​រុស្ស៊ី៖ លោក​ប្រធានាធិបតី​រុស្ស៊ី Vladimir Putin បាន​បញ្ជា​ឲ្យ​ក្រុមមន្ត្រី​រឹតបន្តឹង​ការគ្រប់គ្រង​ព្រំដែន​ជាប់​អ៊ុយ​ក្រែ​ន ​ក្រោយ​ការវាយប្រហារ​ដោយ​យាន​ដ្រូ​ន ដែល​កំពុង​បង្ក​ឲ្យ​មាន​ក្ដីបារម្ភ​ថ្មី​សម្រាប់​ទីក្រុង Moscow មួយឆ្នាំ ក្រោយ​ការ​វាយ​លុក​ចូល​ប្រទេសជិតខាង​អ៊ុយ​ក្រែ​ន​។

​យាន​ដ្រូ​ន​មួយ​គ្រឿង​បាន​ធ្លាក់​កាលពី​ថ្ងៃ​អង្គារ​ចម្ងាយ ​១០​គីឡូម៉ែត្រ​ភាគ​អាគ្នេយ៍​នៃ​រដ្ឋធានី Moscow របស់​រុស្ស៊ី ចំណែក ​២គ្រឿង​ផ្សេងទៀត​ត្រូវ​បាន​បាញ់​ទម្លាក់​នៅ​ភាគ​ខាងត្បូង​រុស្ស៊ី នេះ​បើ​យោង​តាម​ក្រសួង​ការពារជាតិ​។​ ក្រុម​អាជ្ញាធរ​ក៏បាន​បិទ​ដែនអាកាស​លើ​ទីក្រុង​ St Petersburg ​ភាគ​ខាងជើង​ផង​ដែរ ឆ្លើយតប​ទៅនឹង​អ្វីដែល​របាយការណ៍​មួយ​ចំនួន​និយាយ​ថា ជា​យាន​ដ្រូ​ន ខណៈ​ទូរទស្សន៍​មួយ​ចំនួន​របស់​រុស្ស៊ី​បាន​ផ្សាយ​ថា ​ជា​ការ​ព្រមាន​វាយប្រហារ​ដោយ​មី​ស៊ី​ល​ ដែល​ក្រុម​មន្ត្រី​បាន​ស្ដីបន្ទោស​លើ​ការ​លួច​ព័ត៌មាន​។

​អភិបាល​តំបន់ Moscow លោក Andrei Vorobyov បាន​និយាយ​នៅក្នុង​សេចក្ដីថ្លែងការណ៍​មួយ​សំដៅ​ដល់​យាន​អាកាស​គ្មាន​មនុស្ស​បើក​ថា ទាក់ទង​នឹង​ឧបទ្ទវហេតុ​ធ្លាក់​យាន​ដ្រូ​ន​នៅ​ក្នុង​ស្រុក Kolomna តំបន់​ហេដ្ឋារចនាសម្ព័ន្ធ​ស៊ីវិល​អាច​ជា​គោលដៅ​របស់​ដ្រូន​នេះ តែ​ពុំបាន​បណ្ដាល​ឲ្យ​ខូចខាត​ ឬ​មាន​មនុស្ស​រង​របួស​នោះ​ទេ​។ ​ក្រុម​មន្ត្រី​អ៊ុយ​ក្រែ​ន​ពុំបាន​អះអាង​ទទួលខុសត្រូវ​ចំពោះ​ការវាយប្រហារ​ណាមួយ​ទេ ប៉ុន្តែ​ពួកគេ​ធ្លាប់​បាន​គេចវេះ​ការ​ទទួល​ស្គាល់​ដោយ​ផ្ទាល់​ស្រដៀង​គ្នា​នេះ ចំពោះ​ការ​វាយ​ប្រហារ ​និង​ការ​បំផ្លិច​បំផ្លាញ​កាលពី​កន្លងទៅ​៕

អត្ថបទ៖ សុខមាន