ភ្នំពេញ៖ រោងចក្រឧស្សាហកម្មធុនធំ កំពុងដំណើរការនៅកម្ពុជា មានចំនួន ១៩៨២រោងចក្រ បានកើនឡើងជាង ៥ ភាគរយ និងមានទុនវិនិយោគសរុបជាង ១៦ ៦៩០លានដុល្លារអាមេរិក កើនឡើងជិត ២១ភាគរយ។

ឯកឧត្តមកិត្តិសេដ្ឋបណ្ឌិត ចម ប្រសិទ្ធ ទេសរដ្ឋមន្តីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកនៅក្នុងពិធីបើកសន្និបាតបូកសរុបសកម្មភាពការងារឆ្នាំ២០២២ និងលើកទិសដៅការងារ ឆ្នាំ២០២៣ របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី២៨ ខែកុម្ភៈ ឆ្នាំ២០២៣ នេះថា រោងចក្រធុនធំដែលកំពុងដំណើរការ បានផ្តល់ឱកាសការងារមានចំនួន ជាង ១ លានកន្លែង (ស្ត្រីមានជាង ៧៥ ភាគរយ) មានការកើនឡើងជាង ៤% បើធៀបទៅនឹងឆ្នាំ។

ចំណែកតម្លៃបរិមាណផលិតផលសរុបគឺមានចំនួនជាង ១៥ ៨៣៤ លានដុល្លារអាមេរិក មានការកើនឡើង ៨៣ ភាគរយ បើធៀបនឹងឆ្នាំមុន ក្នុងនោះតម្លៃបរិមាណផលិតផលសម្រាប់បម្រើទីផ្សារក្នុងស្រុកមានចំនួនជាង ៤ ៣៥៣ លានដុល្លារអាមេរិក និងតម្លៃបរិមាណផលិតផលសម្រាប់ធ្វើការនាំចេញមានចំនួនជាង ១១ ៤៨១លានដុល្លារអាមេរិក។

ឯកឧត្តមកិត្តិសេដ្ឋបណ្ឌិត ចម ប្រសិទ្ធ មានប្រសាសន៍ថា វិស័យឧស្សាហកម្មនៅតែរក្សាបានស្ថិរភាពល្អប្រសើរ បន្ទាប់ពីប្រឈមនឹងឥទ្ធិពលជំងឺកូវីដ-១៩ ដែលធ្លាប់បន្ទុចបង្អាក់ដំណើរការរោងចក និងថយការបញ្ជាទិញមួយចំនួននាពេលកន្លងមក។

ឯកឧត្តមកិត្តិសេដ្ឋបណ្ឌិត បន្តថា ជុំវិញការអភិវឌ្ឍន៍នេះ គឺបានកើតចេញកត្តាសុខសន្តិភាព រួមជាមួយនឹងកំណែទម្រង់បរិយាកាសវិនិយោគ និងធុរកិច្ចជាបន្តបន្ទាប់របស់រាជរដ្ឋាភិបាលកម្ពុជា ការយកចិត្តទុកដាក់ស្តារឡើងវិញបន្ទាប់ពីវិបត្តិជំងឺកូវីដ-១៩ ការរៀបចំប្រព័ន្ធព័ត៌មានវិទ្យាបច្ចេកវិទ្យាឌីជីថល ការពង្រីកទីផ្សារនាំចេញ និងការអភិវឌ្ឍវិស័យហិរញ្ញវត្ថុ បានក្លាយជាកត្តាវិវត្តន៍ជាវិជ្ជមាន ក្នុងការប្រែក្លាយកម្ពុជាទៅជាទីតាំងផលិតកម្ម ធុរកិច្ច និងវិនិយោគដ៏សំខាន់ និងមានសក្តានុពល ដែលបានផ្តល់ទំនុកចិត្ត ផ្តល់នូវបរិស្ថានសមស្របទាក់ទាញវិនិយោគិន ធុរជន ទាំងក្នុងនិងក្រៅប្រទេស ឱ្យមកបន្តបណ្តាក់ទុនវិនិយោគនៅកម្ពុជាជាបន្តបន្ទាប់។

នៅក្នុងឆ្នាំ២០២២ មានរោងចក្រថ្មីកើតឡើងចំនួន ១៨៦ រោងចក្រ ខណៈដែលមានរោងចកបិទទ្វារចំនួន ៨៣រោងចក្រ, មានន័យថា បន្ទាប់ពីកាលៈទេសៈដ៏លំបាកដែលបណ្តាលមកពីជំងឺកូវីដ-១៩ រោងចក្រកើតថ្មី មានកំណើនវិជ្ជមានគួរឱ្យកត់សម្គាល់ បើធៀបនឹងស្ថានភាពរោងចក្របិទទ្វារ៕ អត្ថបទ៖ សុន រ៉ាឌី