​ឥណ្ឌា​៖ ការ​ផ្ទុះ​កំហឹង​ដាក់គ្នា​ទៅវិញទៅមក​ ជុំវិញ​សង្គ្រាម​របស់​ប្រទេស​រុស្ស៊ី​នៅក្នុង​អ៊ុយ​ក្រែ​ន ​បាន​គ្របដណ្ដប់​លើ​ជំនួប G20 ដោយ​ប្រទេស​ឥណ្ឌា​ជា​ម្ចាស់ផ្ទះ​និយាយ​ថា​ ការ​មិន​ព្រមព្រៀងគ្នា​នេះ​មាន​ន័យថា នឹង​មិន​មាន​សេចក្ដីថ្លែងការណ៍​រួមគ្នា​ឡើយ​។

​ប្រមុខ​ការទូត​អាមេរិក Antony Blinken បាន​និយាយ​ថា ​ជំនួប​នេះ​ត្រូវ​បាន​បង្ក​ការរំខាន​ដោយ​សង្គ្រាម​គ្មាន​ហេតុផល និង​ខុសច្បាប់​របស់​រុស្ស៊ី​។ ប្រមុខ​ការទូត​រុស្ស៊ី​បាន​ចោទ​លោក​ខាង​លិច​ពី​បទ​បោក​ប្រាស់ និង​គំរាមកំហែង​។ ប្រទេស​ឥណ្ឌា​ចង់​ផ្ដោត​លើ​បញ្ហា​ផ្សេងៗ​ ដែល​ប៉ះពាល់​ដល់​បណ្ដា​ប្រទេស​កំពុង​អភិវឌ្ឍន៍ ប៉ុន្តែ​ប្រទេស​នេះ​បាន​និយាយ​ថា ការ​ខ្វែង​គំនិត​គ្នា​ជុំវិញ​សង្គ្រាម​នៅ​អ៊ុយ​ក្រែ​ន​មិន​អាច​ផ្សះផ្សា​បាន​។ ​លោក Jaishankar រដ្ឋមន្ត្រីការបរទេស​ឥណ្ឌា​បាន​និយាយ​ថា យើង​បាន​ព្យាយាម​ហើយ ប៉ុន្តែ​គម្លាត​រវាង​ប្រទេស​ទាំង​២​ នៅ​ឆ្ងាយ​ពី​គ្នា​ណាស់​។

​ប្រទេស​មាន​សេដ្ឋកិច្ច​លូតលាស់​ទាំង​ ២០ ឬ G20​ ដែល​រួម​ទាំង​ប្រទេស​មានទ្រព្យ​សម្បត្តិ​ស្ដុកស្ដម្ភ​ចំនួន ១៩ របស់​ពិភពលោក បូករួម​ទាំង​សហភាព​អឺរ៉ុប​មាន​ចំនួន ៨៥% នៃ​ទិន្នផល​សេដ្ឋកិច្ច​ពិភព​លោក និង​ពីរ​ភាគ​បី​នៃ​ចំនួន​ប្រជា​ជន​របស់​ខ្លួន​។ ​បណ្ដា​រដ្ឋមន្ត្រីការបរទេស​របស់​ក្រុម​នេះ រួម​ទាំង​ប្រមុខ​ការទូត​រុស្ស៊ី​លោក Sergei Lavrov ប្រមុខ​ការ​ទូត​អាមេរិក​លោក Antony Blinken និង​ប្រមុខ​ការទូត​ចិន​លោក Qin Gang ស្ថិត​ក្នុង​បន្ទប់​ប្រជុំ​ជាមួយគ្នា​នៅ​ក្នុង​រដ្ឋធានី Delhi ក្រោម​ការដឹកនាំ​ប្រជុំ​របស់​ឥណ្ឌា​។ នេះ​ជា​ជំនួប​ទល់មុខ​គ្នា​លើកដំបូង​ប្រមាណ ​១០​នាទី​រវាង​អ្នកការទូត​អាមេរិក និង​រុស្ស៊ី ចាប់​តាំង​ពី​សង្គ្រាម​អ៊ុយ​ក្រែ​ន​បាន​ផ្ទុះឡើង៕ អត្ថបទ៖ សុខមាន