ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ បានអំពាវនាវទៅដល់ប្រជាពលរដ្ឋ នៅទូទាំង ប្រទេសសូមកុំភ័យខ្លាច ចំពោះខេត្តតាកែវ ដោយអាជ្ញាធរ បានថែរក្សាសុខ សុវត្ថិភាពបានល្អ មិនដូចអ្វីទាំងស្រុង ដូចការផ្សព្វផ្សាយ​បង្អាប់តាមហ្វេសប៊ុកនោះទេ ។

ក្នុងសន្និសីទសារព័ត៌មានស្តីពី ភាពជោគជ័យសម្រេចបានរយៈពេល ៥ឆ្នាំ របស់ខេត្តតាកែវ នៅ​ថ្ងៃទី២ ខែមីនា ឆ្នាំ២០២៣ ឯកឧត្តម អ៊ូច ភា ​មានប្រសាសន៍ទទួលស្គាល់ ពីការកើតឡើង​នូវបញ្ហា​អសន្តិសុខមួយចំនួន បង្កឲ្យមានភាពភ័យខ្លាចដល់ប្រជាពលរដ្ឋ ពិសេសករណីកើតឡើងថ្មីៗនេះ ដែលមានការប្រើអំពើហិង្សា បណ្ដាលឲ្យមានមនុស្សស្លាប់ ។

ឯកឧត្តមបន្តថា ចំពោះករណីនេះ ទាំងអាជ្ញាធរ ឪពុកម្ដាយជនសង្ស័យ ឬក្រុមគ្រួសារជនរងគ្រោះ សុទ្ធសឹង​តែមិនចង់ឲ្យកើតមានឡើង ​និងបានសម្ដែងនូវការសោកស្ដាយ ​ប៉ុន្តែយ៉ាងណា អាជ្ញាធរ​ខេត្តកំពុងពង្រឹងយ៉ាងខ្លាំង​ ចំពោះបញ្ហាសន្តិសុខ ។

ឯកឧត្តម អ៊ូច ភា បានសង្កត់ធ្ងន់ថា ខេត្តតែកែវមានសន្តិសុខល្អ ដូចបណ្ដាខេត្តផ្សេងៗផងដែរ និង​សូមប្រជាពលរដ្ឋកុំមានការភ័យខ្លាច ចំពោះខេត្តតាកែវ ហើយកុំជឿតាមអ្វីដែលបានផ្សព្វ ផ្សាយលើបណ្ដាញសង្គម ។

ឯកឧត្តមអភិបាលខេត្ត បន្ថែមថា រយៈពេល៥ឆ្នាំ បទល្មើសព្រហ្មទណ្ឌនៅក្នុងខេត្តកើតឡើងចំនួន ៩៩៥ករណី បង្រ្កាបជាក់ស្តែងបានចំនួន ៩៧៩ករណី ​ចាប់ខ្លួនបានចំនួន ​១ ១៧៦ នាក់ ស្មើនឹង ៩៨ភាគរយ ​បង្រ្កាបតាមដីកាបានចំនួន ៨៦ដីកា ។

ក្នុងបទល្មើសទាំងអស់នេះ ​បានបង្ក្រាបក្មេងទំនើងចំនួន​ ៦៦ករណី​ ឃាត់ខ្លួនបានចំនួន ១៩៣នាក់ ក្នុងនោះធ្វើកិច្ចសន្យាអប់រំចំនួន ​៥៧ករណី​ និងបញ្ជូនទៅតុលាការចំនួន ៩ករណី ។

អភិបាលខេត្តតាកែវ បានបញ្ជាក់ថា ​សភាពការណ៍សន្តិសុខ សុវត្ថិភាព និងសណ្តាប់ធ្នាប់​សាធារណៈ នៅក្នុងភូមិសាស្ត្រខេត្តតាកែវ ​និងនៅតាមតំបន់ព្រំដែន ​មានភាពល្អប្រសើរ ​ដែលនេះ ស្តែងឱ្យឃើញពីការខិតខំប្រឹងប្រែង ​បំពេញការងាររបស់មន្ត្រីរាជការ កងកម្លាំងប្រដាប់​អាវុធគ្រប់ផ្នែក​ និងគ្រប់លំដាប់ថ្នាក់ទាំងអស់នៅក្នុងខេត្ត ៕អត្ថបទ៖ បាន សុខរិទ្ធិ