តេក្វាន់ដូ៖ ខេមរសហព័ន្ធតេក្វាន់ដូ WT របស់កម្ពុជានឹងបញ្ជូនអត្តពលិក ២រូបដើម្បីចូលរួមការប្រកួតជម្រុះកីឡាអូឡាំពិក Asia qualification Tournament for Tokyo 2020 Olympic Game នៅប្រទេសហ្ស៊កដានីនាខែឧសភាខាងមុខ ដើម្បីប្រជែងកៅអីពេញសិទ្ធចូលរួមប្រកួតកីឡាអូឡាំពិកនៅទីក្រុងតូក្យូ ប្រទេសជប៉ុននាខែកក្កដា ឆ្នាំ២០២១។
លោក គង់ សក្កដា អគ្គលេខាធិការរងសហព័ន្ធបានឲ្យដឹងថា អត្តពលិកដែលត្រៀមបញ្ជូនទៅប្រកួតជម្រុះអូឡាំពិកខែក្រោយនេះ គឺមានកីឡាការិនីខ្មែរ-អាមេរិក ថិប កាសាន់ទ្រី នីកូល ដែលនឹងប្រកួតក្នុងប្រភេទទម្ងន់ ៥៧គីឡូក្រាម និងកីឡាករ វ៉ា មិថុនា ប្រកួតក្នុងប្រភេទទម្ងន់ក្រោម ៨០គីឡូក្រាម ដែលដឹកនាំដោយគ្រូបង្វឹកលោក ឆយ យ៉ុងសុក និងគ្រូជំនួយលោក Tubbs Gregory Allan។ បច្ចុប្បន្នកីឡាករ-កីឡាការិនីទាំង ២រូបនេះកំពុងទទួលបានការយកចិត្តទុកដាក់ពីថ្នាក់ដឹកនាំសហព័ន្ធ ដែលមានឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡាជាប្រធានសហព័ន្ធ និងក្រុមការងារគ្រូបង្វឹក ក្នុងនោះកញ្ញា ថិប កាសាន់ទ្រីនីកូល បានខិតខំហ្វឹកហាត់នៅអាមេរិក ខណៈកីឡាករ វ៉ា មិថុនា បានពង្រឹងការហ្វឹកហាត់ជាខ្លាំងក្នុងស្រុក ដើម្បីត្រៀមការប្រកួតដ៏សំខាន់នេះ។
កីឡាតេក្វាន់ដូ WT គឺជាកីឡាដ៏មានសក្ដានុពលមួយរបស់កម្ពុជា ដែលធ្លាប់ឈ្នះមេដាយកម្រិតតំបន់ និងទ្វីបជាច្រើន ហើយគេចាំបានថាកាលពីឆ្នាំ២០១៦ កីឡាការិនី ស៊ន សៀវម៉ី ក៏ធ្លាប់ចូលរួមប្រកួតជម្រុះកីឡាអូឡាំពិកប្រចាំតំបន់អាស៊ី ដោយបង្កើតកំណត់ត្រាកីឡាការិនីកម្ពុជាដំបូងដែលដណ្ដើមបានមេដាយមាស និងទទួលបានសិទ្ធចូលរួមប្រកួតកីឡាអូឡាំពិក នៅទីក្រុង Rio ប្រទេសប្រេស៊ីលកាលពីឆ្នាំ២០១៦ ផងដែរ។ ចំពោះការប្រកួតកីឡាអូឡាំពិក នៅទីក្រុងតូក្យូ ប្រទេសជប៉ុន ដែលបានលើកពេលមកពីឆ្នាំ២០២០ មកធ្វើក្នុងឆ្នាំ២០២១ នេះ គឺគ្រោងដំណើរការប្រកួតពីថ្ងៃទី២៣ ខែកក្កដារហូតដល់ថ្ងៃទី៨ ខែសីហាខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
