ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បញ្ជាក់បន្ថែម ករណីបញ្ហាសត្វក្ងោកដែលពលរដ្ឋចិញ្ចឹមដោយសម្ដេចបញ្ជាឱ្យពិនិត្យបន្ទាន់លើបញ្ហាច្បាប់ពាក់ព័ន្ធ កែប្រែឱ្យពលរដ្ឋអាចចិញ្ចឹមសត្វជិតផុតពូជបាន ជាជាងទៅចាប់យកសត្វដែលពលរដ្ឋ​ខំ​ចិញ្ចឹម​មកទុកនោះ ហើយការចិញ្ចឹមសត្វកម្ររបស់ពលរដ្ឋក៏ជួយបង្កើតសត្វព្រៃឡើងវិញផងដែរ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍បែបនេះពេលអញ្ជើញជាអធិបតីសម្ពោធដាក់ឱ្យប្រើប្រាស់អគារសិក្សាចំនួន ២ ខ្នង និងប្រគល់សញ្ញាបត្រដល់និស្សិត វិទ្យាស្ថានបច្ចេកវិទ្យាកម្ពុជាជិត ៥ ពាន់នាក់នៅមជ្ឈមណ្ឌលសន្និបាត និងនិងពិព័រណ៍កោះពេជ្រនៅព្រឹកថ្ងៃទី១ ខែមីនា ឆ្នាំ២០២៣នេះ។

សម្ដេចតេជោបានថ្លែងថាសត្វកម្រនេះ ពលរដ្ឋអាចចិញ្ចឹមបាន ហើយក៏អាចយកទៅលែង​នៅក្នុងព្រៃឡើងវិញផងដែរ។ សម្ដេច ថ្លែងថា សត្វកម្រដូចជាសត្វក្ងោក និងសត្វកម្រផ្សេងទៀត បើទឹកដីកម្ពុជាងាយស្រួលចិញ្ចឹមត្រូវបន្តចិញ្ចឹមហើយលែងទៅក្នុងព្រៃក៏បាន។ សម្ដេចបញ្ជាក់ថា សកម្មភាពពលរសដ្ឋនាំគ្នាចិញ្ចឹមត្វកម្របែបនេះ គឺបង្ហាញពីស្ថានភាពល្អ នៃការអភិរក្សសត្វព្រៃ​នៅកម្ពុជាឡើងវិញផងដែរ។

សម្តេចតេជោបានបញ្ជាឱ្យក្រសួងពិនិត្យច្បាប់ពាក់ព័ន្ធលើការអភិរក្សសត្វព្រៃដោយអនុញ្ញាតឱ្យប្រជាពលរដ្ឋមានសិទ្ធិអាចចិញ្ចឹមសត្វជិតផុតពូជបាន ដោយកែប្រែពីការរឹតត្បិតមកជាចលនា​ចញ្ចឹម​សត្វវិញ គឺពលរដ្ឋអាចចិញ្ចឹមសត្វកម្របាន។

ជាមួយគ្នានេះសម្តេចតេជោ ក៏ប្រកាសថា សម្តេចមិនបន្ទោសមន្ត្រីអនុវត្តន៍ច្បាប់រឿង​ចាប់យក​សត្វក្ងោក​អ្នក​ភូមិចិញ្ចឹមឡើយ ដោយករណីនេះ មន្ត្រីអនុវត្តន៍ច្បាប់សំអាងលើ​ហេតុផលដែល​មាននៅក្នុងច្បាប់៕អត្ថបទ៖ វ៉ន ដារ៉ា