បន្ទាយមានជ័យ៖ នៅថ្ងៃទី២ ខែមីនា ឆ្នាំ២០២៣ ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ ពិធី​អបអរសាទរ​ទិវាអន្តរជាតិនារី ៨មីនា ខួបលើកទី១១២ ក្រោមប្រធានបទ «ស្រ្តីរួមគ្នារក្សាសុខសន្តិភាព ដើម្បីកិច្ច​អភិវឌ្ឍ​ក្នុងយុគសម័យ» ដែលមានការចូលរួមពីស្រ្តីជាង១០០នាក់។

ឯកឧត្តម អ៊ុំ រាត្រី បាន​ចាត់​ទុកក្រោមប្រធានបទ «ស្រ្តីរួមគ្នារក្សាសុខសន្តិភាព ដើម្បីកិច្ចអភិវឌ្ឍ​ក្នុង​យុគសម័យ​ឌីជីថល» ​ដែល​ជាការផ្តួចផ្ដើមឡើង ដោយក្រសួងកិច្ចការនារី ពិតជាមានអត្ថន័យ និងសារៈសំខាន់​ឆ្លើយទៅនឹង​បរិការណ៍សេដ្ឋកិច្ចសកល និងសង្គមទោះបីសកលលោក កំពុងប្រឈមនឹងការរីករាលដាល នៃជំងឺកូវីដ១៩​ក៏ដោយ។

ឯកឧត្តម អ៊ុំ រាត្រី បានសម្តែងការកោតសសើរ ចំពោះក្រសួងកិច្ចការនារី មន្ទីរកិច្ចការនារី ខេត្ត ស្ថាប័នពាក់ព័ន្ធ វិស័យឯកជន សង្គមស៊ីវិល ដៃគូអភិវឌ្ឍអង្គការជាតិ និងអន្តរជាតិដែលបានអនុវត្ត គោលនយោបាយ លើក​កម្ពស់សមភាពយេនឌ័រ និងការពង្រឹងភាពអង់អាចដល់ស្ត្រីយ៉ាងសកម្ម សម្រេចបាននូវលទ្ធផលគួរជាទីពេញចិត្ត។ ដូច្នេះយើងទាំងអស់គ្នា ចូលរួមថែរក្សាសន្តិភាព ដែលជាមូលដ្ឋានគ្រឹះ ឈានទៅសម្រេចបាននូវចក្ខុវិស័យឆ្នាំ២០៥០។

ជាមួយគ្នានេះ រដ្ឋបាលខេត្តបន្ទាយមានជ័យ ក៏មានក្រុមការងារជាពហុវិស័យ​ឆ្លើយតបនឹងអំពើហិង្សា​ទាក់ទងនឹង​យេនឌ័រ ក្នុងនោះក៏មានមន្ទីរកិច្ចការនារី ជាលេខាធិការដ្ឋានអចិន្ត្រៃយ៍ក្នុងការប្រឹក្សាយោបល់ និងជួយស្វែង​រកសេវាផ្លូវច្បាប់​ជូនស្ត្រី និងក្មេងស្រីរងគ្រោះ។

តាមរយៈក្រុមប្រឹក្សាជាតិកម្ពុជាដើម្បីស្រ្តីក្រុមមេធាវីស្ម័គ្រចិត្តសម្តេចតេជោ ហ៊ុន សែន បានចូលរួមយ៉ាងសកម្ម ក្នុងការផ្តល់សេវាផ្នែកច្បាប់ជូនស្ត្រីក្រីក្ររងគ្រោះ ដោយករណីហិង្សាក្នុងគ្រួសារ និងករណីរំលោភសេពសន្ថវៈ ខណៈកម្ពុជាជាប្រទេសមួយ ក្នុងចំណោមប្រទេសទាំង១០ ដែលសម្រេចបានសូចនាករសំខាន់ៗ ទាក់ទងសុខភាពមាតា និងកុមារ រួមទាំងការទប់ស្កាត់ការរីករាលដាលនៃជំងឺអេដស៍។

ក្នុងនាមជារដ្ឋបាលខេត្ត ឯកឧត្តម អ៊ុំ រាត្រី បានអំពាវនាវ ដល់បងប្អូនប្រជាពលរដ្ឋ និងក្រុមគ្រួសារសូមចូលរួម​គាំទ្រគោល​នយោបាយ សមភាព យេនឌ័រពិសេសប្រធានបទ ដែលក្រសួងកិច្ចការនារី បានលើកឡើងនាឆ្នាំនេះ ដើម្បីបង្កកាលានុវត្តភាពឲ្យស្រ្តី និងក្មេងស្រី បានចូលរួមយ៉ាងសកម្ម ក្នុងកិច្ចអភិវឌ្ឍសង្គម និងសេដ្ឋកិច្ច ក្នុងយុគសម័យឌីជីថល៕ អត្ថបទ ៖ ឧត្ដម