ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា មានប្រសាសន៍ថា រាជរដ្ឋាភិបាល សម្រចបញ្ចេញថវិកាសាងសង់ស្ពានមានតម្លៃប្រមាណ ២៣០ លានដុល្លារអាមេរិក (ពីរទៅពីរមក) ដោយឆ្លងកាត់ខេត្តកណ្តាល ព្រៃវែង និងចូលទៅកាន់ខេត្តស្វាយរៀង ក្នុងគម្រោងផ្លូវល្បឿនលឿនភ្នំពេញ-បាវិត ដើម្បីសម្រួលដល់ការចំណាយអ្នកប្រើប្រាស់ផ្លូវល្បឿនលឿន។
សម្តេចតេជោ ហ៊ុន សែន នាយករដ្ឋមន្ត្រី បានមានប្រសសន៍បែបនេះ ក្នុងពេលអញ្ជើញជាអធិបតីពិធីប្រគល់សញ្ញាបត្រដល់និស្សិត នៃវិទ្យាស្ថានជាតិបណ្តុះបណ្តាលបច្ចេកទេស សរុប ចំនួន ៥.៤៥០នាក់ នាព្រឹកថ្ងៃទី២៧ ខែកុម្ភៈ ឆ្នាំ២០២៣ នៅមណ្ឌលសន្និបាត និងពិព័រណ៍អន្តរជាតិជ្រោយចង្វារ។
សម្តេចតេជោ ប្រកាសថា មិនយូរទេកម្ពុជានឹងចាកចេញពីប្រទេសដែលមានកម្រិតការអភិវឌ្ឍតិចតួច ដែលចំណុចនេះសម្តេចតេជោ បែរជាមានការព្រួយបារម្ភទៅវិញទៅមក ដោយសារអត្រាការប្រាក់ដែលកម្ពុជាខ្ចី នឹងលែងជាហិរញ្ញប្បទានសម្បទានទៀតហើយ គឺការប្រាក់ខ្ពស់ជាងមុន។
សម្ដេចតេជោ បានបញ្ជាក់ថា សមិទ្ធផលនេះ គឺកើតចេញសមិទ្ធផលនៃសន្ដិភាព សម្ដេចតេជោ បញ្ជាក់ថា គ្មានការអភិវឌ្ឍណាមួយអាចរស់នៅបានក្រៅដំបូលសន្ដិភាពនោះទេ ដូច្នេះប្រទេសកម្ពុជា ត្រូវរក្សាឱ្យបាននូវសន្ដិភាព និងស្ថេរភាពនយោបាយ ព្រោះគ្មានអ្នកវិនិយោគណាមួយចូលមកវិនិយោគក្នុងប្រទេសដែលមានសង្គ្រាមនោះទេ។
ទាក់ទងនឹងការអភិវឌ្ឍវិស័យហេដ្ឋារចនាសម្ព័ន្ធនេះ សម្ដេចតេជោ បញ្ជាក់ថា កម្ពុជានឹងធ្វើឱ្យផ្លូវរថភ្លើងនៅក្នុងប្រទេសកម្ពុជាក្លាយទៅជាផ្លូវល្បឿនលឿនទាំងអស់ ក្នុងនោះ សម្ដេចក៏បានអំពានាវ និងលើកទឹកចិត្តដល់ប្រទេសនានាចូលរួមជាមួយការអភិវឌ្ឍនៅកម្ពុជាតាមរយៈគម្រោង BOT ពីព្រោះកម្ពុជាមិនចង់ខ្ចីប្រាក់ប្រទេសនានាក្នុងទំធំមួយដ៏ធំធ្វើផ្លូវរថភ្លើងនោះទេ៕អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
