ភ្នំពេញ៖ ក្រុមហ៊ុនផ្លូវល្បឿនលឿន (Cambodian PPSHV Expressway Co,Ltd) នៅព្រឹកថ្ងៃទី២ ខែមីនា ឆ្នាំ២០២៣នេះ បានចុះអនុស្សរណៈយោគយល់គ្នាជាមួយសមាគមដឹកជញ្ជូន​អ្នកដំណើរ​ផ្លូវគោក​កម្ពុជា ស្តីពីការប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ ដើម្បីពិភាក្សាថ្លៃសេវា​លើផ្លូវ​ល្បឿនលឿនសម្រាប់រថយន្តដឹកអ្នកដំណើរ។

ការចុះអនុស្សរណៈយោគយល់គ្នារវាងក្រុមហ៊ុនផ្លូវល្បឿនលឿន និងសមាគមដឹងជញ្ជូនអ្នក​ដំណើរ​ផ្លូវគោក​កម្ពុជានេះ គឺបានធ្វើឡើងក្រោមអធិបតីភាពឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជួននាទីស្តីការក្រសួងសាធារណៈការ ​និងដឹកជញ្ជូន។

ថ្លែងនៅក្នុងកម្មវិធីខាងលើនេះ ​ឯកឧត្តម ស៊ុន ចាន់ថុល បានលើកឡើងថា ​ការចុះអនុស្សរណៈ យោគយល់នេះ ​គឺដើម្បីធ្វើយ៉ាងណាឲ្យខាងភាគីក្រុមហ៊ុនផ្លូវល្បឿនលឿន និងសមាគមដឹកជញ្ជូន​អ្នកដំ ណើរឈ្នះទាំងអស់គ្នា ដោយពិភាក្សាក្នុងការបញ្ចុះតម្លៃនូវរថយន្តដែលបានរត់លើផ្លូវល្បឿន​លឿននេះ​ជាប្រចាំថ្ងៃនោះ។

ឯកឧត្តមទេសរដ្ឋមន្រ្តី ក៏បានលើកឡើងផងដែរថា ​ការចរចារគ្នារហូតឈានដល់ ការ​ចុះ​អនុស្សរណៈ​យោគយល់គ្នានេះ ​គឺពិតជាល្អក្នុងការលើកលែង ​និងអធ្យាស្រ័យចំពោះគ្នា ​និងគ្នា ខណៈក្រុមហ៊ុន​ដឹកជញ្ជូនអ្នកដំណើរបានធ្វើដំណើរក្នុងមួយថ្ងៃៗរាប់រយគ្រឿងនោះ។

បើតាមលោក ឆឹម ចំណាន ប្រធានសមាគមដឹកជញ្ជូនអ្នកដំណើរផ្លូវគោកកម្ពុជា ​បានឲ្យដឹងថា ក្រុម​ហ៊ុនផ្លូវល្បឿនលឿនបាន​បញ្ចុះតម្លៃសេវាដែលរត់លើផ្លូវល្បឿនលឿននេះ​តាមប្រភេទផ្សេងៗគ្នា ដោយក្នុងនោះរថយន្តប្រភេទB+Cពី៣០ដល់១០០ជើង ​ក្នុងមួយថ្ងៃបញ្ចុះតម្លៃ២៥ភាគរយ លើមួយរយភាគរយ, រថយន្តប្រភេទB+Cពីរ១០១គ្រឿងឡើង​ទៅ​ក្នុងមួយថ្ងៃបញ្ចុះតម្លៃ ៣០ភាគរយ​លើមួយរយភាគរយ។​ដោយឡែកសម្រាប់រថយន្តដែលខូចតាមផ្លូវ ក្រុមហ៊ុនផ្លូវល្បឿនលឿន​ក៏បាន​បញ្ចុះតម្លៃផងដែរ ​ដោយក្នុងនោះរថយន្តប្រភេទ B+Cពី៣០ដល់១០០ជើងក្នុងមួយថ្ងៃបញ្ចុះតម្លៃ​២៥​ភាគរយ​​លើមួយរយភាគរយ, ​រថយន្តប្រភេទ B+Cពីរ១០១គ្រឿងឡើងទៅក្នុងមួយថ្ងៃបញ្ចុះតម្លៃ ៣០ភាគរយ​លើមួយរយភាគរយ។

លោកបន្តថា យានយន្តសមាជិកសមាគមត្រូវមានក្នុងប្រព័ន្ធETC រថយន្តចាប់ពី​២០គ្រឿងទៅ ហ្វ្រីដុំETCត្រូវមានលុយមួយរយដុល្លារក្នុងធនាគារ៕អត្ថបទ៖ បាន ចក់