ភ្នំពេញ៖ ឯកឧត្តមបណ្ឌិត ហ៊ុន ម៉ាណែត បានលើកឡើងថា វេទិកាសហព័ន្ធសហគ្រិនកម្ពុជា ២០២៣នេះ គឺជាវេទិកាសហគ្រិនដំបូង និងធំជាងគេនៅកម្ពុជា ខណៈវេទិកានេះ មានសមាគម​សហគ្រិន​ជាច្រើនចូលរួម។ ការលើកឡើងខាងលើនេះ គ្រាដែលឯកឧត្តម ហ៊ុន ម៉ាណែត បានអញ្ជើញជាអធិបតីក្នុងវេទិកា​សហព័ន្ធ​សហគ្រិនកម្ពុជា ២០២៣ កាលពីថ្ងៃទី២៦ខែកុម្ភៈ ឆ្នាំ២០២៣។

នៅក្នុងឱកាសនោះ ឯកឧត្តមបណ្ឌិត បានកោតសរសើរចំពោះសមាគមសហគ្រិនស្ត្រីកម្ពុជា (CEWA), សមាគមម្ចាស់អាជីវកម្មជាដៃគូ (BNI Cambodia), សមាគមសហគ្រិនវ័យក្មេងកម្ពុជា (YEAC), សភាយុវពាណិជ្ជករអន្តរជាតិកម្ពុជា (JCI Cambodia), សមាគមទេសចរណ៍កម្ពុជា (CATA), សមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) និងសមាគមមិត្តយើង ដែលបាន​ផ្តួចផ្តើម និងសហការគ្នាក្នុងការរៀបចំវេទិកាសហព័ន្ធសហគ្រិនកម្ពុជា២០២៣ ដ៏សំខាន់នេះឡើង។

ឯកឧត្តមបណ្ឌិត ហ៊ុន ម៉ាណែត​ បានថ្លែងបន្តថា វេទិកាសហព័ន្ធសហគ្រិនកម្ពុជា ​២០២៣នេះ គឺជា​វេទិកាសហគ្រិនដំបូង​ និងធំជាងគេនៅកម្ពុជា ​ដោយមានការចូលរួមពីសហគ្រិនពីគ្រប់វិស័យនិង​គ្រប់​ទំហំអាជីវកម្ម ដែល​បាន​ញ៉ាំង​ឱ្យ​វេទិកានេះ​មានភាព​មហោឡារិក ​និងបានបង្កជាបរិយា​កាស​អំណោយ​ផលសម្រាប់ការបង្កើត ​និងពង្រីក​បណ្តាញ​នៃ​ការទាក់ទងគ្នា ក៏ដូចជាការផ្លាស់ប្តូរ​មតិយោបល់ ​និងទស្សនាទានថ្មីៗ ​ដើម្បីជាប្រយោជន៍សម្រាប់សហគ្រិន ក្នុងការជំរុញបន្ថែម​ដល់​អាជីវកម្ម ដែលកំពុងដំណើរការ។

ឯកឧត្តមបណ្ឌិត ​បានថ្លែងបន្តទៀតថា ​យោងតាមបទពិសោធន៍ នៃការផ្តល់​យោបល់​លើកិច្ចការមួយ​ចំនួន ពាក់ព័ន្ធនឹងភាពជាដៃគូរវាងរដ្ឋ ​និងឯកជន ​គឺតួអង្គទាំងពីរអាចរួមសហការគ្នា ប្រកប​ដោយ​ភាពយោគយល់ ​និងការទុកចិត្តខ្ពស់ ​ក្នុងការអនុវត្តគោលនយោបាយនានា​របស់រាជរដ្ឋាភិបាល ដែល​អាចរួមចំណែកយ៉ាងមានប្រសិទ្ធភាព ​ក្នុងការដោះស្រាយនូវរាល់បញ្ហាប្រឈមនានា បាន​ដោយភាពរលូន។ ក្នុងន័យនេះ ជាទស្សនៈថ្មីមួយ​ គឺថាវិស័យឯកជនអាចមានច្រកចេញចូលតែមួយ និង​មានភាពជាតំណាងច្បាស់លាស់ពីវិស័យ ឬផ្នែកនីមួយៗ ​ដើម្បីរួមសហការជាមួយរាជរដ្ឋាភិបាល សំដៅលើកកម្ពស់វិស័យឧស្សាហកម្មនៅកម្ពុជា ជាពិសេស​ មីក្រូសហគ្រាស​ និងសហគ្រាសធុនតូច និងមធ្យម។

ជាទស្សនៈផ្ទាល់ខ្លួនឯកឧត្តមបណ្ឌិត ហ៊ុន ម៉ាណែត បានលើកឡើងថា ដូចទៅនឹងវិស័យ​ឧស្សាហកម្ម​ផងដែរ,វិស័យកសិកម្ម ក៏ជាមូលដ្ឋានគាំទ្រមួយដ៏សំខាន់​ដល់វិស័យផ្សេងៗទៀត ក្នុង​ចរន្តសេដ្ឋកិច្ចជាតិ​ទាំងមូល ​ជាពិសេសការចូលរួមបង្កើត​ឲ្យ​មាន​សេដ្ឋកិច្ច​មាត្រដ្ឋាន​ តាមរយៈគំនិត​ផ្ដួចផ្ដើម​នៃ ​«តំបន់មួយ វិស័យមួយ»។

តាមរយះទស្សនៈនេះ,ជាការចាំបាច់សម្រាប់កម្ពុជាពិនិត្យ ​និង​សិក្សាអំពីសក្តានុពល​ នៃតំបន់​នីមួយៗ​នៅ​ក្នុង​ក្របខណ្ឌទូទាំងប្រទេស ​ដើម្បីកំណត់អំពី​ប្រភេទ​វិស័យ​អាទិភាព និងរៀបចំ​ការ​លើកទឹកចិត្ត ​និង​វិនិយោគ​លើប្រព័ន្ធហេដ្ឋា​រចនា​សម្ព័ន្ធគាំទ្រ​ ធ្វើយ៉ាងណាឲ្យតំបន់​នោះមាន​ភាព​ទាក់ទាញ និង​សមស្រប​សម្រាប់​ការវិនិយោគ​ និងធុរកិច្ច​ ប្រកបដោយផលិតភាព និងភាព​ប្រកួតប្រជែង​ខ្ពស់នៅលើទីផ្សារទាំងក្នុងស្រុក និងអន្តរជាតិ៕