រុស្ស៊ី៖ ក្រសួងការពារជាតិរុស្ស៊ីបាននិយាយកាលពីថ្ងៃចន្ទថា សមយុទ្ធកងទ័ពជើងទឹករួមគ្នាធ្វើឡើងដោយនាវារុស្ស៊ី ចិន និងអាហ្វ្រិកខាងត្បូងបានដល់ទីបញ្ចប់ហើយ។ សមយុទ្ធនៅមហាសមុទ្រឥណ្ឌាដែលមានឈ្មោះកូដ Mosi II បានធ្វើឱ្យមានការភ្ញាក់ផ្អើលក្នុងចំណោមអ្នកការទូតប្រទេសលោកខាងលិច និងមានការរិះគន់ក្នុងតំបន់មួយចំនួន។
ប្រទេសអាហ្វ្រិកខាងត្បូងនិយាយថា ហ្គេមសង្គ្រាមដែលបានចាប់ផ្តើមកាលពីថ្ងៃទី១៧ ខែកុម្ភៈគឺជា «ទម្លាប់»។ យោងតាមក្រសួងការពារជាតិរុស្ស៊ីបានឲ្យដឹងថា ការហ្វឹកហ្វឺននេះគឺផ្អែកលើការបង្កើតកងកម្លាំងកងទ័ពជើងទឹកចម្រុះជាតិសាសន៍នៅក្នុងតំបន់ដែលបានកំណត់ និងសមយុទ្ធយុទ្ធសាស្ត្ររួមគ្នា។ ការបាញ់គ្រាប់មីននៅសមុទ្រប្រៀបប្រដូចការពិតដោយប្រើគោលដៅរូបតំណាង ហើយនាវាច្រើនគ្រឿងបានចូលរួមក្នុងសមយុទ្ធលើរបៀបរំដោះមនុស្ស ដែលត្រូវបានចាប់ជាចំណាប់ខ្មាំងនៅលើនាវាដែលរឹបអូស។ ប្រទេសចិនបានបញ្ជូននាវាពិឃាតនាំមុខដោយមីស៊ីល នាវាចម្បាំង និងនាវាផ្គត់ផ្គង់សម្រាប់សមយុទ្ធនេះ ហើយប្រទេសអាហ្វ្រិកខាងត្បូងបានបញ្ជូននាវាចម្បាំង SAS Mendi។ រីឯប្រទេសរុស្ស៊ីបានបញ្ជូននាវាចម្បាំង Admiral Gorshkov និងនាវាដឹកប្រេង។ នាវា Gorskov បំពាក់មីស៊ីល Zircon មានល្បឿនលឿនជាងសំឡេងចុងក្រោយបំផុត ដូចដែលបានប្រកាសដោយក្រសួងការពារជាតិកាលពីពេលមុន ប៉ុន្តែពុំបានបាញ់នោះទេក្នុងអំឡុងពេលសមយុទ្ធ។
ទន្ទឹមនឹងនេះការត្រៀមរៀបចំសម្រាប់ក្បួនព្យុហយាត្រាទិវាជ័យជំនះប្រចាំឆ្នាំ របស់រុស្ស៊ីនៅលើទីលានក្រហមបានចាប់ផ្តើមនៅក្នុងតំបន់ Ivanovo កាលពីថ្ងៃចន្ទ។ ក្បួនរថយន្តយោធារុស្ស៊ីដែលមានផ្ទុកប្រព័ន្ធមីស៊ីល បានចាប់ផ្តើមធ្វើដំណើរទៅកាន់ទីក្រុងមូស្គូ មុនពេលព្យុហយាត្រាយោធារបស់ប្រទេសដែលធ្វើឡើងនៅថ្ងៃទី៩ ខែឧសភា ដើម្បីប្រារព្ធខួបការបញ្ចប់សង្គ្រាមលោកលើកទីពីរ។ មីស៊ីលដែលដាក់តាំងបង្ហាញគឺជាផ្នែកនៃព្យុហយាត្រានៅទីលានក្រហម ក្នុងទីក្រុងមូស្គូចាប់តាំងពីឆ្នាំ២០០៨ មក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
