ភ្នំពេញ៖ រដ្ឋាករទឹកស្វយ័តក្រុងភ្នំពេញ ធ្វើបច្ចុប្បន្នភាពផែនការ​មេផ្គត់ផ្គង់​ទឹកស្អាត​ដំណាក់​កាលទី៣ សំដៅការធានាឱ្យមានទឹក មានអនាម័យ ការគ្រប់គ្រងទឹក និងសុវត្ថិភាពនិរន្តរភាព ដើម្បី​រក្សាស្ថេរភាពផ្គត់ផ្គង់ទឹកស្អាត ឆ្លើយតបបាន​ទៅនឹង​សន្ទុះ​នៃ​កំណើន​សកម្មភាព​សេដ្ឋកិច្ច​នៅ​រាជ​ធានីភ្នំពេញ និងក្រុងតាខ្មៅ។

ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ ថ្លែងលើកឡើង​នៅ​ក្នុង​ពិធី​ផ្សព្វ​ផ្សាយ​បច្ចុប្បន្ន​ភាពផែនការមេផ្គត់ផ្គង់ទឹកស្អាតដំណាក់កាលទី៣ នៅរាជធានីភ្នំពេញ ២០២១-២០៣០ នៅថ្ងៃទី៣ ខែមីនា ឆ្នាំ២០២៣ នេះថា រដ្ឋាករទឹកស្វយ័តក្រុងភ្នំពេញ បានអនុវត្ត​ផែនការ​មេ​ដំណាក់​កាលទី១ និងទី២ ប្រកបដោយជោគជ័យ និង​សម្រេចមុន​ផែនការ​ដែល​បាន​គ្រោង​ទុក ដោយសារតែការរីកចំរើនឥតឈប់ឈររបស់រាជធានីភ្នំពេញ និងក្រុងតាខ្មៅ ក្នុងល្បឿន​មួយ ដែលដៃគូរអភិវឌ្ឍន៍ទាំងអស់បានវាយតម្លៃថា ស្ថិតក្នុងកំរិតល្បឿនរបស់កាំជ្រួចប្រតិកម្ម។

ឯកឧត្តម បន្តថា ដើម្បីឆ្លើយតបឱ្យបានទាន់ពេលវេលា ទៅនឹង​សន្ទុះ​ នៃ​កំណើន​សកម្មភាព​សេដ្ឋកិច្ច ក្រោមម្លប់សន្តិភាព និងដោយមានការចង្អុលបង្ហាញរបស់ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ, រដ្ឋាករទឹកស្វយ័តក្រុងភ្នំពេញ បានកសាងផែនការមេដំណាក់កាលទី៣ នា​ឆ្នាំ២០១៧ ក្រោមសហហិរញ្ញប្បទានរបស់រដ្ឋាករទឹកស្វយ័តក្រុងភ្នំពេញ និងស្ថានទូត នៃ​សាធារណរដ្ឋ​បារាំងប្រចាំនៅកម្ពុជា ដែលផែនការមេដំណាក់កាលទី៣ នេះបានប្រមើល​មើល​តម្រូវ​ការ​ទឹកស្អាត, ប្រើប្រាស់ និងតម្រូវការវិនិយោគរហូតដល់ឆ្នាំ២០៣០។

ជុំវិញវិស័យទឹកស្អាតនេះ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា ការផ្សព្វផ្សាយ​អំពី​ផែន​ទី​បង្ហាញ​ផ្លូវ​រយៈពេលវែងមួយ គឺបានបន្ស៊ីតាមគោលបំណង និងគោលដៅរួម​នៃ​ផែនការ​អភិវឌ្ឍន៍​ជាតិ និងគោលនយោបាយវិស័យទឹកស្អាត តាមរយៈការកំណត់ច្បាស់លាស់នូវគោលបំណង, គោល​ដៅ, លទ្ធផលតាមបណ្ដាឆ្នាំ និងលទ្ធផលចុងក្រោយ ជាមួយនឹង​កាល​វេលា​នៃ​បង្គោល​ចរ​ច្បាស់​លាស់ ពោលគឺឆ្នាំ២០៣០ គឺជាឆ្នាំដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ សម្រេចឱ្យបាននូវគោលដៅទី ៦ នៃគោលដៅអភិវឌ្ឍន៍ប្រកបដោយចីរភាពកម្ពុជា ២០១៦-២០៣០ ដែល "ធានាឱ្យមានទឹក និងអនាម័យ និងការគ្រប់គ្រងទឹក និងអនាម័យ​ប្រកប​ដោយ​ចីរភាព សម្រាប់ប្រជាជនគ្រប់រូប១០០%" និងជាឆ្នាំ​ដែល​កម្ពុជា​ឈាន​ទៅ​សម្រេច​បាន​នូវ​ចក្ខុវិស័យ នៃ​ការអភិវឌ្ឍវែងឆ្ងាយរបស់ខ្លួន ពោលគឺការសម្រេច​បាន​នូវ​ឋានៈ​ជា​ប្រទេស​ចំណូល​មធ្យម​កម្រិតខ្ពស់។

ឯកឧត្ដម ទេសរដ្ឋមន្រ្តី បានសង្កត់ធ្ងន់ថា ទឹកស្អាតគឺជាអាទិភាពមួយ ក្នុងវិស័យ​អាទិភាព​ទាំងបួន​នៅ​ក្នុង​យុទ្ធសាស្ត្រចតុកោណដំណាក់កាលទី៤ នៃរាជរដ្ឋាភិបាលអាណត្តិទី៦ រួមមាន មនុស្ស ផ្លូវ ភ្លើង និងទឹក។ ក្នុងបរិបទនេះ វិស័យផ្គត់ផ្គង់​ទឹកស្អាត​ទាមទារ​នូវ​ការ​ពង្រឹង​ការ​គ្រប់​គ្រង​ប្រកប​ដោយ​ប្រសិទ្ធ​ភាពខ្ពស់ គឺធានាដល់ការផ្តល់សេវាផ្គត់ផ្គង់ទឹកស្អាត ដែលត្រូវអនុលោម​ទៅ​តាម​លក្ខ​ខណ្ឌ​គោល​បួនយ៉ាង គឺទឹកស្អាតត្រូវមានគុណភាព សុវត្ថិភាពនិរន្តរភាព និងថ្លៃសមរម្យ ដើម្បី​បំពេញ​តម្រូវ​ការប្រើប្រាស់ក្នុងជីវភាពរស់នៅរបស់ប្រជាពលរដ្ឋ ការលើកកម្ពស់​សុខុមាល​ភាព​សាធារណៈ និងការឆ្លើយតបទៅនឹងតម្រូវការខាងផ្នែកផលិតកម្ម អាជីវកម្ម សេវាកម្ម​លើ​គ្រប់​វិស័យ​ក្នុង​សង្គមជាតិទាំងមូល។ លើសពីនេះ ការអភិវឌ្ឍ និងគ្រប់គ្រងសេវាផ្គត់ផ្គង់ទឹកស្អាត ក៏​ជា​កត្តា​គន្លឹះមួយក្នុងការបង្កើនជំនឿទុកចិត្ត និងទាក់ទាញការវិនិយោគជាតិ និងអន្តរជាតិ សម្រាប់​ការ​បង្កើត​មូលដ្ឋានផលិតកម្ម អាជីវកម្មនៅកម្ពុជា៕ អត្ថបទ៖ សុន រ៉ាឌី