បាល់ទាត់៖ ខ្សែបម្រើ-ប្រយុទ្ធស្នូលរបស់ក្លិបភ្នំពេញក្រោន Andres Nieto បានបង្ហាញអារម្មណ៍នឹករឭកបាល់ទាត់ជាខ្លាំង ស្របពេលលីគកំពូលកម្ពុជាបានផ្អាកការប្រកួតជាបណ្ដោះអាសន្ន ក្រោយវិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ដែលមកទល់ពេលនេះ គណៈកម្មការប្រកួតបាល់ទាត់ជាតិ-CNCC នៅមិនទាន់កំណត់តកាលបរិច្ឆេទថ្មីដើម្បីបន្ដការប្រកួតឡើយ។
កីឡាករសញ្ជាតិកូឡុំប៊ីរូបនេះបានបញ្ជាក់ថា ខ្លួនពិតជានឹកបាល់ទាត់ មិត្តរួមក្រុម ទីលានប្រកួត និងនឹកអ្នកគាំទ្រទាំងអស់របស់ក្លិបសិង្ហក្រហមភ្នំពេញក្រោន ពិសេសនឹកដល់ការប្រកួតក្របខណ្ឌលីគកំពូលកម្ពុជា ដោយ Nieto ចង់ឲ្យការប្រកួតត្រឡប់មកវិញនាពេលឆាប់ៗខាងមុខ ព្រោះរូបគេត្រូវការពេលវេលាប្រកួតប្រជែង និងសប្បាយជាមួយគ្នាលើសមរភូមិវាលស្មៅ។ Andres Nieto គឺជាកីឡាករបរទេសដ៏សំខាន់មួយរូប របស់អតីតក្រុមជើងឯក ៦សម័យកាលភ្នំពេញក្រោន ខណៈ ៣ប្រកួតបើករដូវកាលថ្មីមុនលីគផ្អាកការប្រកួត គេបានរួមចំណែកជួយក្រុមឈ្នះ ៣ប្រកួតផ្ទួនៗ និងរកបាន ២គ្រាប់ម្នាក់ឯងជួយឲ្យក្រុមមាន ៩ពិន្ទុពេញ និងឈរលេខរៀងទី៣ បណ្ដោះអាសន្ន តាមពីក្រោយក្រុមព្រះខ័នរាជស្វាយរៀងដែលមាន ៩ពិន្ទុស្មើគ្នា និងក្រុមកំពូលតារាងអង្គរថាយហ្គឺរដែលមាន ១០ពិន្ទុក្នុងដៃ។
ក្រឡេកមកចាប់អារម្មណ៍លីគកំពូលកម្ពុជាវិញ ត្រូវបាន CNCC សម្រេចផ្អាកការប្រកួតជាបណ្ដោះអាសន្នចាប់ពីថ្ងៃទី១៥ រហូតដល់ថ្ងៃទី២៨ ខែមេសា ដើម្បីចូលរួមយុទ្ធនាការប្រយុទ្ធប្រឆាំងជំងឺកូវីដ-១៩ ក្នុងសហគមន៍ ហើយស្របពេលរាជរដ្ឋាភិបាលសម្រេចពន្យារពេលបិទខ្ទប់រាជធានីភ្នំពេញ និងក្រុមតាខ្មៅរហូតដល់ថ្ងៃទី០៥ ខែឧសភា CNCC ក៏នឹងបន្ដគោរពវិធានការនេះរហូតដល់មានការជូនដំណឹងជាថ្មីផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
