជាមូលដ្ឋានគ្រឹះនៃការ អភិវឌ្ឍប្រកបដោយចីរភាព រួមមានគោលដៅទី៣ សុខភាព និងសុខុមាលភាពមាំមួនគោលដៅទី៤ ការអប់រំប្រកបដោយគុណភាព និងគោលដៅទី៨ ការងារសមរម្យ និងកំណើនសេដ្ឋកិច្ច។ យើងម្នាក់ៗប្រាកដជាបានដឹងច្បាស់ពីសារប្រយោជន៍នៃការអប់រំ និងការងារដែលផ្តល់ជាពុទ្ធិ និងបណ្តុះជាគំនិតសម្រាប់ការអភិវឌ្ឍ សមត្ថភាពរបស់ខ្លួន និងការត្រៀមខ្លួនសម្រាប់ការចាប់យក និងផ្គូផ្គងអាជីពការងារសមស្របផងដែរ។ ស្របពេលនេះដែរការយល់ដឹងទូលំទូលាយ អំពីសុខភាព ជាពិសេសសុខភាពផ្លូវភេទ សុខភាពបន្តពូជ និងសិទ្ធិជាកាតាលីករ មួយដ៏សំខាន់ដើម្បីជួយដល់យុវជន ក្នុងការបង្ការហានិភ័យ សុខភាពផ្លូវភេទដែលអាចកើតមាន ហើយអាចផ្តល់ផលប៉ះពាល់ទៅដល់ការសិក្សា និងអនាគតរបស់ខ្លួន។ បរិបទនៃសង្គមបច្ចុប្បន្ន ជាពិសេសបន្ទាប់ពីការរីករាលដាលនៃជំងឺកូវីដ-១៩ ការកើនឡើង និងរីកចម្រើនយ៉ាងឆាប់រហ័ស​នៃបច្ចេកវិទ្យា ក៏ដូចជាឌីជីថលូបនីយកម្ម និងបរិវត្តកម្មឌីជីថល តម្រូវឱ្យយើងទាំងអស់គ្នា​យកចិត្តទុក​ដាក់បន្ថែមក្នុងការសម្រប និងវិវឌ្ឍខ្លួនឱ្យសមស្របទៅតាមការវិវឌ្ឍនៃ​វិស័យទាំងអស់នេះផងដែរ។

លោកជំទាវ កិត្តិសង្គហបណ្ឌិត ម៉ែន សំអន បានបញ្ជាក់ទៀតថា ក្នុងរយៈពេលជាងពីរទសវត្សរ៍​នៃការអនុវត្តយុទ្ធសាស្ត្រត្រីកោណ យុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍​ជាតិធនធានមនុស្ស និងសុខុមាលភាពប្រជាជន នៅតែបន្តជាអាទិភាពរបស់រាជរដ្ឋាភិបាល។ ប្រាកដណាស់យុវជន គឺជាទំពាំងស្នងឫស្សី ជាអ្នកបន្តវេន និងជាសសរទ្រូងនៃប្រទេសជាតិ។ ដូចនេះរាល់តម្រូវការ ការយល់ឃើញ និងបញ្ហាប្រឈមរបស់យុវជន ពិតជាមានសារសំខាន់ សម្រាប់អ្នកដឹកនាំ ក្នុងការគិតគូរ និងដាក់ចេញនូវទិសដៅ និងគោលនយោបាយ សំដៅជំរុញ និងលើកកម្ពស់ការអភិវឌ្ឍ សុខុមាលភាព និងអនាគតរបស់ពួកគេ។

ជាក់ស្តែង រដ្ឋាភិបាលបានដាក់ចេញនូវគោលនយោបាយជាតិ ស្តីពី “ការអភិវឌ្ឍ យុវជនកម្ពុជា ២០២២-២០២៦” ដែលបានកំណត់ នូវយុទ្ធសាស្រ្ត សំខាន់ៗចំនួន១២ ផងដែរ៕អត្ថបទ រដ្ឋា