ភ្នំពេញ៖ ឯកឧត្តម ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) និងជារដ្ឋលេខាធិការក្រសួងយុត្តិធម៌ ថ្លែងថា កម្ពុជាចូលរួមការពាររបាយការណ៍​ជាតិពាក់ព័ន្ធ​នឹងការអនុវត្តកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ (ICESCR) ក្នុងសម័យប្រជុំលើកទី៧៣ នៃគណៈកម្មាធិការ សិទ្ធិសេដ្ឋកិច្ច សង្គម និងវប្បធម៌របស់អង្គការ​សហប្រជាជាតិ គឺជាវេទិកាកិច្ចសន្ទនាផ្លាស់ប្ដូរយោបល់គ្នា ​និងជាឱកាសបង្ហាញថាអ្វីជាកម្ពុជាពិត ដែលខុសពីការលើកឡើងរបស់សង្គមស៊ីវិល និងបណ្ដាញសារព័ត៌មានអន្តរជាតិមួយ​ចំនួន​បានផ្សព្វផ្សាយផ្ទុយពីការពិត។

ឯកឧត្តម ជិន ម៉ាលីន បានមានប្រសាសន៍បញ្ជាក់តាមរយៈកិច្ចសម្ភាសន៍ជាមួយទូរទស្សន៍ BTV កាលពីថ្ងៃទី២៧ ខែកុម្ភៈ ឆ្នាំ២០២៣នេះថា តំណាងឱ្យ ឯកឧត្តម កែវ រ៉េមី រដ្ឋមន្ត្រីប្រតិភូអមនាយក​រដ្ឋមន្ត្រី និងជាប្រធានគណៈកម្មាធិការសិទ្ធិ មនុស្សកម្ពុជា ឯកឧត្តម បានដឹកនាំគណៈប្រតិភូពីគ.ស.ម.ក. និងគណៈប្រតិភូអន្តរក្រសួងរួមមាន ចូលរួមការពាររបាយការណ៍ជាតិពាក់ព័ន្ធនឹងការអនុវត្ត កតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ (ICESCR) ដែលជារបាយការណ៍ផ្គួបលើកទី៥ ទី៦ និង ទី៧ ចាប់ពីថ្ងៃទី២១ ដល់ថ្ងៃទី២២ ខែកុម្ភៈ ឆ្នាំ២០២៣ ក្នុងសម័យប្រជុំលើកទី៧៣ នៃគណៈកម្មាធិការ សិទ្ធិសេដ្ឋកិច្ច សង្គម និងវប្បធម៌នៅទីក្រុងហ្សឺណែវ ប្រទេសស្វីស។

ឯកឧត្តមថ្លែងថាការការពាររបាយការណ៍នេះ ជាយន្តការមួយរបស់គណៈកម្មាធិការសិទ្ធិសេដ្ឋកិច្ច សង្គម និងវប្បធម៌ អង្គការសហប្រជាជាតិ ដែលត្រូវធ្វើឡើងរៀងរាល់៥ឆ្នាំម្តង សម្រាប់តាមដាន​និងការធ្វើឱ្យប្រសើឡើងនូវស្ថានភាពសិទ្ធិមនុស្សក្នុងប្រទេសទាំងអស់ដែលជាសមាជិក។ ការពិនិត្យរបាយការណ៍នេះ គឺជាព្រឹត្តិការណ៍មួយធ្វើឡើងក្នុងទម្រង់ជាកិច្ចសន្ទនាបែបស្ថាបនា (Constructive Dialogue) រវាងគណៈប្រតិភូនៃរដ្ឋភាគី និងសមាជិក សមាជិកានៃគណៈកម្មាធិការ ក្នុងគោលបំណងចែករំលែកឬផ្លាស់ប្តូរនូវការអនុវត្តល្អៗបទពិសោធន៍​ ចំណុចខ្វះខាត កង្វល់ ឬបញ្ហា​ប្រឈមនានា ​ព្រមទាំងទិសដៅការងារសម្រាប់ថ្ងៃអនាគត​ ដើម្បីធានានូវការអនុវត្ត និងការគោរព​តាមបទប្បញ្ញត្តិនៃកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ នៅក្នុងរដ្ឋភាគី។

ឯកឧត្តមបញ្ជាក់ថា ដំណើរការនៃកិច្ចសន្ទនាបែបស្ថាបនានេះបានផ្ដល់​វេទិកាឱ្យកម្ពុជា​ដែលជា​រដ្ឋភាគីនៃ ​កតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ក្នុងការបង្ហាញ​នូវ​សមិទ្ធផល​នានាដែលសម្រេចបានពន្យល់ ​បកស្រាយចំពោះការចោទប្រកាន់ផ្សេងៗ​ពាក់ព័ន្ធសិទ្ធិសេដ្ឋកិច្ច សង្គម ​និងវប្បធម៌ ​ដើម្បីបង្ហាញពីកម្ពុជាពិត ហើយក៏ជាឱកាសក្នុងការទទួលបាននូវអនុសាសន៍​ពីអ្នកជំនាញសិទ្ធិមនុស្សផងដែរ៕អត្ថបទ៖ វ៉ន ដារ៉ា