​ភ្នំពេញ៖ រដ្ឋបាលរាជធានីភ្នំពេញ​ប្រជុំរកដំណោះស្រាយការកស្ទះចរាចរណ៍នៅតំ​បន់​ការដ្ឋានសាងសង់ស្ពានអាកាសព្រះមុនីវង្ស។​ក្រោយមានការកស្ទះចរាចរណ៍ជាច្រើនម៉ោងនៅការដ្ឋានសាងសង់ស្ពានអាកាសព្រះមុនីវង្ស កាលពីថ្ងៃទី១ ខែមីនា កន្លងមកនះ អាជ្ញាធររាជធានីភ្នំពេញ បានកោះហៅមន្ត្រីជំនាញ​​ក្រុមហ៊ុនសាងសង់ និងនគរបាលចរារណ៍មកប្រជុំ ដើម្បីរិះរកគ្រប់មធ្យោបាយដោះស្រាយបញ្ហាកកស្ទះចរាចរណ៍ នៅចំណុចការដ្ឋាននេះឱ្យបានល្អប្រសើរជាងមុន ដែលកិច្ចប្រជុំនេះ បានធ្វើឡើងនៅសាលារាជធានីភ្នំពេញ នាល្ងាចថ្ងៃទី០៣ ខែមីនា ឆ្នាំ២០២៣ ក្រោមអធិបតីភាព លោក កើត ឆែ អភិបាលរងរាជធានីភ្នំពេញ។

លោក កើត ឆែ បានលើកឡើងថា ការបង្កើតឱ្យមានកិច្ចប្រជុំនេះ គឺដើម្បីឱ្យមន្ត្រីជំនាញ​ក្រុមហ៊ុនសាងសង់ និងនគរបាលចរាចរណ៍ រួមគំនិតគ្នា រកគ្រប់មធ្យោបាយដោះស្រាយ​ការកកស្ទះចរាចរណ៍ខ្លាំង នៅតំបន់ការដ្ឋានសាងសង់ស្ពានអាកាសព្រះមុនីវង្ស ព្រោះកន្លងមកនេះ នៅតំបន់ការដ្ឋាននេះ មានការកកស្ទះចរាចររហូតដល់៥ទៅ៦ម៉ោងឯណោះ។

​លោក កើត ឆែ បានជំរុញឱ្យធ្វើការកែសម្រួល ដោយបង្រួមរបងការដ្ឋានឱ្យតូចជាងមុន កែសម្រួលផ្លូវមួយចំនួន ជាមួយនឹងការដោះស្រាយជាមួយអ្នកលក់ដូរលើចិញ្ចឹមផ្លូវ នៅតំបន់ការដ្ឋានឱ្យបានល្អប្រសើរ សំដៅឱ្យមានលំហូរចរាចរណ៍បានល្អ។

បន្ថែមពីនេះ លោក កើត ឆែ ក៏បានជំរុញឱ្យមន្ត្រីរដ្ឋបាលរាជធានីភ្នំពេញរៀបចំជាផែនការឱ្យបានជាក់លាក់ ដើម្បីចេញសេចក្តីជូនដំណឹងមួយក្នុងការបង្វែរទិសចរាចរណ៍ចេញ និងចូលភ្នំពេញ ដោយមិនឱ្យឆ្លងកាត់តំបន់ការដ្ឋានសាងសង់ស្ពានអាកាសព្រះមុនីវង្សនេះ។​

គួរបញ្ជាក់ថា ស្ពានអាកាសព្រះមុនីវង្ស មាន​ទីតាំងប្រសព្វរវាងមហាវិថីសម្តេចតេជោ ហ៊ុន សែន មហាវិថីព្រះមុនី្នវង្ស និងវិថីកងយោធពលខេមរភូមិន្ទ ហៅផ្លូវលេខ​២៧១ ដែលជាស្ពានអាកាសតំបូងគេដែលមានរង្វង់មូលលើអាកាស។ គម្រោងសាងសង់ស្ពានអាកាសថ្មីនេះ ជាគម្រោងរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC ដោយគ្រោងចំណាយថវិកាចំនួនជាង ៣៦លានដុល្លាអាមេរិក ដោយប្រើប្រាស់រយៈពេលសាងសង់ ៣៦ខែ៕ អត្ថបទ ៖ ប្រាក់ វ៉ាន់ដា ​