ភ្នំពេញ៖ សមិទ្ធផលនៅក្នុងវិស័យទឹកស្អាតរបស់រាជរដ្ឋាបាល បានកំពុងកើតឡើងជាបន្តបន្ទាប់ ជាពិសេសការអភិវឌ្ឍន៍ទឹកស្អាតនៅរាជធានីភ្នំពេញ ព្រោះ​តម្រូវ​ការ​ទឹក​គឺ​ជាមូល​ដ្ឋាន​ចាំ​បាច់​ សម្រាប់​ជីវភាពរស់នៅរបស់ប្រជាពលរដ្ឋ និងសិទ្ធិទទួលបាន ហើយវិស័យគឺ​កត្តា​គន្លឹះ​មួយ​ដើម្បី​បង្កើន​ជំនឿទុកចិត្ត និងទាក់ទាញការវិនិយោគ លើការបង្កើតមូលដ្ឋានផលិតកម្ម អាជីវកម្ម​នៅ​កម្ពុជា។

ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថ្លែងលើកឡើងក្នុងពិធីបញ្ចុះបឋមសិលា បើកការដ្ឋាន​សាងសង់​រោង​ចក្រ​ប្រព្រឹត្តិកម្មទឹកស្អាត បឹងធំ ស្ថិតនៅសង្កាត់បឹងធំ ខណ្ឌកំបូល រាជធានីភ្នំពេញ នៅល្ងាចថ្ងៃទី ៣ ខែ មីនា ឆ្នាំ ២០២៣ នេះថា ជុំវិញការអភវិឌ្ឍន៍ទឹកស្អាត រាជរដ្ឋាភិបាល​បាន​កំណត់​គោល​នយោបាយ​លើវិស័យទឹកស្អាត គឺពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុង ទីប្រជុំ​ជន​ឱ្យ​បាន ៩៣ ភាគរយ ដល់ឆ្នាំ២០២២ និង ១០០ភាគរយ ចាប់ពីឆ្នាំ២០២៥ តទៅ ដើម្បី​បម្រើ​តម្រូវ​ការ​ចាំបាច់​របស់​ប្រជាជន ក៏ដូចជាសម្រាប់ផលិតកម្ម និងសេវាកម្មនានា តាមរយៈអភិវឌ្ឍ​ពង្រីក​ប្រព័ន្ធ​ផ្គត់ផ្គង់​ទឹក​ស្អាត ទាំងផ្នែកសាធារណៈ និងផ្នែកឯកជន ។

ឯកឧត្ដម ទេសរដ្ឋមន្រ្តី បន្តថា តាមរយៈគោលនយោបាយនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកំពុងដើរតួនាទីកាតាលីករ និងការបង្កលក្ខណៈងាយស្រួល ដោយ​បាន​ខិតខំជំរុញឱ្យមានការផ្តល់ទុនវិនិយោគជាច្រើនរយលានដុល្លារ សម្រាប់ការសិក្សា និង​សាង​សង់​ប្រព័ន្ធផ្គត់ផ្គង់ទឹកស្អាតបន្ថែម នៅតាមបណ្តាទីរួមខេត្ត និងទីប្រជុំជនផ្សេងទៀត នៅទូទាំង​ប្រទេស តាមរយៈហិរញ្ញប្បទានពីដៃគូអភិវឌ្ឍន៍ និងពីថវិកាជាតិ ធ្វើឱ្យវិស័យ​ទឹក​ស្អាត​មាន​ការ​អភិវឌ្ឍ​យ៉ាងធំធេង និងផ្គត់ផ្គង់ទឹកស្អាតមួយ ដល់ចំនួនរយលានម៉ែត្រគូប និងគ្រប​ដណ្តប់​នៅ​គ្រប់​ទី​ប្រជុំជនជិតឆ្ងាយ និងឆ្លើយតបទៅនឹងតម្រូវការប្រើប្រាស់ប្រចាំថ្ងៃជាដើម។

ចំពោះការអភិវឌ្ឍន៍ទឹកស្អាតនៅរាជធានីភ្នំពេញ, ឯកឧត្តម ឡុង ណារ៉ូ អគ្គនាយក​រដ្ឋាករ​ទឹក​ស្វយ័ត​ក្រុង​ភ្នំពេញ លើកឡើងឲ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ រាជធានី​ភ្នំពេញ​មាន​ការ​រីក​ចម្រើនយ៉ាងខ្លាំង ទាំងការអភិវឌ្ឍន៍ហេដ្ឋារចនាសម្ព័ន្ធនានា ការអភិវឌ្ឍន៍ទីក្រុងរណប ការ​កើនឡើងនៃទំហំពាណិជ្ជកម្ម និងវិនិយោគជាដើម។ ការរីកចម្រើនខាងលើ បានញាំង​ឱ្យ​ការ​ផ្គត់​ផ្គង់​ទឹកស្អាតនៅក្នុងរាជធានីភ្នំពេញ កំពុងជួបបញ្ហាប្រឈមយ៉ាងខ្លាំង ជាក់ស្ដែង​បច្ចុប្បន្ន​តម្រូវ​ការ​ប្រើប្រា​ស់ទឹកស្អាតនៅក្នុងរាជធានីភ្នំពេញទាំងមូល មានប្រមាណ ៨០ ម៉ឺនម៉ែត្រគូប​ក្នុង​មួយ​ថ្ងៃ នៅពេលសមត្ថភាពរបស់រោងចក្រប្រព្រឹត្តកម្មទឹករបស់រដ្ឋាករទឹកស្វយ័តក្រុងភ្នំពេញទាំង ៤ ទីតាំង​មានត្រឹមតែ ៦៣ ម៉ឺនម៉ែត្រគូប ក្នុងមួយថ្ងៃ, តែទោះបី​យ៉ាង​ណា​រដ្ឋាករ​ទឹក​ស្វយ័ត​ក្រុង​ភ្នំពេញ បានខិតខំប្រឹងប្រែងអភិវឌ្ឍន៍ឥតឈប់ឈរ ជាក់​ស្តែង​ការ​ចាប់​ផ្តើម​សាង​សង​រោង​ចក្រ​បឹង​ធំ​នេះ​ជាដើម ដើម្បីជំរុញគ្រប់ដណ្តប់ការផ្គត់ផ្គង់ទឹកស្អាតឲ្យកាន់តែធំ។

សូមបញ្ជាក់ថា ជុំវិញវិស័យទឹកស្អាតនេះ រដ្ឋាករទឹកស្វយ័តក្រុងភ្នំពេញ នឹងជំរុញ​ការ​ផ្គត់​ផ្គង់​ទឹក​ស្អាត​ជា​បន្ត​បន្ទាប់ ក្នុងនោះបាក់ខែង ជំហានទី១ គ្រោងនឹង​បញ្ចប់​ការ​សាង​សង់​នៅ​ក្នុង​ត្រីមាស​ទី​២ ឆ្នាំ២០២៣, បាក់ខែងជំហានទី២ បញ្ចប់ការសាងសង់នៅក្នុងត្រីមាសទី១ ឆ្នាំ២០២៤, គម្រោង​ពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅ បញ្ចប់ក្នុងខែ ធ្នូ ឆ្នាំ២០២៤, គម្រោងបង្កើន​សមត្ថភាព​រោង​ចក្រប្រព្រឹត្តកម្មទឹកស្អាតភូមិព្រែក គ្រោងសាងសង់ក្នុងឆ្នាំ ២០២៦ បន្ថែម។ ដោយឡែកគម្រោងសាងសង់រោងចក្រប្រព្រឹត្តិកម្មទឹកស្អាតបឹងធំនេះ គឺគ្រោងបញ្ចប់នៅខែតុលា ឆ្នាំ២០២៣ ដោយគ្រោងនេះចំណាយថវិកាសាងសង់ជាង ២,៤លានដុល្លារ ក្នុងនោះស្ថិត​ក្រោម​ជំនួយ​ឥតសំណងរបស់រាជរដ្ឋាភិបាលជប៉ុន មានទឹកប្រាក់ជាង ១,៤ លាននដុល្លារ និងថវិកា​វិភាគ​របស់រដ្ឋាករទឹកស្វយ័តក្រុងភ្នំពេញជាង ៩៣ ម៉ឺនដុល្លារ៕ អត្ថបទ៖ សុន រ៉ាឌី