ភ្នំពេញ ៖ នាយឧត្តមសេនីយ៍ សន្តិ​បណ្ឌិត នេត សាវឿន អគ្គស្នងការនគរបាលជាតិ បានក្រើនរំលឹក និង​ធ្វើ​ការ​ណែនាំ​ ល់នគរបាលគ្រប់អង្គភាពទាំងអស់ត្រូវធ្វើការត្រៀមខ្លួន ក្នុងកិច្ចការពារព្រឹត្តិការណ៍ស៊ីហ្គេម និង​អាស៊ានប៉ារ៉ាហ្គេម ​ខណៈព្រឹត្តិការណ៍នេះនៅសល់តែ៦៧ថ្ងៃទៀតនឹងចាប់ផ្តើមហើយនោះ។

ថ្លែងនៅក្នុងឱកាសអញ្ជើញប្រកាសចូលកាន់តំណែងជាផ្លូវការ អគ្គស្នងការរងនគរបាលជាតិ មួយរូប និង​ប្រធាននាយកដ្ឋានវិទ្យុទាក់ទង នៃអគ្គស្នងការដ្ឋាននគរបាលជាតិ នារសៀលថ្ងៃទី២៧ ខែកុម្ភៈ ឆ្នាំ ២០២៣នេះ ឯកឧត្តមនាយឧត្តមសេនីយ៍ នេត សាវឿន បានលើកឡើងថា នៅក្នុងឆ្នាំ២០២៣នេះគឺមាន ព្រឹត្តិការណ៍​ដែល​ត្រូវ​ថែរក្សា និងរៀបចំសណ្តាប់ធ្នាប់ឲ្យបានល្អនោះ គឺព្រឹត្តិការណ៍ស៊ីហ្គេម និងអាស៊ាន ប៉ារ៉ាហ្គេម ដែលកម្ពុជា​យើងធ្វើ​ជាម្ចាស់ផ្ទះ និងយុទ្ធនាការឃោសនា និងបោះឆ្នោតអាណត្តិទី៧ជាដើម។

នាយឧត្តមសេនីយ៍ បានថ្លែងបន្តទៀតថា «នៅក្នុងឆ្នាំ២០២៣នេះ កម្លាំងសមត្ថកិច្ចកម្ពុជា និយាយជារួម និងនិយាយ​ដោយ​ឡែក កងកម្លាំងនគរបាលជាតិ មានភារកិច្ចដ៏សំខាន់ជាច្រើនទៀត ដូចជាការប្រកួតកីឡាស៊ីហ្គេម និង​អាស៊ានប៉ារ៉ាហ្គេម និងការបោះឆ្នោតជ្រើសតាំងតំណាងរាស្ដ្រ នីតិកាលទី៧ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ។ ដូច្នេះកងកម្លាំងទាំងអស់ត្រូវត្រៀមខ្លួនទទួលបទបញ្ជាតាមផែនការរៀងៗ ខ្លួនដែល​ត្រូវបានកំណត់»។

ជាមួយគ្នានោះដែរ ឯកឧត្តមនាយឧត្តមសេនីយ៍ នេត សាវឿន ក៏បានក្រើនរំលឹកដល់នគរបាល ទាំងអស់ត្រូវ​ខិតខំ​ណែនាំ និងរឹតបណ្តឹងនូវច្បាប់ចរាចរណ៍ឲ្យបានខ្ជាប់ខ្ជួនបន្ថែមទៀត ខណៈបញ្ហាចរាចរណ៍​នេះ​នៅ​តែ​មានការ​ព្រួយ​បារម្ភខ្ពស់ ដោយសារតែវាបានបន្តឆក់យកជីវិតមនុស្សស្ទើតែរៀងរាល់ថ្ងៃ ដោយមធ្យមបានធ្វើឲ្យ​មនុស្សស្លាប់​ពីបួនទៅ​ប្រាំនាក់ និងរង់របួសជិត១០នាក់។

យ៉ាងណាក៏ដោយនៅក្នុងឱកាសនោះដែរឯកឧត្តមអគ្គស្នងការនគរបាលជាតិ ក៏បានកោតសរសើរ លទ្ធផលដ៏ធំធេង ចំពោះកងកម្លាំងនគរបាលគ្រប់ប្រភេទ ដែលរក្សាបានសន្ដិភាព ស្ថេរភាព សុវត្ថិភាពសង្គម គ្មានអំពើភេរវកម្ម និងក៏សម្រេចបានកិច្ចការពារកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ព្រមទាំងការបោះឆ្នោត​ក្រុមប្រឹក្សា​ឃុំសង្កាត់​កាលពីឆ្នាំ២០២២កន្លងទៅផងដែរ ៕ ដោយ ៖ បាន ចក់