​​ស្នូកឃ័រ​៖ ​ជើងឯក​ស្នូកឃ័រ​ពិភពលោក ៣សម័យ Mark Selby បាន​បន្ត​ដំណើរ​ស្វែង​ជើងឯក​លើក​ទី៤ របស់​ខ្លួន​ក្រោយ​ជ័យជំនះ​លើ Mark Allen ១៣-៧ហ្វ្រេ​ម​។ ​កីឡាករ​វ័យ ៣៧ឆ្នាំ​រូបនេះ​បាន​នាំមុខ​លើ​កីឡាករ​អៀក​ឡង់​ខាងជើង Mark Allen ៩-៦ហ្វ្រេ​ម​ត្រឹម​ដំណាក់កាល​ដំបូង មុន​ពេលដែល​ឈានចូល​ដំណាក់កាល​ទី២ Mark Selby ចាប់ផ្តើម​ដោយ​បន្ត​នាំមុខ ១១-៧ហ្វ្រេ​ម​។

​​Mark Selby ដែល​គេ​ស្គាល់​ថា ​ជា​គូប្រកួត​ស្វិតស្វាញ​ជាមួយ Ronnie O’Sullivan នោះបាន​យក​ ២​ហ្វ្រេ​ម​បន្ទាប់ សរុប​លទ្ធផល ១៣-៧ហ្វ្រេ​ម​ដើម្បី​ឡើង​វគ្គ ៨នាក់​ចុងក្រោយ​ ដោយ​នឹងត្រូវ​ជួប​ជាមួយ​កីឡាករ​ជើងចាស់​ជើងឯក​ពិភពលោក ៣សម័យ Mark Williams​។ ​Mark Selby នឹងមិន​អាច​ជួប Ronnie O’Sullivan ទៀតឡើយ​ ដោយ​ជើងឯក​ពិភពលោក ៧សម័យ​រូបនេះ​បាន​ធ្លាក់​ត្រឹម​ជុំ​ទី២ ក្រោម​ស្នាដៃ​កីឡាករ​ស្កុ​ត​ឡេ​ន Anthony McGill​។ ​​ងាក​មក​កីឡាករ​លំ​ដាប់​លេខ៧ Shaun Murphy ក៏បាន​កក់​កៅអី​នៅ​វគ្គ ៨នាក់​ចុងក្រោយ​ដែរ​បន្ទាប់ពី​ជ័យជំនះ លើ​ជើងឯក Masters កីឡាករ​ចិន Yan Bingtao​។ ​ជើងឯក​ពិភពលោក​ឆ្នាំ២០០៥ Shaun Murphy បាន​យកឈ្នះ Yan Bigntao ​លទ្ធផល ១៣-៧ហ្វ្រេ​ម​ផងដែរ តែ Murphy នឹងត្រូវ​ធ្វើការ​ងារ​ធ្ងន់​ដោយ​នឹងត្រូវ​ជួប​ជាមួយ​កីឡា​ករលេខ ១ ពិភពលោក Judd Trump នៅ​វគ្គ​បន្ត​។​

កីឡាករ​វ័យ ៣៨ឆ្នាំ Shaun Murphy បាន​ខកខាន​ឡើងមក​ដ​លវគ្គ ៨នាក់​ចុងក្រោយ​តាំងពី​ឡើងដល់​វគ្គ​ពាក់កណ្តាល​ផ្តាច់ព្រ័ត្រ​ម្តង​នៅ​ឆ្នាំ២០១៥​។​ ​គូប្រកួត​វគ្គ ៨នាក់​ចុង​ក្រោយនេះ​ផ្សេងទៀត​មាន​៖ Anthony McGill ដែល​យកឈ្នះ Ronnie O’Sullivan នោះ​នឹងត្រូវ​ជួប​ជាមួយ Stuart Bingham ដែល​ទំលាក់ Jamie Jones, កីឡាករ​អូស្ត្រាលី Neil Robertson ដែល​យកឈ្នះ Jack Liswoski​ ជួប​ជាមួយ​កីឡាករ​អង់គ្លេស Kyren Wilson ដែល​យកឈ្នះ Barry Hawkins៕

​អត្ថបទ​៖​នាង សុភា​វុ​ធ