ភ្នំពេញ៖ លោកវេជ្ជបណ្ឌិត ង៉ែត សុបញ្ញា នាយករងមនី្ទរពេទ្យ តំណាងលោកវេជ្ជបណ្ឌិត សួន សាមិត្ត នាយកមនី្ទរពេទ្យជាតិ តេជោសន្តិភាព តាមរយៈBTV ព័ត៌មាន នាព្រឹកថ្ងៃទី២ ខែមីនា ឆ្នាំ២០២៣នេះថា មនី្ទរពេទ្យជាតិ តេជោសន្តិភាព បានរៀបចំសម្ភារៈបរិក្ខាវេជ្ជសាស្រ្តរួចរាល់ និងប្រកាសបើកដំណើរការទទួលព្យាបាលជំងឺជូនកីឡាករ កីឡាការិនី។

លោកវេជ្ជបណ្ឌិត ង៉ែត សុបញ្ញា បានបន្តថា សំណង់មនី្ទរពេទ្យជាតិ តេជោសន្តិភាព គិតត្រឹមថ្ងៃនេះ សម្រេចការសាងសង់បានជាង៧០% ហើយអ្វីដែលយើងកំពុងបន្តធ្វើយ៉ាងមមាញឹកនេះ គឺឋិតនៅ​អគារE ដែលរៀបចំជាកន្លែងសម្រាប់សង្រ្គោះបន្ទាន់ ផ្នែកវៈកាត់ជាចម្បង ​ហើយការងារជាទូទៅ​សម្រេច​បានប្រហែលជា៨០%។ ក្នុងអំឡុងពេលនេះ យើងក៏បានរៀបចំអគារH-3 ដើម្បីត្រៀម​ទទួល​កីឡាករ កីឡាការិនី ដែលមានបញ្ហាសុខភាព ​គ្រោះថ្នាក់ផ្សេងៗ ក្នុងអំឡុងពេល​ហ្វឹកហាត់ ឬក៏អំឡុង​ពេលប្រកួត​ តាមអនុសាសន៍ដ៏ខ្ពង់ខ្ពស់​បំផុតរបស់​សម្តេចតេជោ ហ៊ុន សែន នាយករដ្ឋមន្រី្ត។ ត្រង់ចំណុចនេះ លោកវេជ្ជបណ្ឌិត បានលើកឡើងទៀតថា ថ្នាក់ដឹកនាំមនី្ទរពេទ្យ បាន​ចាប់ផ្តើមរៀបចំដាក់ឲ្យដំណើរការជាបណ្តោះអាសន្ន ​សម្រាប់ទទួលព្យាបាលកីឡាករ កីឡាការិនី ​កាលពីថ្ងៃទី១ ខែមីនា ឆ្នាំ២០២៣។ ដូច្នេះកាលពីម្សិលមិញ​យើងក៏មិនទាន់ទទួលអ្នក​ជំងឺដែលជាកីឡាករ កីឡាការិនីនៅឡើយទេ។ ប៉ុន្តែយើងបានរៀបចំកម្លាំងក្រុមការងារ​គ្រូពេទ្យរួច​ជាស្រេចគ្រប់ឯកទេស ព្រមទាំងសម្ភារៈបរិក្ខារវេជ្ជសាស្រ្ត ដើម្បីជម្រុញដល់ការពិនិត្យ ព្យាបាល​ជំងឺជូនគាត់ផងដែរ។ និយាយដោយឡែកចំពោះព្រឹតិ្តការណ៍ប្រកួតកីឡាស៊ីហ្គេម លើកទី៣២ និងអាស៊ាន ប៉ារ៉ាហ្គេម ២០២៣ នឹងចូលមកដល់នាថ្ងៃទី៥ រហូតដល់ថ្ងៃទី១៧ ខែឧសភា ឆ្នាំ២០២៣ខាងមុខនេះ យើងបានរៀបចំក្រុមការងារគ្រូពេទ្យពិសេសមួយក្រុម ដែលប្រចាំការរៀងរាល់ថ្ងៃ ដើម្បីជួយសម្របសម្រួលក្នុងការជួយសង្រ្គោះបឋម សង្រ្គោះបន្ទាន់ ដល់អ្នកជំងឺក្រុមកីឡាករ កីឡាការិនីទាន់ពេលវេលា។

ក្នុងនាមលោកវេជ្ជបណ្ឌិត សួន សាមិត្ត នាយកមនី្ទរពេទ្យជាតិ តេជោសន្តិភាព ជាពិសេសថ្នាក់​ដឹកនាំ​ក្រសួងសុខាភិបាលទាំងអស់ លោកវេជ្ជបណ្ឌិត សូមគោរពថ្លែង​អំណរគុណដល់​សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ដែលបានគិតគូរ​ដ៏ខ្ពង់ខ្ពស់ បានរៀបចំមនី្ទរពេទ្យនេះឡើង ដើម្បីជួយសម្របសម្រួលដល់ក្រុមការងារគ្រូពេទ្យ ជាពិសេសជួយសម្រាលដល់ការព្យាបាលជំងឺជូនប្រជាពលរដ្ឋទូទាំងប្រទេស ជាពិសេសឋិត​ក្នុងដំណាក់កាលដែលយើងបានខិតខំប្រឹងប្រែងសម្រាប់ការការពារ ទប់ស្កាត់ជំងឺឆ្លង បើមាន​ហានិភ័យ​កើតឡើងនូវករណីជំងឺឆ្លងនានា ក៏យើងមានទីតាំងសម្រាប់ទទួលព្យាបាលជំងឺឆ្លង​កុំឲ្យ​មានបញ្ហាជួបប្រទះ នូវអ្វីដែលជាបទពិសោធន៍កន្លងមកក្នុងវិបតិ្តកូវីដ-១៩ ដែលយើងមិន​អាចរក​ទីតាំងពិតប្រាកដជូនប្រជាពលរដ្ឋដែលទទួលការឆ្លងជំងឺកូវីដ-១៩។ អ្វីដែលកាន់តែពិសេសទៀតនោះ គឺជាឱកាសដ៏ល្អសម្រាប់បងប្អូនក្រុមកីឡាករ ​កីឡាការិនី ដែល​មានទីតាំងព្យាបាលជូនគាត់ពិតប្រាកដ ក្នុងអំឡុងពេលហ្វឹកហាត់ និងប្រកួត។ ដូច្នេះកីឡាករ កីឡាការិនី ​មានទីតាំងច្បាស់ ​តម្រង់ទិស និងដើម្បីមកទទួល​សេវាថែទាំព្យាបាលជំងឺនៅ​មនី្ទរពេទ្យជាតិ ​តេជោសន្តិភាព ដោយឥតគិតថ្លៃផងដែរ៕អត្ថបទ៖ រដ្ឋា