ភ្នំពេញ៖ លោកជំទាវ កែវ ចន្ទ័ស៊ុនណារី អនុប្រធាន​ក្រុមការងារចុះជួយខណ្ឌជ្រោយចង្វា មាន​ប្រសាសន៍ថា អាជ្ញាធរ ភូមិ ឃុំ សង្កាត់ គឺជា​សេណាធិការបស់រាជរដ្ឋាភិបាល ដូច្នេះ​អាជ្ញាធរត្រូវ​ប្រកាន់ខ្ជាប់​នូវ​ឥរិយាបថល្អ បន្តផ្តល់សេវា​សាធារណៈឱ្យ​តែប្រសើរជូនដល់ប្រជាពលរដ្ឋ​ដើម្បី ​ទទួល​បាន​ការទុកចិត្ត ​និងក្តីស្រលាញ់​ពលរដ្ឋចំពោះថ្នាក់នាំ ជាពិសេសគាំទ្រគណបក្សប្រជាជនកម្ពុជា។

លោកជំទាវ កែវ ចន្ទ័ស៊ុនណារី មានប្រសាសន៍បែបនេះ ​នៅ​ក្នុងឱកាសចុះផ្សព្វផ្សាយ​ខ្លឹមសារ​មហាសន្និបាតវិសាមញ្ញ​តំណាងទូទាំង​ប្រទេស​របស់គណបក្សប្រជាជនកម្ពុជា​ (២៨-២៩ ខែមកររា ឆ្នាំ២០២៣) ​នៅមូលដ្ឋានសង្កាត់កោះដាច់ ខណ្ឌជ្រោយចង្វា រាជធានីភ្នំពេញ។

លោកជំទាវ ​មានប្រសាសន៍បន្តថា ក្រោមការដឹកនាំដ៏ខ្ពង់ខ្ពស់របស់​សម្តេចតេជោ ហ៊ុន សែន នាយករដ្ឋ​មន្ត្រី ​ប្រទេស​មានសន្តិភាព ​ស្ថេរភាពនយោបាយ​ និងការអភិវឌ្ឍ​ឥតឈប់ឈរ។

លោកជំទាវ ក៏បានលើកឡើងដែរថា សូមឱ្យប្រជាពលរដ្ឋកុំជឿលើការឃោសនាបោក​បញ្ឆោត​របស់ជនអគតិ ដែលតែងតែ​បំផ្លើសបំផ្លៃ លាបពណ៌​គ្មានការពិត ព្រោះបុគ្គលទាំងនោះមិនដែល​បានធ្វើអ្វីអោយជាប្រយោជន៍សម្រាប់ជាតិ និងប្រជាជននោះឡើយ ផ្ទុយទៅវិញពួកគេបានត្រឹម​តែធ្វើ​នយោបាយបែប​កុហកបោកប្រាស់​ គិតតែពីប្រយោជន៍ផ្ទាល់ខ្លួន ​ឃ្លានអំណាចរហូត​ប្រព្រឹត្តិអំពើ​ខុសច្បាប់​រត់ចោលស្រុកម្តងហើយ ម្តងទៀត។

លោកជំទាវអនុប្រធានក្រុមការងារ ​ក៏បាន​អំពាវនាវ​ឱ្យ​ប្រជាពលរដ្ឋថែរក្សាសុខភាព ​ការពារការ​ឆ្លង​រាតត្បាត​ជំងឺកូវីដ១៩​ និង​ជំងឺផ្តាសាយបក្សី ​ដែលទើបតែផ្ទុះឡើង​ជាថ្មីនៅ​ខេត្តព្រៃវែង ដូច្នេះ​សូម​ប្រជាពលរដ្ឋបញ្ឈប់​ការ​ប៉ះពាល់សត្វបក្សីឈឺ ឬងាប់ និង​រាយការណ៍​បន្ទាន់​ទៅកាន់​អាជ្ញាធរ​ដែល​នៅជិតផ្ទះបំផុត​ជៀសវាង​គ្រោះថ្នាក់ដល់អាយុជីវិត៕ អត្ថបទ៖ សូដាវណ្ណ