ភ្នំពេញ ៖ ឯកឧត្ដម យក់ ប៊ុនណា រដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល នៃ​ក្រសួង​មុខងារ​សាធារណៈ តំណាងឯកឧត្តមរដ្ឋមន្ត្រី នៅរសៀលថ្ងៃទី០៣ខែមីនានេះ បានអញ្ជើញចូលរួម​ជាអធិបតីភាព​ក្នុងពិធីបិទសន្និសីទរដ្ឋបាលអន្តរជាតិ សម្រាប់ឆ្នាំ២០២៣ ស្ដីពី«បរិវត្តកម្មរដ្ឋបាលសាធារណៈ ក្នុងបរិការណ៍នៃ​ការផ្លាស់ប្ដូរសង្គមសេដ្ឋកិច្ច» ដែលនឹងប្រព្រឹត្តទៅ ចាប់ពីថ្ងៃទី២ ដល់ថ្ងៃទី៣ ខែមីនា ឆ្នាំ២០២៣ ស្ថិនៅនៅសណ្ឋាគារ SUN & MOON Riverside និងតាមប្រព័ន្ធអនឡាញ (Microsoft Team)។

នៅក្នុងឱកាសនោះ ឯកឧត្តម យក់ ប៊ុនណា បានថ្លែងថា សន្និសីទនេះត្រូវបានរៀបចំ​ឡើងក្នុងគោលបំណង​សំខាន់​ក្នុងការ​ផ្តល់ឱកាសក្នុងការចែករំលែកអំពីការខិតខំប្រឹងប្រែងរបស់ក្រសួង-ស្ថាប័នកម្ពុជា និងក្រសួង-ស្ថាប័នបារាំង ក្នុងការងារកែ​ទម្រង់រដ្ឋ ដើម្បីឆ្លើយតបឱ្យបានទាន់ពេលវេលា និងប្រកបដោយប្រសិទ្ធភាព ទៅនឹងការផ្លាស់ប្តូរ​សង្គម​សេដ្ឋកិច្ចនាពេលបច្ចុប្បន្ន ដែលបណ្តាលមកពីផលប៉ះពាល់ពីការគម្រាមកំហែង​មួយចំនួនដូច​ជាវិបត្តិសុខភាពពី​ជម្ងឺកូវីដ១៩ បញ្ហាសង្គ្រាមរុស្សី-អ៊ុយក្រែន និងតម្រូវការដែលចេះតែកើនឡើងទៅៗរបស់ប្រជាពលរដ្ឋ។

លើសពីនេះ ឯកឧត្តមបន្តថា បច្ចុប្បន្ន បច្ចេកវិទ្យាបានជួយកែលម្អសេវាសាធារណៈ​នៅតាមក្រសួង-ស្ថាប័ន​សាធារណៈ​ ធ្វើឱ្យសេវា​មានភាពរហ័ស និងមានប្រសិទ្ធភាពជាងមុនគៀកនឹងប្រជាពលរដ្ឋ។ ហើយការគ្រប់គ្រងរដ្ឋបាល​សាធារណៈប្រទេសបារាំងជាបទពិសោធន៍មួយដែលប្រទេសកម្ពុជាអាចពិចារណាយកគំរូតាមនាពេលអនាគត។

ជាការកត់សំគាល់ អង្គសន្និសីទរយៈពេលពីរថ្ងៃនេះ គឺជាវេទិកាមួយដ៏សំខាន់សម្រាប់មន្ត្រីជាន់ខ្ពស់នៃរាជរដ្ឋាភិបាល ថ្នាក់ដឹកនាំនិងមន្ត្រីថ្នាក់គ្រប់គ្រង ដែលមានតួនាទីជាអ្នករៀបចំគោលនយោបាយ អ្នកវិភាគគោលនយោបាយ និងអ្នកសិក្សាស្រាវជ្រាវ ទាំងប្រទេសកម្ពុជានិងប្រទេសបារាំង ចូលរួមចែករំលែកបទពិសោធន៍ ការវិភាគ ក៏ដូចជាបញ្ហាប្រឈម និងឱកាស ព្រមទាំងអាចរៀនសូត្រពីគ្នាទៅវិញទៅមក ដើម្បីគោលបំណងរួម គឺការ​ពង្រឹងកិច្ចសហប្រតិបត្តិការរវាងបារាំងនិងកម្ពុជា លើទំនាក់ទំនងរវាងគ្រឹះស្ថានបណ្តុះបណ្តាលទាំងពីរប្រទេស ព្រមទាំងស្វែងរកយុទ្ធសាស្ត្រដើម្បីបន្តកិច្ចសហប្រតិបត្តិការបន្ថែមទៀតនាពេលអនាគត ៕ អត្ថបទ៖ទូច សោភ័ណ ​