ភ្នំពេញ៖ ម្ចាស់សត្វក្ងោកដែលត្រូវបានមន្រ្តីក្រសួងកសិកម្ម ធ្វើការរឹបអូសយក កាលពីកន្លងទៅ បានថ្លែង​អំណរអគុណចំពោះ​សម្តេចតេជោ ហ៊ុន សែន ​នាយករដ្ឋមន្រ្តីនៃកម្ពុជា បន្ទាប់ពី​សម្តេច បាន​អន្តរាគមន៍ បញ្ជាឱ្យមន្រ្តីកសិកម្មទាំងនោះ យកសត្វក្ងោកជូនទៅដល់ផ្ទះគាត់វិញ។

លោកយាយ និងកូនស្រី ម្ចាស់ក្ងោក រស់នៅស្រុកបរិបូរណ៍ ខេត្តកំពង់ឆ្នាំង បានលើកឡើងថា​ពួកគាត់ពិតជាសប្បាយចិត្តយ៉ាងខ្លាំង​បន្ទាប់សត្វជាទីស្រលាញ់​របស់ពួកគាត់ ដែលបាន​ចិញ្ចឹម​ជាច្រើនឆ្នាំមកហើយ ត្រូវបានគេយកមកឱ្យពួកគាត់វិញ បន្ទាប់ពីមន្រ្តី​កសិកម្ម​រឹបអូស​ដោយចោទ ប្រកាន់ថា ការចិញ្ចឹមរបស់ពួកគាត់ខុសច្បាប់។

តាមរយៈសារតេលេក្រាម នាថ្ងៃទី២៨ ខែកុម្ភៈ ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី បានចេញបទបញ្ជាផ្ទាល់មាត់ឱ្យមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រគល់​សត្វក្ងោកដែលប្រជាជនចិញ្ចឹមទៅអោយម្ចាស់ដើមវិញ និងត្រូវដោះស្រាយនៅថ្ងៃនេះតែម្តង។

សម្តេចតេជោ បានបញ្ជាក់ថា «សូមឱ្យអ្នកទទួលខុសត្រូវ ដែលបានយកសត្វក្ងោកចេញពីផ្ទះរបស់ក្រុមគ្រួសារចិញ្ចឹញក្ងោក យកទៅជូនដល់ផ្ទះវិញតែម្តង គឺខ្ញុំមិនយល់ស្របជាមួយទង្វើបែបនេះឡើយ»។

សម្តេចតេជោ ហ៊ុន សែន បន្តថា យើងគួរលើកទឹកចិត្ត ឱ្យប្រជាពលរដ្ឋចិញ្ចឹមសត្វដែលជិតផុតពូជ ជាជាងទៅចាប់យក សត្វដែលប្រជាពលរដ្ឋខំចិញ្ចឹមមកទុកនៅទីកន្លែងមួយ ដែលមិនយូរប៉ុន្មានសត្វនោះនឹងស្លាប់ ប្រសិនបើខ្វះការថែទាំ និងយកចិត្តទុកដាក់៕