ភ្នំពេញ៖ សពយោធាមួកខៀវកម្ពុជាមួយរូបដែលបានពលីក្នុងតំបន់ បេសកកម្មនៅសាធារណរដ្ឋម៉ាលី បានបញ្ជូនមកដល់កម្ពុជា នៅវេលារំលងអធ្រាត្រថ្ងៃទី១ ខែមីនា ឆ្នាំ២០២៣​ ដោយមានការប្រារព្ធពិធីទទួលសពតាមបែបផែនយោធា ក្រោមវត្តមាន​នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌល​ជាតិរក្សាសន្តិភាពនៅព្រលានយន្តហោះអន្តរជាតិភ្នំពេញ។

សពលោកវរសេនីយ៍ទោ ភឿក ជីវ័ន្ត មេបញ្ជាការរងកងអនុសេនាធំវិស្វកម្មព្រលាន​យន្តហោះ​លេខ៧២៩ ​បានពលីជីវិត ក្នុងអំឡុងពេលបំពេញបេសកកម្មរក្សាសន្តិភាព​ក្រោមឆត្រអង្គការ​សហប្រជាជាតិ នៅតំបន់តេសសាលីត ​កាលពីថ្ងៃទី៩ ខែកុម្ភៈ ឆ្នាំ២០២៣៕