ភ្នំពេញ ÷ ថ្លែងប្រសាសន៍ក្នុងឱកាសពិធីបិទសិក្ខាសាលាស្តីពីការផ្តល់ភាពអង់អាចដល់យុវជន៖ ការអប់រំ ការងារ និងសិទ្ធិ និងសុខភាព ឯកឧត្តម ហ៊ុន ម៉ានី ប្រធានគណៈកម្មការទី៧ និងជាប្រធានក្រុមសមាជិកសភាវ័យក្មេងនៃព្រះរាជាណាចក្រកម្ពុជា បានគូសបញ្ជាក់ពីសារៈសំខាន់នៃការផ្សារភ្ជាប់ការចូលរួមរបស់ប្រជាជនវ័យក្មេងក្នុងដំណើរការនៃការអភិវឌ្ឍសង្គម សេដ្ឋកិច្ចជាតិ ទាំងក្នុងក្របខណ្ឌការកសាងសហគមន៍ និងការចូលរួមអនុវត្តគោលនយោបាយរបស់រាជរដ្ឋាភិបាល។

ជាមួយគ្នា ឯកឧត្តម ក៏បានរំលេចពីភាពចាំបាច់ក្នុងការបន្តពង្រឹងកិច្ចសហប្រតិបត្តិការរួបគ្នារវាងស្ថាប័ននីតិប្រតិបត្តិ និងនីតិបញ្ញាត្តិ ក៏ដូចជាគ្រប់ភាគីពាក់ព័ន្ធ បន្ថែមលើអ្វីដែលបានគិតគូរ និងអនុវត្តកន្លងមក ជាពិសេសក្នុងការជំរុញ និងបង្កើតបរិយាកាសអំណោយផលដើម្បីអោយប្រជាជនវ័យក្មេង អាចអភិវឌ្ឍសមត្ថភាព ពង្រីកសក្តានុពលរបស់ខ្លួន និងត្រៀមខ្លួនរួចស្រេចក្នុងការរួមចំណែកជាវិជ្ជមានជាមួយគ្រួសារ សហគមន៍ និងប្រទេសជាតិរៀងៗខ្លួន។

សូមជម្រាបជូនថា សិក្ខាសាលាស្តីពីការផ្តល់ភាពអង់អាចដល់យុវជន៖ ការអប់រំ ការងារ និងសិទ្ធិ និងសុខភាព បានបញ្ចប់ទៅដោយរលូនជាមួយនឹងការពិភាក្សារួមគ្នា ផ្តល់ជាធាតុចូលយ៉ាងផុសផុលពីសំណាក់សមាជិករដ្ឋសភា និងព្រឹទ្ធសភានៃព្រះរាជាណាចក្រកម្ពុជា គណៈប្រតិភូ និងសមាជិកនៃវេទិកាសភាអាស៊ីប៉ាស៊ីហ្វិក (AFPPD) តំណាងក្រសួង និងស្ថាប័នពាក់ព័ន្ធ វាគ្មិនជំនាញ ដែលជាអង្គសិក្ខាកាមនៃសិក្ខាសាលាដ៏មានសារៈសំខាន់នេះ៕ ដោយ ÷ ដារា