ភ្នំពេញ៖ នៅរសៀលថ្ងៃទី០២ ខែមីនា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតីភាពក្នុងពិធីអបអរសាទរទិវាវប្បធម៌ជាតិ ៣មីនា លើកទី២៥ និង ពិសារអាហារសាមគ្គី ជាមួយសិល្បករ-សិល្បការិនី នៅមជ្ឈមណ្ឌលសន្និបាត និងពិព័រណ៍កោះពេជ្រ។
ខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន៖
- សម្ដេចតេជោ ហ៊ុន សែន៖ ទិវាវប្បធម៌ជាតិ គឺជាទិវាដ៏មានសារៈសំខាន់មួយ ដើម្បីរម្លឹកដល់បុព្វបុរស ខ្មែរគ្រប់ជំនាន់ ដែលបានបន្សល់ទុកនូវមរតកវប្បធម៌ដ៏មានតម្លៃដល់អ្នកជំនាន់ក្រោយ។
- សម្ដេចតេជោ ហ៊ុន សែន៖ ប្រធានបទ «យុវជន ដើម្បីវប្បធម៌ជាតិ» គឺស្របគ្រប់ដំណាក់កាលទាំង អស់ ដោយសារតែយុវជនបានពលី និងលះបង់ស្ទើរគ្រប់បែបយ៉ាងតាំងពីថ្ងៃរំដោះ ៧ មករា ១៩៧៩ មក។
- សម្ដេចតេជោ ហ៊ុន សែន៖ ត្រូវបង្កើនការអភិវឌ្ឍធនធានមនុស្សលើវិស័យវប្បធម៌ ជាពិសេសការបង្កើតនូវស្នាដៃថ្មីៗ ប្រកបដោយក្រមសីលធម៌វិជ្ជាជីវៈ និងស្តង់ដាសកល។
- សម្ដេចតេជោ ហ៊ុន សែន៖ ត្រូវបន្តពង្រឹងប្រសិទ្ធភាពការងារអភិរក្សសំណង់បុរាណ សិលាចារឹក ប្រពៃណីទំនៀមទម្លាប់នានា ជាពិសេសទំនៀមប្រពៃណីរបស់ជនជាតិដើមភាគ តិច។
- សម្ដេចតេជោ ហ៊ុន សែន៖ ត្រូវរៀបចំឱ្យមានសហគមន៍វប្បធម៌ឱ្យបានគ្រប់ទីកន្លែង រហូតដល់ភូមិ ស្រុក។
- សម្ដេចតេជោ ហ៊ុន សែន ស្នើរាជបណ្ឌិត្យសភាកម្ពុជា និងស្ថាប័នពាក់ព័ន្ធរៀបចំបកប្រែភាសាបរទេស ដែលកំពុងតែប្រើប្រាស់ច្រើននៅក្នុងសម័យបច្ចុប្បន្ន។
- សម្ដេចតេជោ ហ៊ុន សែន ស្នើឱ្យផ្ដោតការយកចិត្តទុកដាក់ទៅលើការសាងស្នាដៃសិល្បៈ ដោយគោរពតាមក្បួនខ្នាតឱ្យបានត្រឹមត្រូវ ដើម្បីទុកជាមរតក ដល់អ្នកជំនាន់ក្រោយ។
- សម្ដេចតេជោ ហ៊ុន សែន ស្នើឱ្យយកចិត្តទុកដាក់រក្សាថែវង់ភ្លេងពិណពាទ្យ និងឆៃយ៉ាំ ព្រមទាំងមានការបណ្ដុះបណ្ដាលឱ្យមានអ្នកបន្តវេនលើវង់ភ្លេងទាំងនេះ។
- សម្ដេចតេជោ ហ៊ុន សែន ស្នើឱ្យមានការប្រគំភ្លេងពិណពាទ្យ នៅក្នុងពិធីបុណ្យផ្សេងៗ ជំនួសឱ្យការចាក់ភ្លេងនេះនៅក្នុងឧបករណ៍បំពងសំឡេង។
- សម្ដេចតេជោ ហ៊ុន សែន អំពាវនាវឱ្យមានការសម្របសម្រួល ដើម្បីកុំឱ្យមានទំនាស់ទៅថ្ងៃក្រោយ ទៀត គឺបើប្រកួតនៅកម្ពុជា គួរប្រើឈ្មោះប្រកួតគុនខ្មែរ, បើប្រកួតនៅថៃ គួរប្រើប្រកួតមួយថៃ, បើប្រកួតនៅឡាវ គួរប្រើគុនឡាវ ទៅ។
- សម្ដេចតេជោ ហ៊ុន សែន៖ ខ្ញុំសូមឧទ្ទិសសមិទ្ធផលការងារវប្បធម៌សិល្បៈ និងទិវាវប្បធម៌ជាតិ ដល់រៀមច្បង និងអ្នកជំនាញសិល្បៈវប្បធម៌ ចំនួន ១០ រូប ដែលបានទទួលមរណភាពកាលពីពេលថ្មីៗ កន្លងទៅនេះ។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
