​ភ្នំពេញ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក សហការជាមួយស្ថាប័នរាជរដ្ឋាភិបាលពាក់ព័ន្ធ អង្គការសង្គមស៊ីវិល និងវិស័យឯកជន នៅថ្ងៃទី២៨ ខែកុម្ភៈ ឆ្នាំ២០២៣នេះ ប្រជុំពិភាក្សាគ្នា ដើម្បីប្រមូលធាតុចូល និងគំនិតថ្មីៗបន្ថែមទៀត ដើម្បីរួមគ្នាអនុវត្តការងារកាត់បន្ថយគ្រោះថ្នាក់ចរាចរណ៍នៅលើដងផ្លូវជាពិសេសនាអំឡុងកម្ពុជារៀបចំព្រឹត្តិ​ការណ៍​សំខាន់ៗនាពេលខាងមុខដូចជាព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ ព្រឹត្តិការណ៍អង្គសង្រ្កាន្ត និងព្រឹត្តិការបោះឆ្នោតជាតិជាដើម។

លោកជំទាវ មិន ម៉ាណវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអគ្គលេខាធិការជាតិ សុវត្ថិភាពចរាចរណ៍ផ្លូវគោក ថ្លែងប្រាប់អ្នកសារព័ត៌មានក្នុងពិធីនេះថា តាមរយៈកិច្ចប្រជុំនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានទទួលមតិយោបល់ និងធាតុចូលជាច្រើនពីភាគីពាក់ព័ន្ធ ជាពិសេសមតិយោបល់ពីបណ្ដាអង្គការ សង្គមស៊ីវិល ដែលធ្វើការងារពាក់ព័ន្ធនឹងសុវត្ថិភាពចរាចរណ៍ផ្លូវគោក ដើម្បីដាក់ចេញជាវិធានការបន្ថែមទៀតក្នុងឆ្នាំ២០២៣នេះ លើការទប់ស្កាត់គ្រោះថ្នាក់ចរាចរណ៍នៅលើដងផ្លូវឱ្យបានច្រើនតាមដែលអាចធ្វើទៅបាន។

លោកជំទាវបានឱ្យដឹងថា ក្នុងកិច្ចប្រជុំនេះ ភាគីអង្គការសង្គមស៊ីវិលបានផ្ដល់នូវមតិយោបល់ ក៏ដូចជាសូមណូមពរ ដល់គណៈកម្មាធិការជាតិសុវត្ថិភាពចរាចរណ៍ផ្លូវគោក លើការបន្តរឹតបន្ដឹងការអនុវត្តច្បាប់ចរាចរណ៍ផ្លូវគោកដែលមានស្រាប់ និងការបន្តផ្សព្វផ្សាយការអនុវត្តច្បាប់ចរាចរណ៍ចំពោះអ្នកបើកបរដែលមិនបានពាក់មួកសុវត្ថិភាព ពិសេសមិនពាក់មួកសុវត្ថិភាពដល់កុមារដល់គ្រប់អាយុឱ្យបានតឹងរឹងបន្ថែមទៀត។

បើតាម គណៈកម្មាធិកាជាតិសុវត្ថិភាពចរាចរណ៍ផ្លូវគោក ក្នុងឆ្នាំ២០២២ ករណីគ្រោះថ្នាក់ចរាចរណ៍នៅទូទាំងប្រទេស បានកើនឡើង១៤ ភាគរយ បើធៀបនឹងឆ្នាំ២០២១។ ក្នុងនោះករណីគ្រោះថ្នាក់ចរាចរណ៍មានជិត ៣ ពាន់ករណី និងបណ្តាលឱ្យមានមនុស្សស្លាប់មានជាង ១៧០០នាក់ ខណៈអ្នករងរបួសវិញមានជាង ៤ពាន់នាក់។ បើតាមគណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងចំណោមបទល្មើសចរាចរណ៍ជិត ៣ ពាន់ករណីនេះ ជនល្មើសចំនួន ៣១៦នាក់ ត្រូវបានបញ្ចូនទៅកាន់តុលាការ៕​អត្ថបទ៖វ៉ន ដារ៉ា