ភ្នំពេញ៖ បច្ចុប្បន្ន អ្នកជំនាញ កំពុងមមាញឹកផលិតស្គរសិប្បនិម្មិត ចំនួនបួនរយ សម្រាប់ហាត់សម មុនពិធីបើកព្រឹត្តិការណ៍ស៊ីហ្គេម ​ដែលនឹងចូលមកដល់ នៅថ្ងៃទី៥ ខែឧសភា ឆ្នាំ២០២៣ ។

ក្នុងកិច្ចសម្ភាសន៍ជាមួយBTV នៅថ្ងៃទី០៣ ខែមីនា នេះ លោក ជុំ ប្រសើរ អ្នកជំនាញធ្វើឧបករណ៍ ភ្លេងបុរាណ បានឱ្យដឹងថា ដោយមានការ​អនុញ្ញាត​ពីក្រសួងវប្បធម៌​ សិប្បកម្ម របស់លោក ត្រូវ​ផលិតស្គរ សិប្បនិម្មិត ចំនួនបួនរយ ​សម្រាប់ហាត់សម្តែងទស្សនីយភាពផ្សេងៗ ត្រៀមពិធីបើក​ព្រឹត្តិការណ៍​ស៊ីហ្គេម នៅពេលខាងមុខនេះ ។

ស្គរចំនួន៤០០នេះ ចែកចេញជា៥ប្រភេទ រួមមាន ស្គរជ័យ ស្គរឆៃយ៉ាំ ស្គរមុខពីរ ស្គរដៃ និងស្គរអាប៉េ។ តាមការគ្រោងទុក ស្គរទាំងអស់នេះ ​នឹងធ្វើរួចរាល់នៅដើមខែមេសា ។

តាមការគ្រោងទុក ក្រសួងវប្បធម៌ និងវិចិត្រសិល្បៈ និងបង្ហាញទស្សនីយភាព ចំនួន៥ នៅក្នុងពិធី បើកព្រឹត្តិការណ៍ស៊ីហ្គេម ​លើកទី៣២ នៅថ្ងៃទី៥ ខែឧសភា ឆ្នាំ២០២៣។

ទស្សនីយភាពទាំងនោះ រួមមាន ការកកើតទឹកដីប្រទេសកម្ពុជា ​ភាពរុងរឿងនាសម័យអង្គរ ស្នាម​ញញឹមខ្មែរ អនាគតកម្ពុជា​ និងសហគមន៍ ​ជោគវាសនាតែមួយ​ ដែលមានសិល្បៈករ-សិល្បៈការិនី​ចូលរួមសម្តែង ចំនួនជាង៣ពាន់នាក់ ។

ព្រឹត្តិការណ៍កីឡាអាស៊ីអាគ្នេយ៍ ឬហៅថា ស៊ីហ្គេម លើកទី៣២ ដែលប្រទេសកម្ពុជាធ្វើជាម្ចាស់ ដំបូង នឹងចាប់ផ្តើមពីថ្ងៃទី៥ ​ដល់ថ្ងៃទី១៧ ខែឧសភា ឆ្នាំ២០២៣ ដោយមានកីឡា៣៦ប្រភេទ​ ចែកចេញ ជា៥៨១វិញ្ញាសា ។ បន្ទាប់ពីបញ្ចប់ព្រឹត្តិការណ៍នេះ ​ប្រទេសកម្ពុជា នឹងរៀបចំព្រឹត្តិការណ៍​កីឡា​អាស៊ាន ប៉ារ៉ាហ្គេម លើកទី១២ ដែលចាប់ផ្តើមពីថ្ងៃទី៣​ ដល់ថ្ងៃទី៩ ខែមិថុនា​ ឆ្នាំ២០២៣ ដោយមាន​ការប្រកួត កីឡា ចំនួន១៣ប្រភេទ មានចំនួនជាង១០០វិញ្ញាសា ។

ប្រទេសកម្ពុជា ​អាចរៀបចំព្រឹត្តិការណ៍កីឡាអន្តរជាតិទាំង២នេះបាន ​គឺដោយសារការដឹកនាំប្រកប ដោយគតិបណ្ឌិត របស់សម្តេចតេជោ ហ៊ុន សែន​ ដែលបានដឹកនាំ​ប្រទេសជាតិឱ្យមានសុខសន្តិភាព ពេញបរិបូរ ​មានសមត្ថភាព ​និងមានលទ្ធភាពគ្រប់គ្រាន់ក្នុងការរៀបចំព្រឹត្តិការណ៍៕អត្ថបទ៖ ទូច សោភ័ណ