​ភ្នំពេញ៖ នៅល្ងាចថ្ងៃទី២ខែមីនានេះ ដើម្បីប្រារព្ធពិធីអបអរសាទរទិវាវប្បធម៌ជាតិ ៣មីនាលើកទី២៥ និងពិធីពិសារអាហារសាមគ្គី រវាងប្រមុខរាជរដ្ឋាភិបាល និងសិល្បករ សិល្បការិនី ប្រមាណ ៤ពាន់នាក់ មកពីគ្រប់មជ្ឈដ្ឋាននិងគ្រប់វ័យ បានធ្វើឡើងក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅមជ្ឈមណ្ឌលសន្និបាតនិងពិព័រណ៍កោះពេជ្រ។

​ទិវាវប្បធម៌ជាតិ ៣មីនាឆ្នាំនេះ បានរៀបចំឡើងក្រោមប្រធានបទ«យុវជនដើម្បីវប្បធម៌ជាតិ»ដូចឆ្នាំមុនៗ ដែរ ​គោលបំណងដើម្បីជំរុញឱ្យយុវជនចូលរួមយ៉ាងសកម្មថែមទៀត លើការថែរក្សាវប្បធម៌ជាតិ និងដើម្បីរំលឹកដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកម្លាំងកាយកម្លាំងចិត្តកម្លាំងបញ្ញា និងអាយុជីវិតក្នុងការបង្កើតថែរក្សា និងការពារសម្បត្តិវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបានដែលបានបន្សល់ទុកមកដល់កូន ចៅជំនាន់ក្រោយ។

បន្ទាប់ពីការបង្ហាញជូននូវសមិទ្ធផលសិល្បៈ ដែលរាជរដ្ឋាភិបាលបានខិតខំសម្រេចបាន និងការសំដែងជូនជាច្រើនទម្រង់នូវរបាំ សិល្បៈ វប្បធម៌ សៀក ចម្រៀង និងរបាយការណ៍ វឌ្ឍនភាព នៃវិស័យសិល្បៈដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ .សម្ដេចតេជោ ហ៊ុន សែន នាយករដ្ឋមន្ត្រីជាមួយនឹងការកោតសរសើរដល់សិល្បករ សិល្បការិនី វីរៈសិល្បៈ ព្រឹទ្ធាចារ្យមរតកមនុស្សរស់ សម្តេចបានគូសបញ្ជាក់ថា៖ទិវាវប្បធម៌ជាតិ៣មីនា ជាទិវាដ៏មានសារៈសំខាន់១ ដើម្បីរំលឹក ដល់គុណូបការៈ បុព្វបុរសខ្មែរគ្រប់ជំនាន់ ដែលបានពលីកម្លាំងកាយកម្លាំងចិត្ត និងអាយុជីវិតក្នុងការបង្កើតថែរក្សានិងការពារសម្បត្តិវប្បធម៌ដ៏សំបូរបែប និងមានតម្លៃមិនអាចកាត់ថ្លៃបានបន្សល់ទុក មកដល់កូនចៅជំនាន់ក្រោយ។

ផ្អែកលើទស្សនៈទាននេះ ទិវាវប្បធម៌ជាតិត្រូវបានបង្កើតនិងរៀបចំឡើងជាបន្តបន្ទាប់ចាប់តាំងពីឆ្នាំ ១៩៩៩ដែលផ្ដោតលើប្រធានបទផ្សេងៗគ្នាទៅតាមបរិការណ៍ និងអាទិភាពជាក់ស្ដែងរបស់កម្ពុជាពីមួយដំណាក់កាលទៅកាន់មួយដំណាក់កាល ប៉ុន្តែ ចាប់តាំងពីឆ្នាំ២០១៥ រហូតមកដល់ពេលនេះ ប្រធានបទ យុវជនដើម្បីវប្បធម៌ជាតិ ដែលមានតម្លៃសមស្របគ្រប់ជំនាន់អ្នកបន្តវេនត្រូវសម្រេចយកជារៀងរហូត។

សូមបញ្ជាក់ថា រាជរដ្ឋាភិបាលបានកំណត់ យកថ្ងៃទី៣ខែមីនារៀងរាល់ឆ្នាំជាថ្ងៃបើកទិវាវប្បធម៌ជាតិដើម្បីបំផុសនូវស្មារតីស្រឡាញ់ជាតិវប្បធម៌ ទំនៀមទម្លាប់ប្រពៃណី និងអត្តសញ្ញាណជាតិក្នុងចំណោមប្រជាជនខ្មែរគ្រប់រូប ដើម្បីធានាបាននូវការអភិវឌ្ឍប្រកបដោយចីរភាព និងបរិយាប័ន្នស្របតាមគោលនយោបាយជាតិ ស្ដីពីវិស័យវប្បធម៌ និងកម្មវិធីនយោបាយរបស់រាជរដ្ឋាភិបាលកម្ពុជា៕