រុស្ស៊ី៖ វិមានក្រឹមឡាំងកាលពីថ្ងៃចន្ទបានទទួលស្គាល់សំណើ សូមឲ្យមានការដោះស្រាយខាងនយោបាយរបស់ចិននៅក្នុងប្រទេសអ៊ុយក្រែន ប៉ុន្តែបាននិយាយថា លក្ខខណ្ឌនានាសម្រាប់ដំណោះស្រាយដោយសន្តិវិធីលើជម្លោះនេះ មិនទាន់ដាក់ឲ្យអនុវត្តន៍នៅពេលនេះ។
អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃចន្ទថា យើងបានយកចិត្តទុកដាក់ខ្លាំងចំពោះផែនការរបស់មិត្តចិនយើង នៅពេលនេះយើងមើលមិនឃើញលក្ខខណ្ឌណាមួយ ដែលចាំបាច់ក្នុងការនាំរឿងទាំងមូលនេះឆ្ពោះទៅកាន់សន្តិភាពទេ។ ប្រទេសចិនបានព្យាយាមរក្សាជំហរជាភាគីអព្យាក្រឹត្យក្នុងជម្លោះនេះ ខណៈដែលនៅតែបន្តរក្សាទំនាក់ទំនងជិតស្និទ្ធជាយុទ្ធសាស្ត្រជាមួយរុស្ស៊ី។ ទីក្រុងប៉េកាំងកាលពីសប្ដាហ៍មុនបានអំពាវនាវឲ្យរុស្ស៊ី-អ៊ុយក្រែនវិលចូលតុចរចា ខណៈខ្លួនបានបញ្ចេញផែនការ ១២ចំណុចដើម្បីបញ្ចប់សង្គ្រាមនៅអ៊ុយក្រែន ដែលបូករួមទាំងការគោរពដល់អធិបតេយ្យភាពរបស់ប្រទេសទាំងឡាយ។
ក្រសួងការបរទេសរុស្ស៊ីបានថ្លែងអំណគុណកិច្ចខិតខំប្រឹងប្រែងរបស់ប្រទេសចិន ប៉ុន្តែបាននិយាយថា រាល់ដំណោះស្រាយណាមួយក្នុងជម្លោះនេះ ត្រូវតែទទួលស្គាល់ការគ្រប់គ្រងរបស់រុស្ស៊ីលើតំបន់ចំនួន៤ របស់អ៊ុយក្រែននោះគឺតំបន់ Donetsk, Luhansk, Zaporizhzhia និង Kherson ដែលខ្លួនបានដាក់ចូលក្នុងឧបសម្ព័ន្ធរួចទៅហើយ។ ការចេញផ្សាយសំណើនេះមានឡើង ក្រោយការចោទប្រកាន់ពីលោកខាងលិច និងអាមេរិកថា ចិនកំពុងពិចារណាផ្ដល់អាវុធឲ្យរុស្ស៊ី ដែលចិនបានអះអាងថាជារឿងគ្មានមូលដ្ឋាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
