សៀមរាប៖ នៅថ្ងៃទី២៨ ខែកុម្ភៈ ឆ្នាំ២០២៣ នៅស្នាក់ការអាជ្ញាធរជាតិអប្សរា ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា និងឯកឧត្តម ឆ្វេ អឹងឆន អគ្គនាយកនៃរដ្ឋបាលបេតិកភណ្ឌវប្បធម៌កូរ៉េ (CHA) បានចុះអនុសរណៈយោគយល់ទ្វេរភាគី លើការបន្តកិច្ចសហប្រតិបត្តិការដើម្បីអភិវឌ្ឍន៍បេតិកភណ្ឌវប្បធម៌រវាង ប្រទេសទាំងពីរ ។

ឯកឧត្តម ឆ្វេ អឹងឆន (Choi Eung-chon) អគ្គនាយកនៃរដ្ឋបាលបេតិកភណ្ឌវប្បធម៌កូរ៉េ បានរំលឹក​ពីការ​ចាប់ផ្តើម នៃកិច្ចសហប្រតិបត្តិការរវាងអាជ្ញាធរជាតិអប្សរា ​និងស្ថាប័នបេតិកភណ្ឌវប្បធម៌ កូរ៉េ ដែលចាប់ផ្តើមពីឆ្នាំ២០១០។ កិច្ចសហប្រតិបត្តិការដំបូង ភាគីកូរ៉េ បានជួយផ្នែកសម្ភារបរិក្ខារ លើការជួសជុល ​និងអភិរក្សប្រាសាទ។ ក្រោយមកនៅឆ្នាំ២០១៥ បានជួយលើគម្រោង​សហប្រតិបត្តិការ ជួសជុល ក្រុមប្រាសាទព្រះពិធូរ ដោយបញ្ចប់នៅឆ្នាំ២០១៨ ខណៈដែលឆ្នាំ២០១៩ គម្រោងកិច្ចសហប្រតិបត្តិការ ជួសជុលព្រះលានជល់ដំរី ដែលបន្តរហូតដល់បច្ចុប្បន្ន។

ឯកឧត្តម ឆ្វេ អឹងឆន ស្ថាប័នកូរ៉េ ក៏បានព្រមព្រៀងបន្តជួយអភិរក្ស និងជួសជុល រួតបាកាណ​ប្រាសាទ​អង្គរវត្តផងដែរ។ អគ្គនាយក នៃបេតិកភណ្ឌវប្បធម៌កូរ៉េ បានហៅកិច្ចសហប្រតិបត្តិការទាំងនេះថា ​ជាផ្នែកមួយបង្កើនភាពជិតស្និទ្ធ នៃទំនាក់ទំនង រវាង​ប្រទេសកម្ពុជា និងកូរ៉េ ហើយរំពឹងថា កិច្ចសហប្រតិ បត្តិការនេះ នឹងបន្តមានភាពខ្លាំងក្លាជាដរាបទៀត ។

ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានស្វាគមន៍យ៉ាងកក់ក្ដៅទៅកាន់ប្រតិភូ នៃស្ថាប័ន​បេតិកភណ្ឌវប្បធម៌កូរ៉េ។ ឯកឧត្តម បានរំលឹកពីគម្រោងនានា​ ដែលស្ថាប័នកូរ៉េ បាន​នឹងកំពុងជួយលើកិច្ចការអភិរក្សក្នុងរមណីយដ្ឋានអង្គរ។

ឯកឧត្តមបានអរគុណដល់ភាគីកូរ៉េ ដែលបានជួយបណ្ដុះបណ្ដាលមន្រ្តីអាជ្ញាធរជាតិអប្សរា ក្នុងការ​ពង្រឹងសមត្ថភាពសម្រាប់ការជួសជុល​ និងអភិរក្សប្រាសាទបុរាណ ដែលឯកឧត្តមហៅថា ជាផ្នែកសំខាន់​ក្នុងការពង្រឹងធនធានមនុស្សសម្រាប់កិច្ចការបេតិកភណ្ឌ។

ឯកឧត្តម ហង់ ពៅ ក៏បានស្នើភាគីកូរ៉េ ឱ្យពិចារណាជួយលើការអភិរក្សផ្នែកសារមន្ទីរ ផងដែរ។ កូរ៉េមាន​ជំនាញការពារ ​និងគ្រប់គ្រងសារមន្ទីរ ដែលគួរត្រូវចែករំលែកជំនាញ​នេះដល់​មន្រ្តីផ្នែកសារមន្ទីរ នៃអាជ្ញាធរជាតិអប្សរា ​លើការគ្រប់គ្រង ​និងថែរក្សាសមុច្ច័យនានា ក្នុង​សារមន្ទីរឱ្យបានគង់វង្ស និងស្ថិតស្ថេរ៕អត្ថបទ៖ ឈិត សាវី