ភ្នំពេញ៖ រាជបណ្ឌិត្យសភាកម្ពុជា បានបើកកិច្ចពិភាក្សាតុមូល ស្តីពី​សារៈសំខាន់ នៃការបណ្តុះបណ្តាលវិជ្ជាជីវៈ ដោយអញ្ញើញវាគ្មិនចំនួន ៤រូប មកពីតំណាងក្រសួងការងារ និងបណ្តុះបណ្តាលវិជ្ជាជីវៈ ក្រសួងទេសចរណ៍ ក្រសួងកសិកម្ម រុក្ខាប្រមាញ់ និងនេសាទ និងក្រសួងអភិវឌ្ឍន៍ជនបទ ដើម្បីបង្ហាញពីផែនការយុទ្ធសាស្ត្រអភិវឌ្ឍជាតិដ៏ជាក់លាក់របស់រាជរដ្ឋាភិបាលកម្ពុជា។

​ឯកឧត្តម យង់ ពៅ អគ្គលេខាធិការរាជបណ្ឌិត្យសភាកម្ពុជា នៅក្រោយចប់កិច្ចពិភាក្សាតុមូល នៅរសៀលថ្ងៃទី០១ ខែមីនា ឆ្នាំ២០២៣នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ថា ការលើកយកប្រធានបទខាងលើនេះ ដោយមើលឃើញថា ការបណ្តុះបណ្តាលវិជ្ជាជីវៈ សម្រាប់ប្រជាពលរដ្ឋ ជាពិសេសយុវជននៅមានកម្រិត។

នៅក្នុងវេទិកានាឱកាសនោះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានបញ្ជាក់ថា ការបណ្តុះបណ្តាលវិជ្ជាជីវដើរតួនាទីសំខាន់ខ្លាំងណាស់ ហើយការធ្វើលើកិច្ចការងារនេះ មិនមែនគ្រាន់តែមានក្រសួង ឬស្ថាប័នមួយ អាចធ្វើទៅបាននោះទេ ពោលគឺ ទាមទាឲ្យចូលរួមទាំងអស់គ្នាទើបប្រទេសជាតិកាន់តែមានការរីកចម្រើន ជាពិសេស ការទាក់ទាញបាននូវការវិនិយោគប្រកបដោយចីរភាព ដើម្បីឆ្លើយតបទៅនឹងការអភិវឌ្ឍសេដ្ឋកិច្ច-សង្គម និងទីផ្សារការងារ។

សូមរម្លឹកថា កាលពីពេលកន្លងទៅនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសផែនការបណ្តុះបណ្តាលជំនាញវិជ្ជាជីវៈដល់យុវជននៅគ្រួសារក្រីក្រ និងងាយរងគ្រោះទូទាំងប្រទេសចំនួន ១លាន ៥សែននាក់ ដោយរដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣នេះតទៅ ដើម្បីធ្វើការអភិវឌ្ឍមូលធនមនុស្ស ដែលជាធនធាន ជន្ទល់គាំទ្រឱ្យការរីកចំរើននៃសង្គមសេដ្ឋកិច្ចជាតិក្នុងរយៈពេលខ្លី មធ្យម និងវែង ដោយជំរុញឱ្យប្រជាពលរដ្ឋមានការងារសមរម្យ និងកម្រិតជីវភាពកាន់តែប្រសើរឡើង ដោយធានាថា “ប្រជាពលរដ្ឋម្នាក់មានជំនាញមួយយ៉ាងតិចប្រចំាជីវិត”៕ អត្ថបទ៖ ឈិត បូរ៉ាវី