ភ្នំពេញ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអៈអាងថា ក្រសួងបានផ្ដោតការយកចិត្តទុកដាក់ខ្ពស់បំផុត ​ក្នុងការថែរក្សាសុខភាពដល់ស្រ្តីក្នុងវ័យបន្តពូជ និងជាពិសេសស្ត្រីជាមាតា​ ដើម្បីឈានទៅកាត់បន្ថយអត្រាមរណភាពមាតា និងទារក។

ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល លើកឡើងយ៉ាងដូច្នេះក្នុង​ពិធី​អបអរសាទរ ខួបលើកទី១១២ ទិវាអន្តរជាតិនារី ៨ មីនា ឆ្នាំ២០២៣ “ស្រ្តីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» និងបំពាក់មេដាយការងារជូនថ្នាក់ដឹកនាំ មន្រី្តរាជការ បុគ្គលិកសុខាភិបាល នៃមន្ទីរពេទ្យមិត្តភាពខ្មែរ-សូវៀត, នាព្រឹកថ្ងៃទី៣ ខែមីនា ឆ្នាំ២០២៣នេះ, រៀបចំឡើងដោយអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍ នៃមន្ទីរពេទ្យមិត្តភាពខ្មែរ-សូវៀត។

ឯកឧត្តម រដ្ឋមន្ត្រីក្រសួងសុខាភិបាល បានលើកឡើងទៀតថា តាមរយៈតួលេខដែលបានមកពីការ​អង្កេតសុខភាព ​និងប្រជាសាស្ត្របឋមនៅកម្ពុជា អត្រាពិនិត្យ និងថែទាំស្រ្តីនៅពេលមានគភ៌ និងពេល​សម្រាលមានចំនួនកើនឡើង រីឯអត្រាមរណភាពមាតា ទារក និងកុមារ មានការថយចុះគួរឲ្យកត់សម្គាល់។

ឯកឧត្តម សាស្រ្តាចារ្យ ម៉ម ប៊ុនហេង លើកឡើងថា រាជរដ្ឋាភិបាលកម្ពុជា ដោយមានការចូលរួម​ពី​អង្គការមិនមែនរដ្ឋាភិបាលផងនោះ ​បាននឹងកំពុងផ្សព្វផ្សាយពីការងារ យេនឌ័រយ៉ាងទូលំទូលាយ​លើគ្រប់វិស័យនៅទូទាំងប្រទេស ដើម្បីឲ្យប្រជាពលរដ្ឋទាំងអស់ ជាពិសេសគឺស្ត្រីខ្លួនឯងយល់​ពីតួនាទី និងសិទ្ធិរបស់ខ្លួន និងរួមគ្នារក្សាសន្តិភាព ដើម្បីអភិវឌ្ឍជាតិ ព្រមទាំងការប្រើប្រាស់​សិទ្ធិនេះឲ្យបានសមស្របផងដែរ។

ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ទៀតថា រាជរដ្ឋាភិបាលកម្ពុជា ក្រោមការ​ដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តោតការយកចិត្តទុកដាក់ ជាពិសេស​ទៅលើសុខភាពរបស់មាតា ទារក និងកុមារដោយបានចេញអនុក្រឹត្យកំណត់យកថ្ងៃទី២១ ខែកុម្ភៈ ជាទិវាជាតិសុខភាពមាតា ទារក និងកុមារផងដែរ។

ជាក់ស្តែង មានសមាសភាពជានារីនៅក្នុងជួរថ្នាក់ដឹកនាំឃុំ-សង្កាត់-ស្រុក-ខណ្ឌ រាជធានី-ខេត្ត ក្រសួង-ស្ថាប័ន ជាងនេះទៅទៀតក្នុងជួររាជរដ្ឋាភិបាល រដ្ឋសភា និងព្រឹទ្ធសភា។ ប្រសិន​បើស្ត្រីជាមាតាមានសុខភាពល្អ កូន ប្តី និងគ្រួសារទាំងមូល ក៏មានសុខភាពល្អ មានសុភមង្គល​និងមានឱកាសចូលរួមសង្គមយ៉ាងពេញលេញក្នុងកិច្ចអភិវឌ្ឍសង្គមជាតិដែរ៕អត្ថបទ រដ្ឋា