ភ្នំពេញ៖ នៅព្រឹកថ្ងៃទី២៧ ខែកុម្ភៈ ឆ្នាំ២០២៣ រដ្ឋបាលខណ្ឌ៧មករា បានរៀបចំទិវាអនាម័យ​បរិស្ថាន​ជាតិ ដើម្បីបញ្ជ្រាបការយល់ដឹង និងការសម្អាតទីក្រុង ដើម្បីចូលរួមអបអរសាទរទិវាទី​ក្រុងស្អាត​លើកទី១១ ឆ្នាំ២០២៣ ក្រោមប្រធានបទ "ទីក្រុងស្អាត បដិសណ្ឋារកិច្ចល្អ ម្ចាស់ផ្ទះកម្ពុជា ផ្តល់ភាពកក់ក្តៅ" ។

ពិធីនេះដឹកនាំដោយលោក កេត ឧត្តម អភិបាលរងខណ្ឌ៧មករា តំណាងលោក ថេង សុថុល អភិបាល នៃ​គណៈអភិបាល​ខណ្ឌ៧មករា និងមានការចូលរួមពីព្រះសង្ឃ នៃវត្តទាំង៣ លោក-លោកស្រីអភិបាលរង លោកអធិការរង លោកមេបញ្ជាការរង គណៈនាយក លោក-លោកស្រីប្រធាន-អនុប្រធានការិយាល័យ មន្ដ្រីសាលាខណ្ឌ-សង្កាត់ យុវជនសសយក យុវជន​កាយរិទ្ធ យុវជនកាកបាទក្រហមកម្ពុជា និងបុគ្គលិកផ្នែកអនាម័យរបស់ក្រុម​ដឹកជញ្ជូនសំរាម​សរុបចំនួន ២០០នាក់ ។

នាឱកាសនោះ លោកអភិបាលរងខណ្ឌ៧មករា បានផ្សព្វផ្សាយនូវខ្លឹមសារ ​នៃ​សារលិខិតចូលរួម​អបអរសាទរទិវាទីក្រុងស្អាតលើកទី១១ ឆ្នាំ២០២៣ ​ ក្រោមប្រធានបទ "ទីក្រុងស្អាត​បដិសណ្ឋារកិច្ច​ល្អ ម្ចាស់ផ្ទះកម្ពុជា ផ្តល់ភាពកក់ក្តៅ"របស់​សម្ដេចតេជោ ហ៊ុន សែន នាយករដ្ឋមន្ដ្រី។

ការ​ប្រារព្ធ​ទិវាទីក្រុងស្អាតលើកទី១១ ឆ្នាំ២០២៣នេះឡើង​ គឺដើម្បីជំរុញដល់ភាគីពាក់ព័ន្ធទាំងអស់ បន្ដ​សហការ​ចូលរួមគាំទ្រឧបត្ថម្ភ ​និងអនុវត្តរាល់យុទ្ធនាការនានាដែលត្រូបានដាក់ចេញ​ដោយ​រាជរាដ្ឋាភិបាល​ ដើម្បីគាំទ្រចលនាប្រឡង​ប្រណាំងទីក្រុងស្អាត ​ដោយធ្វើយ៉ាងណាឲ្យកម្ពុជា​ក្លាយ​ជាគោលដៅទេសចរណ៍ប្រកបដោយគុណភាព ចីរភាព ភាពស្អាត ​និងបៃតង និង​ភាព​ទាក់ទាញ​ខ្ពស់សម្រាប់ភ្ញៀវទេសចរណ៍ជាតិ និងអន្ដរជាតិ ​ស័ក្ដិសមនឹងកិត្តិនាម “កម្ពុជា ៖ ព្រះរាជាណាចក្រ​អច្ឆរិយៈផ្ដល់ភាពកក់ក្ដៅ “៕ អត្ថបទ៖ កុម្ភៈ