​ចិន៖ ទីក្រុង​ប៉េកាំង​បាន​ចោទប្រកាន់​ទីក្រុង​វ៉ាស៊ីនតោន​កាលពី​ថ្ងៃ​ពុធ ​ទី​១​មីនា​ថា ​ជា​ការ​ធ្វើ​ឲ្យ​ប៉ះពាល់​ដល់​មុខមាត់​ខ្លួនឯង ក្រោយ​មន្ត្រី​ចារកម្ម​ជាន់ខ្ពស់​មួយ​រូប​របស់​សហរដ្ឋ​អាមេរិក​និយាយ​ថា ​ទីភ្នាក់ងារ​របស់​លោក​ជឿ​ថា ​ជំងឺ​រាតត្បាត​សកល​ COVID-19 ទំនង​បណ្ដាល​មក​ឧបទ្ទវហេតុ​មន្ទីរ​ពិសោធន៍​នៅ​ក្នុង​ទីក្រុង​អ៊ូ​ហាន (Wuhan) ប្រទេស​ចិន។

​លោក Christopher Wray ប្រធាន​ទីភ្នាក់ងារ​ស៊ើបអង្កេត​សហព័ន្ធ FBI បាន​ប្រាប់​សារព័ត៌មាន Fox News កាលពី​ថ្ងៃ​អង្គា​រថា ពេលនេះ​ទីភ្នាក់ងារ​របស់​លោក​បាន​វាយតម្លៃ​លើ​ប្រភព​នៃ​វីរុស COVID-19 ថា វា​ពិតជា​អាច​ទៅ​រួច​ដែល​ថា ​វា​ជា​ឧបទ្ទវហេតុ​មន្ទីរ​ពិសោធន៍​នៅ​ក្នុង​ទីក្រុង Wuhan​។ ​ក្រុម​មន្ត្រី​ចិនបាន​ទាត់ចោល​យ៉ាង​ដាច់អហង្ការ​ចំពោះ​ការ​អះ​អាង​​នេះ ដោយ​ហៅ​ការ​លើក​ឡើង​របស់​សហ​រដ្ឋ​អាមេរិក​ថា​ ជា​យុទ្ធនាការ​លាប​ពណ៌​ប្រឆាំង​ទីក្រុង​ប៉េកាំង​។ ​អ្នកនាំពាក្យ​ក្រសួងការបរទេស​ចិន​លោកស្រី Mao Ning បាន​ប្រាប់​សន្និសីទ​សារព័ត៌មាន​ប្រចាំថ្ងៃ​កាលពី​ថ្ងៃ​ពុធ​ថា សហរដ្ឋ​អាមេរិក​បាន​សើរើ​ជាថ្មី​ពី​ទ្រឹស្ដី​ការ​លេចចេញ​ពី​មន្ទីរ​ពិសោធន៍ ដែល​នឹង​មិន​ធ្វើ​ឲ្យ​ខូច​កិត្តិយស​របស់​ចិន​ឡើយ ផ្ទុយទៅវិញ​បាន​ត្រឹម​តែ​ធ្វើ​ឲ្យ​មុខមាត់​ខ្លួនឯង​ធ្លាក់​ចុះ​ថែមទៀត​តែ​ប៉ុណ្ណោះ​។

​ការ​អត្ថាធិប្បាយ​របស់​លោក Wray បាន​កើតមានឡើង ក្រោយ​របាយការណ៍​កាល​ពី​ដើម​សប្ដាហ៍​នេះនិយាយ​ថា ក្រសួង​ថាមពល​អាមេរិក​បាន​បញ្ជាក់​ថា​ ការ​លេច​ធ្លាយ​ចេញពី​មន្ទីរ​ពិសោធន៍​វេជ្ជសាស្ត្រ​របស់​ចិន ពិតជា​ទំនង​បង្ក​ឲ្យ​មានការ​ផ្ទុះ​ឆ្លង​រាលដាល​វីរុស COVID-19 នេះ​។ ​ប៉ុន្តែ​ទីភ្នាក់ងារ​ផ្សេង​ទៀត​នៅ​ក្នុង​សហគមន៍​ចារកម្ម​សហរដ្ឋអាមេរិក​ជឿ​ថា ​វីរុស​នេះ​លេចចេញ​ដោយ​ឯកឯង​នៅ​លើ​ពិភព​លោក​នេះ​៕

អត្ថបទ៖ សុខមាន