ឧត្តរមានជ័យ៖ រដ្ឋមន្រ្តីក្រសួងសុខាភិបាល បានណែនាំ ដល់ក្រុមគ្រូពេទ្យ និង​គណៈគ្រប់គ្រង់​មន្ទីរពេទ្យទាំងអស់ ត្រូវគោរព​ក្រម​សីលធម៌ និងវិជ្ជាជីៈ របស់ខ្លួនឱ្យបានល្អប្រសើរបន្ថែមទៀត ក្នុងការព្យាបាលដល់អ្នកជំងឺទូទៅប្រកបដោយគុណធម៌ សុជីវធម៌ ពិសេសចំពោះការផ្តល់​សេវា​នានាជូនពលរដ្ឋមិនត្រូវមានការយឺតយាវនោះទេ។

ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ថ្លែង​នាថ្ងៃទី១មិនា ឆ្នាំ២០២៣​នេះនេះ ក្នុងឱកាស​អញ្ជើញ​ជាអធិបតីក្នុងពិធីសម្ពោធដាក់ឲ្យដំណើរការប្រើប្រាស់​ជាផ្លូវការ នូវអគារសម្រាកព្យាបាល​ជំងឺមន្ទីរបង្អែកខេត្តឧត្តរមានជ័យថ្មីមួយខ្នង ជាគម្រោងថវិការបស់​ប្រមុខរាជរដ្ឋាភិបាលកម្ពុជា​ និង​មានការចូលរួម​ពីអាជ្ញាធរខេត្តមន្ទីរស្ថាប័នពាក់ព័ន្ធ លោក​គ្រូពេទ្យអ្នកគ្រូពេទ្យ​រួមទាំង ប្រជាពលរដ្ឋ នៅមន្ទីរពេទ្យបង្អែកខេត្តឧត្តរមានជ័យ។

បើតាមរបាយការណ៍របស់លោកវេជ្ជបណ្ឌិត ឃ្លោក ហួត ប្រធាន​មន្ទីរសុខាភិបាល​នៃរដ្ឋបាល​ខេត្តឧត្តរមានជ័យ បានឲ្យដឹងថា ក្នុងអំឡុងឆ្នាំ២០០០ មន្ទីរសុខាភិបាលខេត្ត និងមន្ទីរពេទ្យខេត្តត្រូវ​បានគ្រប់គ្រង់​ដោយមន្ទីរពេទ្យយោធា​កងទ័ពជើងកោគ ​លុះដល់ឆ្នាំ២០០២ មន្ទីរពេទ្យមួយនេះ ជា​មន្ទីរពេទ្យកំរិតCPA-2មានការផ្តល់សេវាផ្នែកសង្រ្គោះបន្ទាន់ វះកាត់ ​ពិនិត្យប្រភេទជំងឺធ្ងន់ បាន​ជាច្រើន។ ​ដោយឡែកអគារមន្ទីរពេទ្យថ្មីមួយខ្នងនេះ ចំណាយ​ពេល​សាងសង់​អស់រយៈពេល១៨ខែ មានបន្ទប់ ១៨បន្ទប់ ចំណាយថវិកាអស់ ២.៣៧៤.២២៧ដុល្លារ មាន​បំពាក់សម្ភារៈ បរិក្ខារ​វេជ្ជសាស្រ្ត​គ្រប់មុខប្រកបដោយ​សុវត្ថិភាព​ផ្នែកព្យាបាលមាន​ សម្ភព ​រោគស្រ្តី​ វះកាត់តូច ធំ និងពិនិត្យជំងឺ​មនុស្ស​ចាស់កុមារ​ទូទៅផងដែរ។

ក្នុងពិធីនោះដែរឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានធ្វើកោត​សរសើរ និងវាយតម្លៃខ្ពស់ចំពោះមន្រ្តីសុខាភិបាល​ខេត្តឧត្តរមានជ័យ ទាំងអស់​ដែលកន្លងមក បាន​ខិតខំពុះពាររាល់​ឧបសគ្គប្រឈមផ្សេងៗ ចំពោះមុខ​ដោយ​មិនក្លាចនូវការនឿយហត់​ពិសេសក្នុង​អំឡុងយុទ្ធនាការទប់ស្កាត់ និងជំងឺកូវីដ-១៩កន្លងមក។

ឯកឧត្តមសាស្រ្តចារ្យ បញ្ជាក់ថា ​ទាំងអស់នេះ​សបញ្ជាក់ឲ្យឃើញកាន់តែច្បាស់​ពីការយកចិត្តទុក​ដាក់ខ្ពស់​ក្នុងការ​បម្រើ​ប្រជាពលរដ្ឋផ្នែក​វិស័យ​សុខាភិបាល​ដោយពឹងផ្អែក​លើ​ស្មារតីទទួលខុស​ត្រូវខ្ពស់របស់បងប្អូនគ្រប់រូបដែលបានប្រឹងប្រែងកន្លងមក ជំនះរាល់ឧបសគ្គនានាទទួលបាន​ជោគជ័យ​ក្នុងការបង្ការទប់ស្កាត់ជំងឺកូវីដ៕