ភ្នំពេញ៖ ក្រសួង ស្ថាប័នពាក់ព័ន្ធ និងសង្គមស៊ីវិល បានបង្ហាញការគាំទ្រចំពោះចំណាត់ការរបស់​សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា ដែលបានបញ្ជាឱ្យកែប្រែច្បាប់ពាក់ព័ន្ធនានា ដើម្បីអាចឱ្យប្រជាពលរដ្ឋ អាចចិញ្ចឹមសត្វកម្រ ឬ សត្វព្រៃកម្រជិតផុតពូជ បាននៅតាមផ្ទះ។

អ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានថ្លែងប្រាប់ BTV ថា ប្រសាសន៍​សម្ដេចតេជោ នាយករដ្ឋមន្រ្ដី ក៏ដូចជាគោលការណ៍ដែលសម្ដេច បានដាក់ចេញមក គឺជាការសម្រេចចិត្តដ៏ត្រឹមត្រូវ។

លោកជំទាវថ្លែងថា ក្រសួងកសិកម្មរុក្ខាប្រមាញ់ និងនេសាទ ​នឹងគោរពអនុវត្តតាមប្រសាសន៍របស់​សម្ដេចតេជោ​យ៉ាងម៉ត់ចត់ ​និង​ខ្ជាប់ខ្ជួន​ស្របតាមការណែនាំរបស់សម្ដេចតេជោនាយករដ្ឋមន្រ្ដី។

ទាក់ទងនឹងករណីនេះដែរ ឯកឧត្ដម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់អ្នកសារព័ត៌មាន​ ក្នុងពេលដែលឯកឧត្តមកំពុងបំពេញទស្សនកិច្ចនៅប្រទេសបារាំងថា ក្រសួងកសិកម្ម រុក្ខាប្រមាញ់ និងនេសាទ ​នឹងកែប្រែសម្រួលបទដ្ឋានច្បាប់ពាក់ព័ន្ធនានា ហើយនិង​ជួយ​ផ្នែកបច្ចេកទេសថែទាំសុខភាពសត្វ​ ដើម្បីឲ្យការចិញ្ចឹម «សត្វព្រៃកម្រជិតផុតពូជ» ឱ្យបានត្រឹមត្រូវ។

ចំណែកលោក ចាន់ វិចិត្រ អតីតប្រធានកម្មវិធីនៃអង្គការសង្គ្រោះសត្វព្រៃ (Save Cambodia Wildlife) បានគាំទ្រចំពោះប្រសាសន៍របស់សម្ដេចតេជោ ​ដោយលោកយល់ថា សត្វកម្រដូចជាសត្វក្ងោក និងសត្វមួយចំនួនទៀត ត្រូបានប្រជាពលរដ្ឋយកមកចិញ្ចឹម ​និងបានបន្សាំយ៉ាងល្អ ដូច្នេះពលរដ្ឋ​អាចមានសិទ្ធិចិញ្ចឹមសត្វកម្រទាំងនេះបាន។

គួរបញ្ជាក់ថា ក្នុងពេលអញ្ជើញជាអធិបតីប្រគល់សញ្ញាបត្រដល់និស្សិត វិទ្យាស្ថានបច្ចេកវិទ្យា​កម្ពុជាជិត ៥ ពាន់នាក់នៅមជ្ឈមណ្ឌលសន្និបាត​ និងនិងពិព័រណ៍​កោះពេជ្រនៅថ្ងៃទី១ ខែមីនា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា ​បញ្ជាឱ្យក្រសួង និងស្ថាប័ន​ពាក់ព័ន្ធ ពិនិត្យបន្ទាន់លើបញ្ហាច្បាប់ពាក់ព័ន្ធ ​កែប្រែឱ្យពលរដ្ឋអាចចិញ្ចឹមសត្វជិត​ផុតពូជបានជា​ជាងទៅ​ចាប់យកសត្វដែលពលរដ្ឋខំចិញ្ចឹមមកទុក។ សម្ដេច បញ្ជាក់ថា ការចិញ្ចឹមសត្វ​កម្ររបស់​ពលរដ្ឋនឹងជួយបង្កើនចំនួនសត្វព្រៃឡើងវិញ នៅកម្ពុជាផងដែរ៕ អត្ថបទ៖ វ៉ន ដារ៉ា