សៀមរាប៖ អាជ្ញាធរជាតិអប្សរា បានធ្វើពិធីក្រុងពាលីនៅខាងមុខអង្គរវត្ត បួងសួងសុំសេចក្ដីសុខ​សម្រាប់ការរៀបចំ បើកការដ្ឋានកសាងភូមិបេតិកភណ្ឌ និងស្តង់ពិព័រណ៍ នៅព្រឹកថ្ងៃទី២៧ ខែកុម្ភៈ នេះ ដើម្បីអបអរព្រឹត្តិការណ៍​អង្គរសង្រ្កាន្ត ​ខួប១០ឆ្នាំ នៅថ្ងៃបុណ្យចូលឆ្នាំថ្មីប្រពៃណីជាតិ​ខ្មែរ​ខាងមុខនេះ ។

លោក ទិន ទីណា អនុប្រធាននាយកដ្ឋាន​បណ្ដុះបណ្ដាល​ស្រាវជ្រាវ ​និងផ្សព្វផ្សាយ ​នៃអាជ្ញាធរ ជាតិអប្សរា បានឱ្យដឹងថា សម្រាប់បុណ្យចូលឆ្នាំថ្មី ប្រពៃណីជាតិខ្មែរ ​ដែលនឹងមកដល់នៅ​ខែមេសា​ខាងមុខ គឺសហភាពសហព័ន្ធយុវជនកម្ពុជា ​(សសយក) ​នឹងរៀបចំព្រឹត្តិការណ៍អង្គរសង្ក្រាន្ត រំលឹកខួបទី១០ឆ្នាំ ​ក្រោមប្រធានបទ (ក្តីស្រមៃ និងក្តីសង្ឃឹម) ។ ជាមួយគ្នានេះដែរ​ សសយក ក៏បានស្នើឱ្យអាជ្ញាធរជាតិអប្សរា ​ជួយរៀបចំកម្មវិធីមួយឈ្មោះថា ​ភូមិបេតិកភណ្ឌវប្បធម៌ ។

លោក បានបញ្ជាក់ទៀតថា ​ភូមិបេតិកភណ្ឌ ដែលអាជ្ញាធរអប្សរាកំពុងរៀបចំកសាងនេះ នឹងដាក់ បង្ហាញអំពីបេតិកភណ្ឌរូបិយ និងអរូបិយ ដូចជា​បង្ហាញ​ឧបករណ៍បច្ចេកទេស ​នៃការរំលីងថ្ម ដើម្បី​យកមក ផ្គុំកសាងប្រាសាទ​ ដែលឃើញមាននៅតាមចម្លាក់របស់ប្រាសាទ​បាយ័ន និង​ការបង្ហាញ​អំពី​បច្ចេកទេស នៃការជួសជុលប្រាសាទទឹក។ ​ចំណែកឯ​បេតិកភណ្ឌ​អរូបិយវិញ គឺនឹង​មានបង្ហាញ​អំពី​ការចារសាស្ត្រាស្លឹករឹត ដោយគ្រោងនឹងអញ្ជើញស្ត្រីឈ្មោះ ភឿន ផាវី ជាអ្នកចេះចារសាស្ត្រា ឱ្យមក​បង្រៀនដល់អ្នកមកទស្សនា ឱ្យបានយល់ដឹងផងដែរ។ វប្បធម៌អរូបិយមួយទៀត​ គឺអាជ្ញាធរអប្សរា នឹងបង្ហាញអំពីសិល្បៈ នៃការសូន ភាជន៍ ដោយនឹងបើកឱ្យអ្នកចូលរួមទស្សនា ​អាចរៀនសូត្របាន​ពី​អ្នក​ជំនាញផងដែរ។ ​ចំពោះវប្បធម៌ អរូបិយមួយទៀត​ ក៏មានបង្ហាញអំពីចម្លាក់ស្បែកតូច​ ស្បែកធំ ​ហើយក្រៅពីនោះ​ គឺមាន​លេងល្បែង​ប្រជាប្រិយ ព្រមទាំងមានក្រុមភ្លេងកន្រ្ទឹម ​របស់អ្នកភូមិត្បែង ដើម្បីកំដរ ​និងរាំលេងកម្សាន្ត។

ចំណែកនៅផ្នែកខាងស្ពានហាលឯណោះវិញ ​ក៏នឹងមានរៀបចំស្ដង់ ​ដើម្បីរៀបចំដាក់បង្ហាញអំពី ផលិតផល ​នៃការងារ រយៈពេល៣០ឆ្នាំ ​របស់​អាជ្ញាធរអប្សរាផងដែរ។ ​ការ​ដាក់បង្ហាញនូវបេតិកភណ្ឌ វប្បធម៌ ដើម្បី​ដាស់ស្មារតី ក៏ដូចជាបំផុសគំនិតអ្នកទៅទស្សនាសង្ក្រាន្ត ​ឱ្យថែ​រក្សាវប្បធម៌ដូនតាខ្មែរ។

ព្រឹត្ដិការណ៍អង្គរសង្ក្រាន្ដឆ្នាំ២០២៣​ នឹងរៀបចំចំនួន៦ទីតាំង​ កម្មវិធីកម្សាន្ដ ​ចំនួន៤៤​ ដែលនឹង ត្រូវ​រៀបចំ​ឡើងនៅតំបន់​រមណីយដ្ឋាន​អង្គរ និងក្នុងក្រុងសៀមរាប។​ ខួប១០ឆ្នាំ នៃអង្គរ​សង្ក្រាន្ត​ឆ្នាំនេះ មានលក្ខណៈពិសេសជាងឆ្នាំមុនៗ​ ដែលព្រឹត្ដិការណ៍​ដ៏​អស្ចារ្យមួយនេះ អាចនឹង​បំបែក​ឯតទគ្គកម្ម​ពិភពលោក​ លើកម្មវិធីចំនួនពីរ ៕ អត្ថបទ៖ ឈិត សាវី