ភ្នំពេញ៖ ក្រសួងទេសចរណ៍នៅថ្ងៃទី២៧ ខែកុម្ភៈ បានបើកការប្រារព្ធទិវាជាតិទីក្រុងស្អាត ២៧ ខែកុម្ភៈ លើកទី១១ អមដោយការប្រគល់ជ័យលាភីទីក្រុងស្អាតលើកទី៣ ខណៈទីក្រុងស្អាត​សុពលភាពឆ្នាំ២០២២-២០២៥នេះ មានទីក្រុងស្អាតចំនួន៧ ទទួលបានជ័យលាភីផ្ការំដួលបីទង ក្នុងនោះ​ក្រុងព្រះសីហនុ ខេត្តព្រះសីហនុ ​ទទួលបានផ្ការំដួលបីទង ​មានលំដាប់ពិន្ទុខ្ពស់​ជាងគេ​បង្អស់។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងថា ការប្រឡងប្រណាំងទីក្រុងស្អាតថ្នាក់ជាតិ គឺជា​កាតព្វកិច្ច​របស់រដ្ឋបាលខេត្តរាជធានីក្រុងខ័ណ្ឌ ​ដែលត្រូវចូលរួម​ប្រឡង​ប្រណាំងជាចាំបាច់ ហើយ​ក៏ត្រូវមានការចូលរួម​ផងដែរពីពលរដ្ឋ ទេសចរ និងភាគីពាក់ព័ន្ធ​ ដើម្បីអភិវឌ្ឍន៍​ក្រុង ខ័ណ្ឌ​ឲ្យមានបរិស្ថានស្អាត អនាម័យស្អាត ​គ្មានសំរាម​រឹង រាវ​ បៃតង មាន​ភាពទាក់ទាញ​ទេសចរជាតិ​អន្តរជាតិទៅទស្សនាកម្សាន្តប្រកបដោយផាសុកភាព​ និង​សុវត្ថិភាព សណ្តាប់ធ្នាប់ល្អ។

ឯកឧត្តម រដ្ឋមន្ត្រីក្រសួងបរិស្ថាន ថ្លែងថា ​ចលនាប្រឡងប្រណាំងទីក្រុងស្អាតនេះ គឺជំរុញ​ឲ្យ​ទីក្រុង​របស់​យើងស្អាតទាំងអស់គ្នាទាក់ទាញភ្ញៀវទេសចរទៅទស្សនា ហើយថ្នាក់ដឹកនាំអាជ្ញាធរ​មូលដ្ឋាន​គ្រប់លំដាប់ថ្នាក់ ​គឺជាអ្នកដើរតួខ្លាំងក្នុង​សកម្មភាពអភិវឌ្ឍន៍​ទីក្រុងស្អាត និង​ទាមទារ​មានការចូលរួមពីពលរដ្ឋនៅក្នុងមូលដ្ឋានខ្លួន។

ឯកឧត្តម ណេប សាមុត អគ្គលេខាធិការនៃគណៈកម្មាធិការជាតិវាយតម្លៃទីក្រុងស្អាត នៃក្រសួង​ទេសចរណ៍ ថ្លែងថា នៅក្នុងដំណើរការប្រឡងប្រណាំងទីក្រុងស្អាត ​សុពលភាពឆ្នាំ២០២២ ដល់​ឆ្នាំ២០២៥នេះ មានទីក្រុងបានជាប់ជ័យលាភី​ទីក្រុងជាងគេបំផុត​របស់កម្ពុជាចំនួន៧ ទទួល​បានផ្ការំដួលបីទង ក្នុងនោះ​លំដាប់ទី១ ក្រុងព្រះសីហនុ ទី២ ក្រុងបាត់ដំបង ​ទី៣ក្រុងសៀមរាប ទី៤ខ័ណ្ឌដូនពេញ ទី៥ក្រុងកែប ទី៦ក្រុងកំពត និងទី៧ក្រុងកំពង់ចាម។

ឯកឧត្តម បន្តថា ឆ្នៃនេះទីក្រុងស្អាតទទួលផ្ការំដួល​ពីរទង​ មាន ១៧ ក្រុងខ័ណ្ឌ ទីក្រុងស្អាត​ទទួលផ្កា​រំដួល១ទង មានចំនួន ១៤ ក្រុងខ័ណ្ឌ ​និងទីក្រុងប្រឡងមិនទទួលបានផ្ការំដួលមានចំនួន ៣៕

អត្ថបទ៖ ស៊ុម សុខជា