តាកែវ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានឱ្យដឹងថា ក្នុងរយៈពេល ៥ឆ្នាំ នេះការងារបង្កបង្កើនផលស្រូវរដូវវស្សា និងស្រូវរដូវប្រាំងសម្រេចបានផ្ទៃដីសរុប ១.៥៦៩.២៨៦ ហិកតា បរិមាណផល សរុបចំនួន ៦.១៤៧.២៩៦ តោន និង​បរិមាណ​ស្រូវ​នៅ​សល់​ សម្រា​ប់ធ្វើការនាំចេញទៅរាជធានីភ្នំពេញ និង​ប្រទេស​វៀតណាម​តាម​ច្រក​ព្រំដែន​សរុប​ចំនួន ៤.១៤១.២៣៣ តោន។

ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ ថ្លែងក្នុង​សន្និសីទ​សារព័ត៌​មាន​ស្តីពី​ភាព​ជោគ​ជ័យ​ក្នុង​រយៈពេល៥ឆ្នាំ (២០១៨-២០២៣) របស់រដ្ឋបាលខេត្តតាកែវ ថ្ងៃទី ២ ខែមីនា ឆ្នាំ២០២៣ នៅទីស្តីការគណៈរដ្ឋមន្ត្រីនេះ។ ឯកឧត្តមថ្លែងថា ផ្ទៃដីដំណាំរួមផ្សំមានចំនួន ៤.០០០ ហិកតា ក្រៅពីនេះមានផ្ទៃដីលំនៅដ្ឋាន ផ្ទៃដីបឹង ស្ទឹងប្រឡាយ ដីទំនេរ ដីគម្របព្រៃឈើ និង​សំណង់​សាធារណៈផ្សេងៗ។

ឯកឧត្ដមបានឱ្យដឹងថា ដោយមានកត្តាអំណោយផលពីធម្មជាតិ អាកាសធាតុ សណ្ឋានដី ដី​ជីវជាតិ និងប្រព័ន្ធស្រោចស្រពគ្រប់គ្រាន់ ធ្វើឱ្យខេត្តតាកែវជាប់ជាខេត្តជង្រុកស្រូវទី២ នៃ​ព្រះរាជាណាចក្រកម្ពុជា។

ឯកឧត្ដម​បន្តថា ខេត្តមានប្រព័ន្ធធារាសាស្ត្រកសិកម្មសរុបចំនួន ១៣០ប្រព័ន្ធ ក្នុងនោះ​មាន​ប្រព័ន្ធ​ធំ​ចំនួន ០៧កន្លែង ប្រព័ន្ធមធ្យមចំនួន ៦៤កន្លែង និងប្រព័ន្ធតូចចំនួន ៥៩កន្លែង ហើយ​មាន​សក្តានុពល​ស្រោចស្រពស្រូវរដូវប្រាំងបានចំនួន ១៣៨.១៨៣ហត និងស្រូវរដូវវស្សាចំនួន ៤៦.៦១៧ ហិកតា។

បើតាមឯកឧត្ដមអភិបាល ខេត្តតាកែវមានអាងទឹកចំនួន ៩៤កន្លែង មានប្រវែងសរុប ២១៩.៦៨៦​​ម៉ែត្រ ក្នុងនោះទំនប់ការពារទឹកជំនន់ចំនួន ០១កន្លែង ប្រវែង ២៣.៤០០ម៉ែត្រ ប្រឡាយ​មេសរុបចំនួន ៩២៧.៤២៨ម៉ែត្រ ប្រឡាយរងប្រវែង ១៤៦.១៣៥ម៉ែត្រ និ​ង​ស្ថានីយ​បូម​ទឹក​ចំនួន ៣៥កន្លែង ក្នុងនោះអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានចំនួន ០៤កន្លែង រួមមានស្ថានីយទី៧, ៨, ២២ និងស្ថានីយ​ទី២៣ ស្ថិតនៅស្រុកបាទី៕ អត្ថបទ៖ ដារ៉ា